ខេត្តស្វាយរៀង ៖ បុរសម្នាក់ជាជាងជួសជុលរថយន្តផឹកជាមួយគ្នាខឹងបុរសម្នាក់ទៀតនិយាយបង្អាប់ថាជួសជុលរថយន្តមិនល្អ ស្រាប់តែជនសង្ស័យខឹងស្ទុះទាញបានខ្វែវមកកាប់ជនរងគ្រោះបណ្តាលឱ្យរងរបួសធ្ងន់តែម្តង ។ ហេតុការណ៍នេះបានកើតឡើងកាលពីវេលាម៉ោង៨និង១៥នាទីយប់ថ្ងៃទី៩ ខែសីហា ឆ្នាំ២០១៨ ស្ថិតក្នុងភូមិព្រៃឆ្លាក់សង្កាត់ព្រៃឆ្លាក់ ក្រុងស្វាយរៀង ខេត្តស្វាយរៀង។
យោងតាមសមត្ថកិច្ចបានឲ្យដឹងថា ជនសង្ស័យឈ្មោះ ព្រំ សុផាត ហៅឌឿ ភេទប្រុស អាយុ២២ឆ្នាំ មុខរបរជាងជួសជុលរថយន្ត រស់នៅភូមិព្រៃឆ្លាក់ សង្កាត់ព្រៃឆ្លាក់ ក្រុងស្វាយរៀង ចំណែកជនរងគ្រោះឈ្មោះ នឹម ជុន ភេទប្រុស អាយុ៣៨ឆ្នាំ មុខរបរជាអ្នកហៅម៉ូយតាក់ស៊ី មានទីលំនៅភូមិព្រៃឆ្លាក់ សង្កាត់ព្រៃឆ្លាក់ ក្រុងស្វាយរៀង ។
សមត្ថកិច្ចបានឱ្យដឹងថា ករណីបណ្តាលឱ្យមានអំពើហិង្សានេះកើតឡើង គឺជនសង្ស័យ និងជនរងគ្រោះបានផឹកស្រាជាមួយគ្នាលុះស្រវឹងក៏ទាស់ពាក្យសំដីគ្នា ដោយជនរងគ្រោះបាននិយាយបង្អាប់ជនសង្ស័យថាជួសជុលរថយន្តមិនល្អ ពេលនោះជនសង្ស័យខឹងបានធ្វើសកម្មភាពយកខ្វែវកាប់ទៅលើជនរងគ្រោះត្រូវចំម្រាមដៃ កដៃខាងឆ្វេង និងធ្លាយពោះផ្នែកខាងឆ្វេង បណ្តាលឱ្យរងរបួសយ៉ាងធ្ងន់ ហើយត្រូវបានគេបញ្ជូនជនរងគ្រោះទៅសង្គ្រោះនៅមន្ទីរពេទ្យរាជធានីភ្នំពេញ។
បច្ចុប្បន្ន ជនសង្ស័យត្រូវបានឃាត់ខ្លួននៅអធិការដ្ឋាននគរបាលក្រុងស្វាយរៀងដើម្បីចាត់បន្តតាមនីតិវិធី៕
ចែករំលែកព័តមាននេះ