ខេត្តក្រចេះ ៖ ក្រៅពីការជន់លិចភូមិឋាន ផ្លូវលំ ផ្លូវថ្នល់ សាលារៀន វត្តអារាម និងផលដំណាំរបស់ប្រជាពលរដ្ឋហើយនោះ នៅតាមបណ្តារមណីយដ្ឋានមួយចំនួនមានដូចជា តំបន់អេកូទេសចរណ៍ធម្មជាតិ…
ខេត្តក្រចេះ ៖ ក្រៅពីការជន់លិចភូមិឋាន ផ្លូវលំ ផ្លូវថ្នល់ សាលារៀន វត្តអារាម និងផលដំណាំរបស់ប្រជាពលរដ្ឋហើយនោះ នៅតាមបណ្តារមណីយដ្ឋានមួយចំនួនមានដូចជា តំបន់អេកូទេសចរណ៍ធម្មជាតិ និងតំបន់ទេសចរណ៍ប្រវត្តិសាស្ត្រជាច្រើនកន្លែងទៀតក្នុងខេត្តក្រចេះ កំពុងរងផលប៉ះពាល់ពីទឹកជំនន់នេះដែរ ដែលធ្វើឲ្យអ្នកពឹងអាស្រ័យលើវិស័យមួយនេះកំពុងជួបបញ្ហា ។
រមណីយដ្ឋានសំខាន់ៗដែលមានឈ្មោះល្បីល្បាញនៅតាមដងទន្លេមេគង្គដូចជា រមណីយដ្ឋានអន្លង់ផ្សោត, រមណីយដ្ឋានទឹកជួរទន្លេមេគង្គកាំពី, រមណីយដ្ឋានវប្បធម៌ប្រវតិ្តសាស្ត្រព្រះវិហារធំសសរ១០០ ជាដើមនោះ ត្រូវបានជន់លិច និងផ្អាកសកម្មភាពបណ្ដោះអាសន្នហើយ ។
អាជីវករលក់ដូរនៅតាមតំបន់ទាំងនេះនិយាយថា ជារៀងរាល់ឆ្នាំនារដូវវស្សា ស្ថានភាពភ្ញៀវត្រូវស្ងប់ស្ងាត់ទាំងភ្ញៀវខ្មែរ និងភ្ញៀវបរទេស ។ ដោយសារតែតំបន់រមណីយដ្ឋានទាំងនោះត្រូវលិចលង់ និងបាត់បង់សោភ័ណភាព គឺមើលឃើញតែផ្ទៃទឹកទន្លេ ដែលមានសភាពល្អក់ល្វឹងល្វើយ ដូច្នេះហើយបានជាត្រូវផ្អាកសកម្មភាពជាបណ្ដោះអាសន្ន ។
ជាមួយនឹងការជន់លិចនេះ បានធ្វើឲ្យសហគមន៍ទេសចរណ៍ព្រួយបារម្ភពីការបាត់ចំណូលរយៈពេលយូរក្នុងរដូវវស្សាឆ្នាំនេះផងដែរ ព្រោះតែស្ថានភាពទឹកជំនន់ឆ្នាំនេះបានជន់ឡើងខ្លាំងតាំងពីដើមឆ្នាំ និងមានរយៈពេលយូរជាងរាល់ឆ្នាំ ។ ក្នុងនោះមានដូចជា ក្រុម សហគមន៍ទូកចម្លង, សហគមន៍លក់ឈើចម្លាក់នៅក្នុងតំបន់ទេសចរណ៍អន្លង់ផ្សោត និងក្រុមសហគមន៍លក់ម្ហូបអាហារនៅរមណីយដ្ឋានទឹកជួរទន្លេមេគង្គកាំពី ជាដើម ។
អ្នកបើកទូកចម្លងដឹកភ្ញៀវទេសចរទៅមើលផ្សោតនៅរមណីយដ្ឋានអន្លង់ផ្សោត លោក មួង កាឡាយ បានឲ្យដឹងនៅថ្ងៃទី៩ សីហា ថា ការប្រកបរបរដឹកភ្ញៀវរបស់ពួកគាត់នៅរដូវវស្សានេះ មិនសូវបានចំណូលនោះទេ ដោយសារតែមិនសូវសម្បូរភ្ញៀវ ។ ម្យ៉ាងទៀត បើមានភ្ញៀវជិះទូកទៅមើលផ្សោត ក៏ត្រូវទៅមើលនៅតំបន់ឆ្ងាយៗ ដោយត្រូវចំណាយប្រេងទូកច្រើនស្ទើរមិនរួចនឹងកម្រៃដែលបានមកវិញ ។ លោកថា ៖« ការបើកទូកជូនភ្ញៀវដេញតាមមើលផ្សោតក៏ជួបការលំបាក ដោយសាររដូវនេះ អាកាសធាតុមានភ្លៀងធ្លាក់ និងខ្យល់បក់ខ្លាំង ដូច្នេះហើយបានជាគេមិនសូវមក » ។
បុរសរូបនេះបានកត់សម្គាល់ថា ឆ្នាំនេះស្ថានភាពទឹកជំនន់បានជន់ឡើងខ្លាំងតាំងពីដើមរដូវ និងមានរយៈពេលយូរ ដែលធ្វើឲ្យតាមបណ្ដាសហគមន៍មិនសូវរកចំណូលបាន ព្រោះភ្ញៀវទេសចរធ្លាក់ចុះ ។ បើទោះជាបែបណា មន្ត្រីនៃមន្ទីរទេសចរណ៍ខេត្តក្រចេះបានវាយតម្លៃថា ស្ថានភាពរដូវ វស្សាឆ្នាំនេះ ចំនួនភ្ញៀវទេសចរមិនសូវធ្លាក់ចុះដូចឆ្នាំរាល់ដងនោះទេ ។ មន្ត្រីរូបនេះថា រដូវទឹកឡើង ក៏ជាអំណោយផលល្អមួយរបស់ភ្ញៀវក្នុងគោលដៅទៅកាន់អន្លង់ផ្សោតដែរ គឺអាចទៅទស្សនាសត្វផ្សោតពីលើច្រាំងទន្លេបាន គ្រាន់តែឆ្នាំនេះ ស្ថានភាពទឹកជំនន់បានជន់ឡើងខ្លាំងជាងឆ្នាំរាល់ដង ។ បើតាមមន្ត្រីទេសចរណ៍រូបនេះថា ៖«សព្វថ្ងៃ ពលរដ្ឋជាង៣០០គ្រួសាររស់នៅក្នុងឃុំសំបុក បានទទួលចំណូលពីសហគមន៍ទេសចរណ៍ទាំងនេះ » ៕
ចែករំលែកព័តមាននេះ