ខេត្តកំពង់ធំ ៖ អំពើឆបោកយកមាស៤ជី ដូររូបចម្លាក់លោហធាតុគ្មានតម្លៃមួយ បានបង្កឲ្យមានការភ្ញាក់ផ្អើល កាលពីវេលាម៉ោង១១ព្រឹកថ្ងៃទី៨ សីហា នៅចំណុចភោជនីយដ្ឋានមួយកន្លែង នៅផ្លូវវាងទីរួមស្រុកស្ទោង ស្ថិតក្នុងភូមិសាមក្អោក…
ខេត្តកំពង់ធំ ៖ អំពើឆបោកយកមាស៤ជី ដូររូបចម្លាក់លោហធាតុគ្មានតម្លៃមួយ បានបង្កឲ្យមានការភ្ញាក់ផ្អើល កាលពីវេលាម៉ោង១១ព្រឹកថ្ងៃទី៨ សីហា នៅចំណុចភោជនីយដ្ឋានមួយកន្លែង នៅផ្លូវវាងទីរួមស្រុកស្ទោង ស្ថិតក្នុងភូមិសាមក្អោក ឃំុទ្រា ស្រុកស្ទោង ។
លោកវរសេនីយ៍ត្រី វ៉ន សុភ័ណ អធិការរងនគរបាលស្រុកស្ទោង ទទួលខាងព្រហ្មទណ្ឌបានឱ្យកោះសន្តិភាព ដឹង នៅព្រឹកថ្ងៃទី៩ សីហា ថា ករណីឆបោកខាងលើនេះ គឺយោងតាមបណ្តឹងរបស់ជនរងគ្រោះប្តីឈ្មោះ
បៀន ភី អាយុ៤៦ឆ្នាំ មានទីលំនៅភូមិស្ពានគ្រង ឃំុចំណាក្រោម ស្រុកស្ទោង និងប្រពន្ធឈ្មោះ រឿន ភី អាយុជាង៤០ឆ្នាំ មុខរបរកសិករ។
លោកបានឱ្យដឹងថា មុនពេលកើតហេតុ គឺកាលពីថ្ងៃទី៥ សីហា មានជនកំហូចពីរនាក់ បានជិះរថយន្តម៉ាកកាមរី ពណ៌ស្លែ មិនចាំស្លាកលេខប្រាប់ថា គេឈ្មោះ លី គឹមហេង ភេទប្រុស (មិនស្គាល់ទីលំនៅ) និងម្នាក់ទៀត មិនស្គាល់អត្តសញ្ញាណនោះទេ បានជិះរថយន្តចូលទៅក្នុងភូមិហើយ ក៏បានជួបពួកគាត់ទាំងពីរនាក់ប្តីប្រពន្ធ បានសួររកទិញដី និងរកទិញវត្ថុបុរាណ រួមមានដូចជាដុំកំបោ និងវត្ថុផ្សេងៗទៀត ។
បន្ទាប់ពីជជែកគ្នាយ៉ាងស៊ីជម្រៅរួចមក ភាគីទាំងពីរក៏បែកគ្នាទៅ ។ លុះដល់ព្រឹកថ្ងៃទី៨ សីហា ជនកំហូចទាំងនោះ ក៏បានប្រើល្បិចទូរស័ព្ទមកដោយប្រាប់ថា មានគេចង់លក់វត្ថុបុរាណរូបព្រះ និងមានព្រះសង្ឃរកទិញដោយឲ្យតម្លៃមួយម៉ឺនដុល្លារ ហើយបានហៅពួកគាត់ទាំងពីរនាក់ប្តីប្រពន្ធមកជួបនៅមុខស្ថានីយប្រេងសូគីម៉ិច ស្ថិតក្នុងភូមិកំពង់ក្ដី ឃំុកំពង់ចិនត្បូង រួចក៏បបួលគ្នាទៅមើលចម្លាក់ព្រះនោះ ដោយជនកំហូចម្នាក់ដើរតួជាអ្នកលក់ក្នុងតម្លៃ១០.០០០ដុល្លារ(មួយម៉ឺនដុល្លារ) ។ ចំណែកបក្សពួកម្នាក់ទៀត ធ្វើជាធ្នាក់និងធ្វើជាបបួលពួកគាត់ ទៅទិញចូលហ៊ុនគ្នា ។
ដោយសារមើលឃើញថា ចំណេញ ពួកគេគេដោះខ្សែ.ក និងចិញ្ចៀនឲ្យទៅអ្នកលក់ ហើយនិយាយថា នៅខ្វះលុយមួយចំនួនទៀត ក៏ប្រាប់ពួកគាត់២នាក់ប្តីប្រពន្ធថា មិនគ្រប់លុយទេ តើបងឯងមានលុយទេ ? ចេញខ្លះមក ហើយយករូបព្រះនេះទៅទុកចុះ ចាំយើងលក់បានចំណេញចែកគ្នាចាយ ។ ឮដូច្នោះពួកគាត់ទុកចិត្តស្តូក គាត់ជាប្តីបានដោះខ្សែ.កមាសទម្ងន់៤ជី ពី.កប្រពន្ធថែមឲ្យទៅជនកំហូចទាំងនោះ ។ ចំណែកក្រុមបោក នៅពេលបានមាស ហើយក៏បានប្រើល្បិចគេចខ្លួនបាត់អស់ទៅ នៅសល់រូបគ្មានតម្លៃទុកឱ្យ ។
ក្រោយពេលដឹងថា ចាញ់បោកគេ ក៏ស្រែកទ្រហោយំលែងអៀនខ្មាស ផ្អើលអ្នកភូមិក៏ដឹងដល់ប៉ុស្តិ៍ទើបខាងប៉ុស្តិ៍ហៅមកសួរនាំពីបញ្ហានេះ ដើម្បីស្រាវជ្រាវចាប់ខ្លួនជនកំហូចទាំងនោះយកមាសមកវិញ និងយកមកផ្តន្ទាទោសចំពោះមុខច្បាប់ ប៉ុន្តែចាប់ខ្យល់ ។
នេះជាមេរៀនសម្រាប់បងប្អូនប្រជាពលរដ្ឋ ដើម្បីការពារខ្លួនចំពោះអំពើឆបោកគ្រប់ប្រភេទ ដែលការឆបោកបែបនេះ កើតមានច្រើនមកហើយ ៕
ចែករំលែកព័តមាននេះ