រាជធានីភ្នំពេញ ៖ មន្ត្រីយោធាដែលកំពុងបំពេញបេសកកម្មក្រោមឆ័ត្រអ.ស.បបានបញ្ជាក់តាមសារអេឡិចត្រូនិចថា តំណាងអង្គការសហប្រជាជាតិនៅថ្ងៃទី0៩ ខែសីហា ឆ្នាំ២០១៨ បំពាក់មេដាយការងាររក្សាសន្តិភាពដល់កងកម្លាំងមួកខៀវកម្ពុជាចំនួន១៨៤នាក់ ដែលកំពុងបំពេញបេសកកម្មរបស់អង្គការសហប្រជាជាតិ នៅសាធារណៈរដ្ឋលីបង់ លើផ្នែកវិស្វកម្ម និងបោសសម្អាតមីន ។
បើតាមលោកវរសេនីយ៍ឯក ម៉ន ខ័នឫទ្ធី មេបញ្ជាការកងកម្លាំងវិស្វកម្មលេខ៩៦៣ ក្នុងបេសកកម្មអង្គការសហប្រជាជាតិនៅប្រទេសលីបង់បានប្រាប់អ្នកសារព័ត៌មានឲ្យដឹងថា កម្លាំងមួកខៀវកម្ពុជាទាំង១៨៤នាក់ កំពុងបំពេញការងាររក្សាសន្តិភាពនៅលីបង់ គឺត្រូវបានបំពាក់មេដាយការងាររក្សាសន្តិភាពកាលពីថ្ងៃទី០៨ ខែសីហា ឆ្នាំ២០១៨ នៅទីបញ្ជាការរបស់អង្គការសហប្រជាជាតិប្រចាំប្រទេសលីបង់ ។ លោកបញ្ជាក់ថា ការបំពាក់មេដាយការងារនេះ បង្ហាញឲ្យឃើញថា អង្គការសហប្រជាជាតិ គឺបានយកចិត្តទុកខ្ពស់មកលើការងារបំពេញបេសកកម្មរបស់កម្លាំងមួកខៀវកម្ពុជាក្នុងប្រទេសលីបង់ ។
លោកវរសេនីយឯក ម៉ន ខ័នឫទ្ធី បានឲ្យដឹងទៀតថា កម្លាំងមួកខៀវកម្ពុជា បំពេញបេសកកម្មនៅប្រទេសលីបង់ គឺមានចំនួន១៨៤នាក់ ទាំងកម្លាំងវិស្វកកម្ម និងកម្លាំងដោះមីន ។ ការងារប្រតិបត្តិការរាល់ថ្ងៃ គឺដោះមីន ដើម្បីសាងសង់ព្រំដែនសីមារវាងប្រទេសអ៊ីស្រាអែល និងប្រទេសលីបង់ ។ ជាមួយគ្នាកម្លាំងមួកខៀវកម្ពុជា គឺទទួលបានស្នាដៃដ៏ធំធេងនៃបេសកកម្មនេះ ។ តំណាងអង្គការសហប្រជាជាតិប្រចាំបេសកកម្ម UNIFIL បានថ្លែងថា «កម្ពុជាបានបញ្ជូនកម្លាំងទាំង១៨៤នាក់ទៅកាន់ប្រទេសលីបង់ គឺកម្ពុជាបានបង្ហាញអំពីការប្តេជ្ញាចិត្តយ៉ាងមុតមាំរបស់ខ្លួន ក្នុងការគាំទ្រដល់ប្រតិបត្តិការសន្តិភាពរបស់អង្គការសហប្រជាជាតិ ដើម្បីដោះស្រាយជម្លោះដ៏ស្មុគស្មាញ និងការពារជនស៊ីវិលដែលជាភារកិច្ចដ៏សំខាន់បំផុត និងជាសក្ខីភាពជាក់ស្តែងផងដែរ» ។
លោកបន្តថា ពីមុនកងរក្សាសន្តិភាពរបស់អង្គការសហប្រជាជាតិបញ្ជូនទៅកាន់កម្ពុជាតែឥឡូវនេះកម្ពុជាបានប្រែក្លាយជាប្រទេសមួយបញ្ជូនកងកម្លាំង និងក្រុមជំនាញចូលរួមប្រតិបត្តិការរក្សាសន្តិភាព ក្នុងនាមមនុស្សធម៌ ។ លោក កាមាល់ អាហ្គូស្ទីន តំណាងអគ្គកុងស៊ុលកម្ពុជាប្រចាំប្រទេសលីបង់ ដែលបានចូលរួមបំពាក់មេដាយ ដល់កម្លាំងមួកខៀវកម្ពុជាផងដែរនោះបានថ្លែងថា «កម្លាំងមួកខៀវកម្ពុជា ពិតជាមានស្នាដៃដ៏ធំធេងលើឆាកអន្តរជាតិ ដែលមានកងកម្លាំងវិស្វកម្ម កងបោសសម្អាតមីន កងកម្ទេចយុទ្ធភ័ណ្ឌមិនទាន់ផ្ទុះកងកម្លាំងអាវុធហត្ថ និងកងពេទ្យកំពុងចូលរួមយ៉ាងសកម្មជាមួយបណ្តាកងកម្លាំងរក្សាសន្តិភាពពីប្រទេសដទៃទៀត» ។
គួរបញ្ជាក់ឲ្យដឹងដែរថា កងកម្លាំងវិស្វកម្មលេខ៩៦៣ ជាកងលើកទី៨ ហើយដែលកម្ពុជាបានបញ្ជូនកម្លាំងទៅកាន់សាធារណរដ្ឋលីបង់ ក្នុងបេសកកម្មរបស់អង្គការសហប្រជាជាតិ ។ ហើយកម្លាំងនេះបានបញ្ជូនចេញពីកម្ពុជាកាលពីដើមខែមករា ឆ្នាំ២០១៨ ៕
ចែករំលែកព័តមាននេះ