រាជធានីភ្នំពេញ ៖ សត្វព្រាបរាប់រយក្បាលតែងតែចុះរកចំណីនៅមុខព្រះបរមរាជវាំង។ សត្វព្រាបទាំងនោះមួយចំនួនហោះហើរពីកន្លែងផ្សេងៗ និងមួយចំនួនទៀតត្រូវគេយកលែងនៅខាងមុខព្រះអង្គដង្កើក្បែរមាត់ទន្លេខាងមុខព្រះបរមរាជវាំងដែលជាទីកន្លែងបួងសួង ។
បច្ចុប្បន្នសត្វព្រាបទាំងអស់នោះរស់នៅក្នុងបរិវេណព្រះបរមរាជវាំង គឺជាទីជម្រកដ៏សុខសាន្តរបស់ពួកវា ។ សត្វព្រាបទាំងអស់នោះបានស៊ាំជាមួយមនុស្សទៅហើយ ដូច្នេះហើយវាមិនទៅឆ្ងាយពីមនុស្សឡើយ ព្រោះមនុស្សជាអ្នកដាក់ចំណីឲ្យវាស៊ី ។ មិនថាតែភ្ញៀវទេសចរបរទេស ឬជាមហាជនខ្មែរនោះទេ នៅពេលដើរលេងនៅខាងមុខព្រះបរមរាជវាំង តែងតែទិញគ្រាប់ពោត គ្រាប់សណ្តែកឲ្យសត្វព្រាបទាំងនោះស៊ី និងបានថតរូបទុកជាអនុស្សាវរីយ៍ជាមួយហ្វូងព្រាបនោះ ។
អ្នកស្រីសេង ផល្លា វ័យជិត៦០ឆ្នាំដែលតែងតែដើរហាត់ប្រាណមុខព្រះបរមរាជវាំងបាននិយាយឲ្យដឹងកាលពីពេលថ្មីៗកន្លងមកថា ការឲ្យចំណីសត្វព្រាបដូចជាធ្វើបុណ្យដាក់ទាន ។ ធ្វើបុណ្យដាក់ទានដល់មនុស្សលោកក៏យើងធ្វើ ពេលជួបសត្វព្រាបទាំងអស់នេះយើងក៏ធ្វើបុណ្យដោយទិញគ្រាប់ពោត និងគ្រាប់សណ្តែកឲ្យពួកវាស៊ី ។ ម្យ៉ាងវិញទៀតដូចជាសប្បាយភ្នែក និងមានអារម្មណ៍ល្អ ពេលដែលឃើញហ្វូងសត្វដ៏ច្រើនលើសលុបមកនៅក្បែរយើង ហើយនាំគ្នាចឹកចំណីដោយមិនខ្វល់ពីមនុស្សនៅក្បែរវានោះទេ ។
ភ្ញៀវបរទេសគេក៏នាំគ្នាថតរូបជាមួយហ្វូងសត្វព្រាបទុកជាអនុស្សវរីយ៍ដោយសប្បាយរីករាយ និងកោតសរសើរអាជ្ញាធរខ្មែរដែលខិតខំថែរក្សាសត្វព្រាបតាំងពីបួនដប់ក្បាលរហូត មកដល់បច្ចុប្បន្នមានរាប់រយក្បាលនិងមិនខ្លាចមនុស្សទៀតផង ។
កម្លាំងប្រជាការពារខណ្ឌដូនពេញដែលប្រចាំការនៅមុខព្រះបរមរាជវាំងឲ្យដឹងថា ពេលវេលាដែលសត្វព្រាបចុះច្រើននោះ គឺនៅវេលាម៉ោង៦ព្រឹករហូតដល់ម៉ោង១០ព្រឹក និងពេលល្ងាចវាចុះនៅម៉ោង៤រហូតដល់ព្រលប់ ។ នៅពេលល្ងាចសត្វព្រាបចុះច្រើនជាងពេលព្រឹកទំនងជាវាគិតថាមានមនុស្សម្នាដើរលេងច្រើនហើយដាក់ចំណីឲ្យវាស៊ីច្រើនដែរ ។ នៅពេលវាស៊ីឆ្អែតហើយសត្វព្រាបទាំងនោះបានហើរទៅដេកនៅក្នុងបរិវេណព្រះបរមរាជវាំង ប៉ុន្តែភាគច្រើនវាដេកនៅលើដំបូល និងខាងក្នុងប្រាសាទចន្ទឆាយា ដែលនៅខាងមុខជាប់ផ្លូវ ។ អ្វីដែលធ្វើឲ្យមន្ត្រីព្រះរបមរាជវាំងព្រួយបារម្ភនោះគឺលាមកព្រាបជុះដាក់លើដំបូល ឬខាងក្នុងប្រាសាទ និងនៅក្នុងព្រះបរមរាជវាំងធ្វើឲ្យខូច ឬក៏ប៉ះពាល់ដល់ប្រាសាទទាំងនោះ ។
