ប្រទេសអ៊ីស្រាអែល-ប៉ាឡេស្ទីន ៖ ក្រុមហាម៉ាស់ប៉ាឡេស្ទីន កាលពីថ្ងៃទី៨ សីហា បានបាញ់ចេញពីជ្រោយហ្គាហ្សា នូវគ្រាប់រ៉ុក្កែតប្រមាណជា៧០គ្រាប់ដាក់អ៊ីស្រាអែល ដែលតបតវិញតាមរយៈការវាយប្រហារតាមអាកាស សម្លាប់មនុស្ស៣នាក់ ក្នុងនោះមាននារីម្នាក់និងកូនង៉ែតម្នាក់។
សាខាប្រដាប់អាវុធរបស់ហាម៉ាស់ ប្រកាសទទួលខុសត្រូវ ចំពោះការបាញ់គ្រាប់រ៉ុក្កែតដាក់អ៊ីស្រាអែល ដោយក្នុងសេចក្ដីប្រកាសមួយនិយាយថា ពួកប៉ាឡេស្ទីនបានបាញ់គ្រាប់រ៉ុក្កែតច្រើនគ្រាប់ដាក់បណ្ដាទីតាំងសត្រូវនៅជុំវិញជ្រោយហ្គាហ្សា។ គ្រាប់រ៉ុក្កែតប្រមាណជា៧០គ្រាប់បាញ់ចេញពីហ្គាហ្សាទៅកាន់ដែនដីអ៊ីស្រាអែល។
កងទ័ពអ៊ីស្រាអែលគូសបញ្ជាក់ថា គ្រាប់រ៉ុក្កែតភាគច្រើនធ្លាក់ក្នុងតំបន់គ្មានមនុស្សរស់នៅ ហើយ១១គ្រាប់ស្ទាក់កម្ទេចដោយប្រព័ន្ធការពារមីស៊ីលអ៊ីស្រាអែល។ ទោះបីយ៉ាងណាគ្រាប់រ៉ុក្កែត២គ្រាប់ធ្លាក់លើទីក្រុង SDEROT បណ្ដាលឲ្យមនុស្សម្នាក់របួសស្រាល។
ទូរទស្សន៍អ៊ីស្រាអែល ផ្សាយរូបភាពផ្ទះមួយខ្នង និងរថយន្ត១គ្រឿងរងការខូចខាត ដោយគ្រាប់រ៉ុក្កែតនៅក្រុង SDEROT។ កងទ័ពអ៊ីស្រាអែល និយាយថា បានធ្វើការវាយប្រហារតាមអាកាសតបតវិញ ប្រឆាំងទីតាំង១២កន្លែងរបស់ក្រុមហាម៉ាស់នៅហ្គាហ្សា។
ក្រសួងសុខាភិបាលក្រុមហាម៉ាស់ដែលត្រួតត្រាជ្រោយហ្គាហ្សា និយាយថា ជនប៉ាឡេស្ទីន៣នាក់ស្លាប់ដោយការវាយប្រហារទាំងនោះ៕
ចែករំលែកព័តមាននេះ