ខេត្តសៀមរាប ៖ នៅវេលាម៉ោងប្រមាណជាង៣រសៀល ថ្ងៃទី០៩ ខែសីហា ឆ្នាំ២០១៨ មានករណីគ្រោះថ្នាក់ចរាចរណ៍មួយបានកើតឡើងនៅចំណុចលើផ្លូវជាតិលេខ៦ ពីខាងកើតស្ពាន បឹងក្រមោល៥ម៉ែត្រ ស្ថិតក្នុងភូមិគោកអំពិល ឃុំល្វែងឬស្សី ស្រុកជីក្រែង ខេត្តសៀមរាប រវាងរថយន្តស៊ីតែនដឹកសាំងបើកបរក្នុងល្បឿនលឿនមិនប្រយ័ត្នពន្លះជាមួយនឹងគោយន្តកែច្នៃដាក់ម៉ាស៊ីនកិនស្រូវពេញទំហឹង ។
តាមប្រភពពីលោកវរសេនីយ៍ឯក សុខ សុទ្ធាវុធ អធិការដ្ឋាននគរបាលស្រុកជីក្រែងបានប្រាប់នៅព្រឹកថ្ងៃទី១០ ខែសីហា ឆ្នាំ២០១៨ នេះថា មុនពេលកើតហេតុគឺមានពលរដ្ឋបានរាយការណ៍មកនគរបាលមូលដ្ឋានដើម្បីឱ្យជួយអន្តរាគមន៍ថា មានរថយន្តស៊ីតែនដឹកសាំង ក្បាលសណ្តោងពណ៌ស ពាក់ស្លាកលេខ ភ្នំពេញ 3E-0279 បើកបរពីទិសខាងលិចទៅខាងកើតគឺធ្វើដំណើរចេញពីខេត្តសៀមរាបឆ្ពោះទៅរាជធានីភ្នំពេញ បើកបរក្នុងល្បឿនលឿនហើយមិនបានប្រុងប្រយ័ត្ន លុះដល់ចំណុចកើតហេតុបានបុកគោយន្តកែច្នៃដាក់ម៉ាស៊ីនកិនស្រូវ ពាក់ស្លាកលេខ ស្វាយរៀង 6A-1021 ពេញទំហឹងធ្វើឱ្យគោយន្តកែច្នៃធ្លាក់ទៅម្ខាងផ្លូវក្នុងស្រះឈូក ខណៈបើកបរមកពីទិសខាងត្បូងឡើងមកលើផ្លូវជាតិរួចបត់ស្ដាំទៅទិសខាងកើតបណ្ដាលឱ្យម្ចាស់រថយន្តកែច្នៃ២នាក់ប្តីប្រពន្ធស្លាប់ម្នាក់របួសធ្ងន់ម្នាក់ ។
លោកបានបញ្ជាក់ថា ជនរងគ្រោះទាំង២នាក់បុរសជាប្តីមានឈ្មោះ គាត គា អាយុ៤៤ឆ្នាំ (ស្លាប់) និងស្ត្រីជាប្រពន្ធឈ្មោះ ឈន ឃន់ អាយុ៤៥ឆ្នាំ បានទទួលរងរបួសធ្ងន់ ដែលមានទីលំនៅភូមិតាអុង ឃុំល្វែងឬស្សី ស្រុកជីក្រែង ខេត្តសៀមរាប ត្រូវបានដឹកទៅសង្គ្រោះនៅ ពេទ្យបង្អែក ស្រុកសូទ្រនិគម រីឯអ្នកបើកបររថយន្តស៊ីតែនដឹកសាំងបានចុះរត់គេចខ្លួនបាត់ក្រោយពីហេតុ ។ ក្រោយពេលកើតហេតុកម្លាំងជំនាញបានធ្វើការវាស់វែងដើម្បីកុំឱ្យកកស្ទះចរាចរណ៍ ។
បច្ចុប្បន្នរថយន្តបង្ក និងគោយន្តកែច្នៃជនរងគ្រោះត្រូវបានកម្លាំងជំនាញអូស និងស្ទួចយកទៅរក្សាទុកនៅអធិការដ្ឋាននគរបាលស្រុកជីក្រែងដើម្បីដោះស្រាយទៅតាមផ្លូវច្បាប់ ។ ចំណែកសពជនរងគ្រោះត្រូវបានប្រគល់ឱ្យក្រុមគ្រួសារយកធ្វើបុណ្យតាមប្រពៃណី ៕
ចែករំលែកព័តមាននេះ