សត្វព្រាបទាំងនោះជាផ្នែកមួយក្នុងការទាក់ទាញភ្ញៀវទេសចរ ព្រោះជារៀងរាល់ល្ងាចមានសត្វព្រាបរាប់ពានក្បាលនាំគ្នាចុះខាងមុខព្រះបរមរាជវាំង ហើយមនុស្សម្នាជាច្រើនអង្គុយមើល អ្នកខ្លះថតរូបជាមួយហ្វូងសត្វព្រាបទុកជាអនុស្សាវរីយ៍ ព្រមទាំងទេសភាពនៅមុខព្រះបរមរាជវាំង ។ មានអ្នកខ្លះទិញគ្រាប់ពោត គ្រាប់សណ្តែកបោះឲ្យពួកវាស៊ីផងដែរ ។
លោកហ៊ឹម វាសនា រស់នៅក្នុងខណ្ឌដូនពេញនិយាយថា លោកតែងតែនាំកូនទៅបាចចំណីឲ្យព្រាបជារៀងរាល់ល្ងាច ទីមួយលោកចង់ឲ្យកូនលំហែកាយ និងទីពីរគឺលោកនាំកូនឲ្យមកលេងជាមួយសត្វព្រាប និងទីបីការសន្តោសប្រណីជាមួយសត្វ ។
បើតាមលោកហ៊ឹម វាសនា យល់ថាការរក្សាសត្វព្រាបទាំងនេះវាបានទាក់ទាញភ្ញៀវទេសចរយ៉ាងច្រើនដែលពេលណាគេទៅកម្សាន្តនៅរាជធានីភ្នំពេញ គេមិនដែលរំលងទៅលេងមុខព្រះបរមរាជវាំងទេ ដោយសារតែចង់ឃើញសត្វព្រាប ។
លោកសាន គឹមសុខ រស់នៅខេត្តស្វាយរៀងដែលនាំក្រុមគ្រួសារដើរកម្សាន្តនៅមុខព្រះបរមរាជវាំងបានលើកឡើងថា បើសិនជាអាជ្ញាធរក្រុងភ្នំពេញមានចេតនាចង់លុបបំបាត់សត្វព្រាបរាប់រយក្បាលដែលកំពុងរស់នៅក្នុងព្រះបរមរាជវាំងនោះ លោកសោកស្តាយពន់ពេក ព្រោះថាពេលបច្ចប្បន្នេះសត្វព្រាបកើនឡើងលំដាប់ និងធ្វើឲ្យភ្ញៀវជាតិ និងអន្តរជាតិចាប់អារម្មណ៍ខ្លាំង។ សត្វព្រាបទាំងនោះវាបានស៊ាំជាមួយមនុស្សទៅហើយ វាមិនដឹងទៅណាឆ្ងាយពីមនុស្សនោះទេ គឺវានៅ ក្បែរៗមនុស្សព្រោះវាដឹងថាមនុស្សតែងតែបាចចំណីឲ្យវាស៊ីជារៀងរាល់ថ្ងៃ ។ មានសត្វព្រាបខ្លះទៀតហ៊ានហើរចឹកចំណីពីដៃមនុស្សទៀតផង ។
លោកគឹម សុខ និយាយថា«នៅមុខព្រះបរមរាជវាំងនាពេលបច្ចុប្បន្នជាកន្លែងទស្សនាសត្វព្រាបដ៏ប្រណីតមួយនៅព្រះរាជាណាចក្រកម្ពុជា ហើយហ្វូងសត្វទាំងនេះវាបានទាក់ទាញភ្ញៀវជាតិ និងអន្តរជាតិយ៉ាងខ្លាំងពីមួយថ្ងៃទៅមួយថ្ងៃ ដូច្នេះសុំឲ្យអាជ្ញាធរមេត្តាបន្តភិរក្សសត្វព្រាបឲ្យកាន់កើនឡើងទៅមុខទៀត »៕
ចែករំលែកព័តមាននេះ