ខេត្តមណ្ឌលគិរី ៖ មុខសញ្ញាចាស់និងថ្មីចំនួន២នាក់ ដែលប្រកបររបរជួញដូរសាច់សត្វព្រៃនៅក្រុងសែនមនោរម្យ ត្រូវបានសមត្ថកិច្ចបង្ក្រាប កាលពីថ្ងៃទី៨ សីហា នៅក្នុងផ្សារក្រុងសែនមនោរម្យ ។សមត្ថកិច្ចបានឲ្យដឹងថា ក្រុមអន្តគមន៍បង្ក្រាបបទល្មើសសត្វព្រៃចល័តនៃរដ្ឋបាលព្រៃឈើ…
ខេត្តមណ្ឌលគិរី ៖ មុខសញ្ញាចាស់និងថ្មីចំនួន២នាក់ ដែលប្រកបររបរជួញដូរសាច់សត្វព្រៃនៅក្រុងសែនមនោរម្យ ត្រូវបានសមត្ថកិច្ចបង្ក្រាប កាលពីថ្ងៃទី៨ សីហា នៅក្នុងផ្សារក្រុងសែនមនោរម្យ ។សមត្ថកិច្ចបានឲ្យដឹងថា ក្រុមអន្តគមន៍បង្ក្រាបបទល្មើសសត្វព្រៃចល័តនៃរដ្ឋបាលព្រៃឈើ សហការជាមួយកងរាជអាវុធហត្ថលើផ្ទៃប្រទេស អង្គការសម្ព័ន្ធមិត្តសត្វព្រៃ និងផ្នែករដ្ឋបាលព្រៃឈើសែនមនោរម្យ បានចុះចាប់នៅទី តាំងចំនួន២ ។
ក្រុមចម្រុះបាន ប្រមូលសាច់សត្វព្រៃប្រមាណ៦៧,៧គីឡូក្រាម និងឃាត់ខ្លួនអ្នកលក់ដូរសាច់សត្វព្រៃចំនួន២នាក់ ។សមត្ថកិច្ចបន្តថា ទីតាំងទី១នៅចំណុចផ្សារគុម្ពឫស្សីមានម្ចាស់ឈ្មោះ សោម គឹមសាង ភេទស្រី អាយុ២៩ឆ្នាំ មុខរបរលក់ដូរ ស្ថិតនៅភូមិកណ្តាល សង្កាត់ស្ពានមានជ័យ ក្រុងសែនមនោរម្យ ជាមុខសញ្ញាចាស់ដែលសមត្ថកិច្ចធ្លាប់បង្ក្រាបកាលពី៥ខែមុន និងម្នាក់ទៀតឈ្មោះ សាំង វុទ្ធី ភេទប្រុស មានទីលំនៅភូមិដើមស្រល់ សង្កាត់មនោរម្យ ។
មន្ត្រីជំនាញឲ្យដឹងថា សត្វព្រៃដែលចាប់រួមមាន កាំប្រម៉ា៧,២០គីឡូក្រាម, សាច់ជ្រូកព្រៃជាង៤០គីឡូក្រាម, ក្តាន់ញ៉ែង៥ក្បាលស្មើនឹង៧,៥០គីឡូក្រាម, សាច់ឈ្លូស១៦គីឡូក្រាម, ក្រពះប្រម៉ាចំនួន២ ។ បច្ចុប្បន្ន អ្នកលក់ដូរសាច់សត្វព្រៃទាំង២នាក់ ត្រូវបានសមត្ថកិច្ចជំនាញធ្វើការពិន័យជាមួយទឹកប្រាក់សរុបចំនួន ៧លាន៥សែន៤ម៉ឺន៤ពាន់រៀល រួចធ្វើការដោះលែងឲ្យទៅផ្ទះវិញ ។ ចំណែកសាច់សត្វព្រៃបញ្ជូនទៅខណ្ឌរដ្ឋបាលព្រៃឈើ ខេត្តមណ្ឌលគិរី ដើម្បីដុតកម្ចេចចោល ។
លោក ជ័យ សុខា នាយផ្នែករដ្ឋបាលព្រៃឈើសែនមនោរម្យបានឲ្យដឹងថា ចំពោះស្ត្រីខាងលើមិនត្រូវបានបញ្ជូនទៅសាលាដំបូងទេ ព្រោះបទល្មើសនេះជាប្រភេទសត្វព្រៃធម្មតា ដោយមិនចាត់ចូលជាប្រភេទសត្វកម្រ ។លោកនាយផ្នែកបញ្ជាក់ថា ករណីនេះត្រឹមតែពិន័យអន្តរកាលប៉ុណ្ណោះ ។ប្រជាពលរដ្ឋរស់នៅក្រុងសែនមនោរម្យបាននិយាយថា ទីតាំងផ្ទះស្ត្រីឈ្មោះ សោម គឹម សាង បានលួចរកស៊ីលក់សត្វព្រៃរាប់ឆ្នាំមកហើយមិនដែលឃើញមានសមត្ថកិច្ចក្នុងខេត្តណាម្នាក់ចេញមុខបង្ក្រាបទេ ទើបតែពេលនេះមានអង្គការវ៉ាយអេត ចុះចាប់បង្ក្រាបបាន២លើក តែមិនព្រមឈប់ប្រកបរបរខុសច្បាប់នេះទេ ព្រោះមុខរបរនេះកាក់កបពេក ។
មហាជនបានស្នើដល់អង្គភាពជំនាញពាក់ព័ន្ធគួរចាត់វិធានការផ្លូវច្បាប់ ចំពោះបុគ្គលដែលមិនរាងចាលក្នុងការរកស៊ីសត្វព្រៃខុសច្បាប់ បើមិនដូច្នោះទេ ពួកគាត់នៅតែប្រព្រឹត្តសកម្មភាពដដែលដូចវែកចក ។ ជាការពិតណាស់ រាល់ការបង្ក្រាបក្រៅពីការផាកពិន័យក៏ត្រូវឱ្យធ្វើកិច្ចសន្យាដែរ គឺបញ្ឈប់ជំនួញដែលច្បាប់ហាម ឃាត់ ហើយពុំដូច្នោះទេត្រូវប្រឈមនឹងច្បាប់ ប៉ុន្តែទោះបីចាប់ក្រោយមកទៀតក៏នៅតែផាកពិន័យដដែល សួរថា តើមានន័យបែបណា ? ការនិយាយនេះមិនមានគោលបំណងចង់ឱ្យនរណាជាប់គុកច្រវាក់នោះទេ តែដើម្បីប្រសិទ្ធភាពក្នុងការការពារជីវិតសត្វព្រៃ គប្បីវះកាត់ខ្លះទើបការពារបាន បើពុំនោះទេសត្វព្រៃកាន់តែវិនាសហិនហោច ៕
ចែករំលែកព័តមាននេះ