រាជធានីភ្នំពេញ ៖ ទោះបីជាមិនបានបង្ហាញចំៗឈ្មោះយ៉ាងណាក្តី លោក សុខ ឥសាន អ្នកនាំពាក្យគណបក្សប្រជាជនកម្ពុជា បានអះអាងថា ការព្រួយបារម្ភរបស់ជនបរទេសមកលើស្ថានការណ៍នយោបាយនៅកម្ពុជាមួយចំនួនគឺមានគំនិត និងវប្បធម៌លូកដៃចូលកិច្ចកា រផ្ទៃក្នុងកម្ពុជា។ ការលើកឡើងរបស់អ្នកនាំពាក្យបក្សកាន់អំណាចនេះ ខណៈដែលបណ្តាប្រទេស មួយចំនួនបានសម្តែងក្តីបារម្ភចំពោះស្ថានការណ៍នយោបាយនៅកម្ពុជាក្រោយការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦កន្លងមកនេះ។
ករណីនេះត្រូវបានលោក សុខ ឥសាន បញ្ជាក់ ឲ្យដឹងនៅថ្ងៃទី៩ ខែសីហា ឆ្នាំ២០១៨ តាមប្រព័ន្ធតេឡេក្រាមថា «ដើម្បីមានលេសលូកដៃចូល កិច្ចការផ្ទៃក្នុងកម្ពុជា មានជនបរទេសមួយចំនួនបានសម្តែងការព្រួយបារម្ភពីបញ្ហាកម្ពុជា ដោយមិនគិតថាកម្ពុជាជារដ្ឋឯករាជ្យ មានអធិបតេយ្យ ហើយមិនគិតពីការគោរព អនុវត្ត តាមធម្មនុញ្ញ អសប ដែលហាមមិនឲ្យបណ្តាប្រទេសលូកដៃចូលកិច្ចការផ្ទៃក្នុង បណ្តាប្រទេស ផ្សេងជាសមាជិក អសប នោះទេ »។ លោកបានបន្តថា តាមការលើកឡើងរបស់ជនបរទេសខ្លះ ហាក់ដូចជាឈឺឆ្អាលនឹងរឿងកម្ពុជាណាស់ ឈឺឆ្អាលរឿងកម្ពុជាជាងប្រជាជនកម្ពុជាទៅទៀត។
ពួកគេធ្វើខ្លួនស្នេហាខ្មែរជាងខ្មែរ។ ប៉ុន្តែការនិយាយថាស្នហាខ្មែរជាងខ្មែរ វាគ្រាន់តែជាលេស ដើម្បី លូកដៃចូលកិច្ចការផ្ទៃក្នុងកម្ពុជា ដោយរំលោភឯករាជ្យ អធិបតេយ្យភាពកម្ពុជាតែប៉ុណ្ណោះ។ ជាមួយគ្នានោះដែរលោក សុខ ឥសាន ក៏បានលើកឡើងថា អាកប្បកិរិយារបស់ជនប រទេសបែបនេះ បង្ហាញឲ្យឃើញនូវគំនិតចក្រពត្តិនិយមនៅតែស្ថិតនៅក្នុងខួរក្បាល និងវប្ប ធម៌ចង់ឈ្លានពានគេឯងតែប៉ុណ្ណោះ។ លោកបន្ថែមថា ម្យ៉ាងទៀតជនបរទេសនោះច្រើនតែ ច្រណែននឹងនយោបាយការបរទេសកម្ពុជា ហើយចង់ដាក់គំនាបមកលើកម្ពុជា មិនឲ្យមានសិ ទ្ធិធ្វើអ្វីតាមសិទ្ធិស្វ័យសម្រេចរបស់ខ្លួនបាន ដោយសារតែប្រកាន់និន្នាការមនោគមន៍វិជ្ជា សកលលោក។
ការលើកឡើងរបស់អ្នកនាំពាក្យបក្សអំណាចនេះថា បរទេសទាំងនោះមាន ចេតនាមិនល្អមកលើកម្ពុជា។ លោកក៏បានគូសបញ្ជាក់ថា «បើគេពិតជាមានចេតនាល្អ ចំពោះកម្ពុជា គេគួរតែបង្កើនការជួយឧបត្ថម្ភគាំទ្រកម្ពុជាឲ្យស្មើ ឬលើសភាគីដៃគូម្ខាងទៀត ទើបត្រឹមត្រូវ មិនត្រូវរារាំង និងទប់ស្កាត់មិនចង់ឲ្យកម្ពុជាមានទំនាក់ទំនងជាមួយបណ្តាប្រទេស ក្រៅពីខ្លួនដើម្បីចង់យកកម្ពុជាធ្វើជាចំណាប់ខ្មាំងផ្តាច់មុខរបស់ខ្លួននោះទេ។ បើធ្វើបែបនេះ មិនខុសអីនឹងកូនក្មេងទាស់គ្នាហើយហាមមិនឲ្យអ្នកដទៃមានទំនាក់ទំនងជាមួយដៃគូទំនាស់នោះឡើយ »។
ជាងជាងនេះទៅទៀតអ្នកនាំពាក្យដដែលក៏បានសង្កត់ធ្ងន់ថា ជនបរទេសមិនគួរចេះ ឈឺឆ្អាលរឿងកម្ពុជាទេ គិតតែប្រទេសខ្លួនឯងទៅ មានសត្រូវជុំទិស ហើយភេរវកម្មនៅជាប់ខ្លួន មិនគិតបែរមកចេះគិតរឿងអ្នកដទៃដែលកំពុងមានសន្តិភាព ស្ថិរភាពនយោបាយ ប្រជាជនកំពុ ងសប្បាយរីករាយក្នុងជីវភាពរស់នៅប្រកបដោយក្តីសង្ឃឹមនោះឡើយ។ សូមជម្រាបថា ការលើកឡើងរបស់អ្នកនាំពាក្យគណបក្សកាន់អំណាចខណៈពេលដែលមានបណ្តាប្រទេសមួយចំនួនក៏ដូចជាជបរទេសមួយចំនួនបានសម្ដែងការសោកស្តាយចំពោះការបោះឆ្នោតនៅកម្ពុជា ថាជាការបោះឆ្នោតក្លែងក្លាយ មិនអាចទទួលយកបានដោយសារគ្មាន បក្សប្រឆាំងចូលរួមប្រកួតប្រជែង ទោះបីជាមានគណបក្សចំនួន១៩ចូលរួមប្រកួតប្រជែងក្តី៕
ចែករំលែកព័តមាននេះ