ដំណឹងល្អសម្រាប់អ្នកភ្នំពេញ គ្រោងបន្ថែមរហូតដល់២៣៧គ្រឿងឯណោះ
- ភ្នំពេញ
រាជធានីភ្នំពេញ ៖ អាជ្ញាធររាជធានីភ្នំពេញបានអះអាងថា បច្ចុប្បន្នរដ្ឋបាលរាជធានីភ្នំពេញបានដាក់ឱ្យដំណើរការសេវាដឹកជញ្ជូនតាមរថយន្តក្រុងសាធារណៈចំនួន១៧៧គ្រឿង ហើយបើគ្មានការប្រែប្រួលទេនៅបំណាច់ឆ្នាំ២០១៨ខាងមុខនេះនឹងដាក់ឱ្យដំណើរការរថយន្តក្រុង រហូតដល់ទៅ២៣៧គ្រឿង សម្រាប់ប្រជាពលរដ្ឋធ្វើដំណើរដើម្បីឆ្លើយតបទៅនឹងកំណើនប្រជាពលរដ្ឋ ធ្វើដំណើរតាមរថយន្តក្រុងសាធារណៈ ដឹកអ្នកដំណើរក្នុងរាជធានីភ្នំពេញ មានការកើនឡើងពីមួយថ្ងៃទៅមួយថ្ងៃដើម្បីបំរើផលប្រយោជន៍ដល់ប្រជាពលរដ្ឋ…
លោក ម៉េត មាសភក្តី អ្នកនាំពាក្សរដ្ឋបាលរាជធានីភ្នំពេញបានឱ្យដឹងថា មកដល់ពេលនេះរដ្ឋបាលរាជធានីភ្នំពេញបានដាក់ឱ្យដំណើរការសេវាដឹកជញ្ជូនតាមរថយន្តក្រុងសាធារណៈចំនួន១៧៧គ្រឿង ហើយបើគ្មានការប្រែប្រួលទេនៅបំណាច់ឆ្នាំ២០១៨ខាងមុខនេះនឹងដាក់ឱ្យដំណើរការរថយន្តក្រុងរហូតដល់ទៅ២៣៧គ្រឿងសម្រាប់ប្រជាពលរដ្ឋធ្វើដំណើរ ។ លោកបន្តថា ការបង្កើនចំនួនរថយន្តចំនួនខ្សែរត់ និងចំនួនចំណតនេះគឺដោយសារប្រជាពលរដ្ឋបានយល់ដឹងពីអត្ថប្រយោជន៍នៃការប្រើប្រាស់សេវារថយន្តក្រុងកាន់តែច្រើនឡើងៗ ។
លោក ម៉េត មាសភក្តី បានឲ្យដឹងទៀតថា ដើម្បីឆ្លើយតបនិងការគាំទ្រចំពោះសេវាដឹកជញ្ជូនអ្នកដំណើរតាមរថយន្តក្រុងសាធារណៈនេះ រដ្ឋបាលរាជធានីភ្នំពេញបានបង្កើតចំណតរថយន្តក្រុង ឬទីកន្លែងរងចាំឡើងហើយនឹងចុះពីរថយន្តក្រុងនេះជា២ប្រភេទ ដែលទី១-បានរៀបចំធ្វើដំបូល និងមានកៅអីសម្រាប់អង្គុយរង់ចាំ នៅទីតាំងដែលមានស្ថានភាពធំទូលាយ និងទី២- ចំណតដែលជាប្រភេទបជ្ឈដែលអ្នកជិះត្រូវឈររង់ចាំ ។
ចែករំលែកព័តមាននេះ