រាជធានីភ្នំពេញ ៖ បុរសជាជនសង្ស័យ២នាក់ត្រូវបានសមត្ថកិច្ចចំនួន២ខណ្ឌសហការគ្នាដេញប្រមាញ់ផ្អើលក្រុងភ្នំពេញ ដោយសង្ស័យថាជាក្រុមដៃស្អិតជំនាញខាងឆក់ ហើយសមត្ថកិច្ចឃាត់សួរនាំមិនព្រមឈប់ បែរជាបន្ថែមល្បឿនបើកគេចខ្លួន។ ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង១២និង៣០រំលងអធ្រាត្រឈានចូលថ្ងៃទី១០ ខែសីហា នៅជិតនិងសួនច្បារវត្តបទុមវតី ផ្លូវព្រះបាទសុរាម្រិត សង្កាត់ចតុមុខ ខណ្ឌចំការមន។
បុរសជាជនសង្ស័យទាំង២នាក់ខាងលើមិនទាន់ត្រូវបានស្គាល់អត្តសញ្ញាណនៅឡើយទេ ជិះម៉ូតូមួយគ្រឿង ម៉ាកហុងដាឌ្រីម ស៊េរីឆ្នាំ២០០៩ ពណ៌ខ្មៅ ។
បើតាមប្រភពព័ត៌មានពីសមត្ថកិច្ចប៉ុស្តិ៍អូរបែកក្អមបានប្រាប់ឱ្យដឹងថា មុនមានការភ្ញាក់ផ្អើល គឺហេតុការណ៍នេះបានកើតឡើងនៅផ្លូវដួងងៀប សង្កាត់អូរបែកក្អម ខណ្ឌសែនសុខ ដោយកម្លាំងល្បាតប៉ុស្តិ៍ទទួលដំណឹងពីជនរងគ្រោះជាស្ត្រីម្នាក់ថាមានជនសង្ស័យជាបុរស២នាក់ធ្វើសកម្មភាពឆក់កាបូបគាត់បានសម្រេចហើយជិះម៉ូតូគេចខ្លួនទៅបាត់ ។
ប្រភពដដែលបានបន្តថា ភ្លាមៗនោះសមត្ថកិច្ចបានជិះម៉ូតូរកជនសង្ស័យទាំង២នាក់នោះតាមការរៀបរាប់របស់ជនរងគ្រោះ ក៏ប្រទះឃើញជនសង្ស័យ២នាក់មានភិនភាគដូចការរៀបរាប់របស់ជនរងគ្រោះ ពេលនោះសមត្ថកិច្ចបម្រុងឃាត់ខ្លួនសួរនាំដែរ តែជនសង្ស័យទាំង២នាក់នោះគ្រាន់តែឃើញសមត្ថកិច្ចភ្លាម ក៏បន្ថែមល្បឿនម៉ូតូបើករត់គេចខ្លួនយ៉ាងលឿន ក៏ត្រូវកម្លាំងល្បាតប្រដេញតាមរហូតដល់ខណ្ឌចំការមន ក៏ត្រូវបានកម្លាំងល្បាតប៉ុស្តិ៍ទំនប់ទឹកជួយសហការគ្នាដេញបង្ក្រាបផ្អើលពេញក្រុងភ្នំពេញ រហូតទៅដល់ជិតសួនច្បារវត្តបទុមវតី ផ្លូវព្រះបាទសុរាម្រិត សង្កាត់ចតុមុខ ខណ្ឌចំការមន ទើបឃាត់ខ្លួនបានទាំង២នាក់តែម្តង។
បន្ទាប់ពីឃាត់ខ្លួនបាន កម្លាំងសមត្ថកិច្ចប៉ុស្តិ៍ទំនប់ទឹកក៏ប្រគល់ជនសង្ស័យទាំង២នាក់នោះឱ្យទៅកម្លាំងសមត្ថកិច្ចប៉ុស្តិ៍អូរបែកក្អមចាត់ការបន្ត ដោយកម្លាំងនគរបាលបាននាំខ្លួនជនសង្ស័យទាំង២នោះយកទៅសួរនាំបន្តនៅអធិការដ្ឋានខណ្ឌសែនសុខ និងរកជនរងគ្រោះឱ្យមកដាក់ពាក្យបណ្ដឹង និងមើលភិនភាគជនសង្ស័យទាំង២នោះដើម្បីឱ្យដឹងថា ពិតជាបានធ្វើសកម្មភាពឆក់កាបូបរបស់ខ្លួនមែន ឬក៏មិនមែន ៕
ចែករំលែកព័តមាននេះ