ខេត្តព្រៃវែង ៖ បុរសម្នាក់ចូលច្រៀងខារ៉ាអូខេយ៉ាងសប្បាយ ភ្លេចគិតម៉ូតូទុកនៅខាងក្រៅ ត្រូវជនសង្ស័យលួចយកទៅបាត់ ។ ហេតុការណ៍នេះបានកើតឡើងកាលពីវេលាម៉ោង១២និង៣០នាទីថ្ងៃត្រង់ថ្ងៃទី៨ ខែសីហា នៅ ហាងខារ៉ាអូខេមួយកន្លែងយីហោ…
ខេត្តព្រៃវែង ៖ បុរសម្នាក់ចូលច្រៀងខារ៉ាអូខេយ៉ាងសប្បាយ ភ្លេចគិតម៉ូតូទុកនៅខាងក្រៅ ត្រូវជនសង្ស័យលួចយកទៅបាត់ ។ ហេតុការណ៍នេះបានកើតឡើងកាលពីវេលាម៉ោង១២និង៣០នាទីថ្ងៃត្រង់ថ្ងៃទី៨ ខែសីហា នៅ ហាងខារ៉ាអូខេមួយកន្លែងយីហោ ស្រីទូច ដែលស្ថិតក្នុងភូមិប្របុសរលួយ ឃុំបន្ទាយចក្រី ស្រុកព្រះស្ដេច ខេត្តព្រៃវែង។
ជនសង្ស័យទាំង២នាក់ខាងលើដែលត្រូវសមត្ថកិច្ចឃាត់ខ្លួន ម្នាក់ឈ្មោះ ម៉េត ភាព ភេទប្រុស អាយុ២៤ឆ្នាំ រស់នៅភូមិមុន្នីសិលា ឃុំបន្ទាយចក្រី ស្រុកព្រះស្ដេច និងម្នាក់ទៀតឈ្មោះ ផន ចាន់រ៉ា(ហៅលាន) ភេទប្រុស អាយុ១៦ឆ្នាំ រស់នៅភូមិមុន្នីសិលា ឃុំបន្ទាយចក្រី ស្រុកព្រះស្ដេច ត្រូវជាក្មួយសាច់ថ្លៃរបស់ម្ចាស់ហាងខាងលើ។ ចំណែកម៉ូតូមួយគ្រឿងដែលត្រូវក្រុមជនសង្ស័យយកទៅនោះម៉ាកហុងដា ធុនC125 ស៊េរីឆ្នាំ២០១៥ ពណ៌ខ្មៅ គ្មានស្លាកលេខ ជាកម្មសិទ្ធិរបស់ជនរងគ្រោះឈ្មោះ ប៊ុត វណ្ណរ៉ា ភេទប្រុស អាយុ២០ឆ្នាំ រស់នៅភូមិដំរីស្លាប់ ឃុំបន្ទាយចក្រី ស្រុកព្រះស្ដេចខេត្តព្រៃវែង។
សមត្ថកិច្ចបានអោយដឹងថា មុនពេលកើតហេតុ បុរសជាម្ចាស់ម៉ូតូ និងមិត្តភក្តិ២ទៅ៣នាក់ បានជិះម៉ូតូមួយគ្រឿងខាងលើចូលទៅច្រៀងខារ៉ាអូខេនៅក្នុងហាងកន្លែងកើតហេតុ ដោយច្រៀងនៅក្នុងបន្ទប់ ហើយទុកម៉ូតូនៅខាងក្រៅក្នុងបរិវេណហាង ដោយពុំបានចាក់សោកម៉ូតូឡើយ លុះពេលច្រៀងបានជាង១ម៉ោង បុរសជាម្ចាស់ម៉ូតូបានចេញមកក្រៅនិយាយទូរសព្ទ័ ក៏ស្រាប់តែបាត់មិនឃើញម៉ូតូ ទើបមានការផ្អើលឆោឡោឡើង និងប្តឹងទៅសមត្ថកិច្ចឱ្យជួយអន្តរាគមន៍។
លោកវរសេនីយ៍ត្រី ជ័យ សេងហ៊ាង អធិការនគរបាលស្រុកព្រះស្តេច បានឱ្យដឹងថា ក្រោយពីទទួលបានពាក្យបណ្តឹងពីជនរងគ្រោះជាម្ចាស់ម៉ូតូភ្លាម លោកបានបញ្ជាកំលាំងនគរបាលប៉ុស្តិ៍រដ្ឋបាល និងកំលាំងស្រុកចុះស្រាវជ្រាវ និងស្ទាក់តាមគ្រប់គោលដៅ រហូតដល់វេលាម៉ោង៩និង៣០នាទីយប់ថ្ងៃដដែល ក៏ឃាត់ខ្លួនជនសង្ស័យបានចំនួន២នាក់ រួមជាមួយវត្ថុតាងម៉ូតូរបស់រងគ្រោះ នៅចំណុចផ្ទះឈ្មោះ សេង សុធា ភេទប្រុស អាយុ៣៤ឆ្នាំ ស្ថិតក្នុងភូមិពោធិថ្មី ឃុំកោះសំពៅ ស្រុកពាមជរ ខណៈពួកគេកំពុងផឹកស៊ី។
ក្រោយពីសមត្ថកិច្ចសាកសួរ ជនសង្ស័យទាំង២នាក់បានសារភាពថា ខ្លួនពិតជាបានលួចម៉ូតូខាងលើពិតប្រាកដមែន។ បច្ចុប្បន្ន ជនសង្ស័យទាំង២នាក់ត្រូវបានឃាត់ខ្លួននៅអធិការដ្ឋាននគរបាលស្រុកព្រះស្ដេច ដើម្បីកសាងសំណុំរឿងចាត់ការទៅតាមនីតិវិធី៕
ចែករំលែកព័តមាននេះ