ខេត្តកណ្តាល ៖ ដំណាំស្រូវ និងពោតក្រហមរបស់ប្រជាពលរដ្ឋក្នុងស្រុកលើកដែក , ខេត្តកណ្តាលមួយចំនួនតូច នៅតាមតំបន់ទំនាបត្រូវទឹកជំនន់លិចលង់រងការខូចខាត និងមួយចំនួនទៀត ខំប្រមូលផលយកមកដល់ផ្ទះហើយ បែរជាពួកឈ្មួញដើរប្រមូលទិញឲ្យតម្លៃថោកទៀត…
ខេត្តកណ្តាល ៖ ដំណាំស្រូវ និងពោតក្រហមរបស់ប្រជាពលរដ្ឋក្នុងស្រុកលើកដែក , ខេត្តកណ្តាលមួយចំនួនតូច នៅតាមតំបន់ទំនាបត្រូវទឹកជំនន់លិចលង់រងការខូចខាត និងមួយចំនួនទៀត ខំប្រមូលផលយកមកដល់ផ្ទះហើយ បែរជាពួកឈ្មួញដើរប្រមូលទិញឲ្យតម្លៃថោកទៀត ។
ប្រជាពលរដ្ឋបានឲ្យដឹងថា ពួកគាត់នៅក្នុងស្រុកលើកដែកនេះភាគច្រើនសុទ្ធតែជាអ្នកប្រកបមុខរបរដាំដំណាំស្រូវ និងពោត ចិញ្ចឹមជីវភាពគ្រួសារតាំងពីដូនតាមកម្ល៉េះ ដោយអ្នកខ្លះមានដី១ហិកតា ,២ហិកតា ,៣ហិកតា ,៤ហិកតា និង៥ហិកតាក៏មាន ។ ពលរដ្ឋបន្តថា ឆ្នាំនេះទាំងស្រូវ និងពោតមានផ្លែច្រើនជាងឆ្នាំមុនៗ ប៉ុន្តែមិនទាន់ទុំស្រួលបួលផង ស្រាប់តែជំនន់ទឹកភ្លៀង និងទឹកទន្លេមេគង្គគំហុកឡើងយ៉ាងលឿនបង្កឲ្យដំណាំរបស់ពួកគាត់នៅតាមតំបន់ទំនាបមួយចំនួនតូចរងនូវការលិចទឹក ។ ហេតុដូច្នេះហើយទើបពួកគាត់បង្ខំចិត្តនាំគ្នាសម្រុកប្រមូលផលទាំងស្រូវ និងពោតនៅស្ទើរ ព្រោះខ្លាចទឹកលិចចោលអត់ប្រយោជន៍ ។ តែទោះជាយ៉ាងណាក៏នៅតែទឹកលិចអស់ប្រហែល៣០ភាគរយ ប្រមូលផលបានយកមកផ្ទះបានប្រហែល៧០ ភាគរយ។
ពលរដ្ឋបានត្អូញត្អែថា ឆ្នាំនេះពួកគាត់ខាតចូលខ្យល់ហើយ ព្រោះទាំងស្រូវ និងពោតប្រមូលផលមកដល់ផ្ទះបែរជាឈ្មួញឲ្យតម្លៃត្រឹមតែ ៥៣០រៀលទៅ៦០០រៀល ក្នុងមួយគីឡូក្រាម ខណៈឆ្នាំមុនឈ្មួញទិញ៦០០រៀល ,៧០០រៀល រហូតដល់៨០០រៀលឯណោះ ។ ពលរដ្ឋបន្តទៀតថា ស្រូវ ពោតធ្លាក់ថ្លៃនេះដោយសារ តែគ្មានឈ្មួញក្រៅស្រុកចូលមកទិញ គឺមានតែឈ្មួញក្នុងស្រុក៣.៤ នាក់ប៉ុណ្ណោះដើរ ។ ហេតុដូច្នេះតម្លៃថ្លៃថោកនៅលើតែមាត់ឈ្មួញ៣.៤ នាក់នេះឯង ។
ប្រជាពលរដ្ឋសំណូមពរសូមឲ្យអាជ្ញាធរមន្ត្រីជំនាញពាក់ពន្ធ័ស្រុក,ខេត្តជាពិសេសរាជរដ្ឋាភិបាលមេត្តាជួយបញ្ចុះតម្លៃប្រេង សាំង ជី និងពូជឲ្យចុះថ្លៃផង ព្រោះឥឡូវនេះថ្លៃណាស់ ហើយសូមជួយរកទីផ្សារតម្លៃស្រូវ ពោតឲ្យប្រជាកសិករបានថ្លៃត្រឹមក្នុង១គីឡូក្រាម១០០០រៀល ឫ១២០០រៀលមក ទើបទូទាត់ថ្លៃប្រេង សាំង ជី ពូជ និងកម្មករទៅគ្រាន់នៅសល់ប្រាក់ខ្លះដោះស្រាយជីវភាពក្នុងគ្រួសារឲ្យកូនរៀនសូត្រ ។
ជាពិសេសកាត់បន្ថយការទៅចំណាក់ស្រុកគេបែកបាក់ក្រុមគ្រួសារ ណាមួយបើទុកដីទំនេរចោលវានាំឲ្យខូចដី ។ ពាក់ព័ន្ធបញ្ហាខាងលើនេះលោក នូវ សំណាង អភិបាលស្រុកលើកដែកបានឲ្យដឹងតាមទូរស័ព្ទថា ជារៀងរាល់ឆ្នាំឲ្យតែដល់ខែទឹក គឺផលដំណាំរបស់ប្រជាពលរដ្ឋតែងតែចុះថោកហើយ ព្រោះស្រូវ ឫពោតរបស់ពួកគាត់នៅស្ទើរបានន័យថា មិនទាន់ទុំស្រួល ហើយសើមទៀត ដូច្នះឈ្មួញទិញមិនបានថ្លៃទេ ៕
ចែករំលែកព័តមាននេះ