សហព័ន្ធបាល់បោះបង្ហាញពីផលវិបាករបស់ខ្លួនក្នុងវិស័យកីឡាបច្ចុប្បន្ន
- ភ្នំពេញ
រាជធានីភ្នំពេញ ៖ ក្នុងចំណោមសហព័ន្ធដែលស្ថិតក្រោមការគ្រប់គ្រងរបស់គណៈកម្មាធិការជាតិអូឡាំពិកកម្ពុជា សហព័ន្ធបាល់បោះ ក៏ស្ថិតក្នុងចំណោមសហព័ន្ធភាគច្រើនដែលមិនសូវលេចធ្លោក្នុងវិស័យកីឡាផងដែរ។ យ៉ាងណាមិញ មន្ត្រីពាក់ព័ន្ធបានអះអាងថា ហេតុផលដែលធ្វើឱ្យសហព័ន្ធរបស់លោកមិនទទួលបានភាពសកម្ម និងទទួលបានការចាប់អារម្មណ៍នាពេលកន្លងមក មិនមែនដោយសារតែសហព័ន្ធរបស់លោកមិនខំប្រឹងប្រែងនោះទេ…
យ៉ាងណាមិញ មន្ត្រីពាក់ព័ន្ធបានអះអាងថា ហេតុផលដែលធ្វើឱ្យសហព័ន្ធរបស់លោកមិនទទួលបានភាពសកម្ម និងទទួលបានការចាប់អារម្មណ៍នាពេលកន្លងមក មិនមែនដោយសារតែសហព័ន្ធរបស់លោកមិនខំប្រឹងប្រែងនោះទេ ប៉ុន្តែគឺបណ្ដាលមកពីកត្តាមួយចំនួន។
លោក ដូង ឌីម អគ្គលេខាធិការសហព័ន្ធកីឡាបាល់បោះកម្ពុជា បានថ្លែងបញ្ជាក់ថា សហព័ន្ធរបស់លោកក៏មានសកម្មភាពខ្លាំងក្លាមិនខុសគ្នាពីបណ្ដាសហព័ន្ធផ្សេងៗផងដែរ ដោយលោកបានទាំងចាត់ទុកថា សកម្មភាពនាពេលកន្លងមក គឺមានភាពសកម្ម និងមានការរីកចម្រើនគួរឱ្យកត់សម្គាល់ផង ។
ដោយឡែក សម្រាប់ការបញ្ជូនកីឡាករឱ្យចេញប្រកួតក្រៅស្រុក ក៏មានដូចគ្នានឹងបណ្ដាសហព័ន្ធទូទៅ ប៉ុន្តែបណ្ដាលមកពីខ្វះការចាប់អារម្មណ៍ពីស្រទាប់មហាជន ទើបសហព័ន្ធមួយនេះ ទោះជាប្រឹងប្រែងពង្រីកសកម្មភាពកម្រិតណា ក៏មិនសូវលេចធ្លោ ។ លោកបានពន្យល់ពីមូលហេតុដែលនាំឱ្យសហព័ន្ធទាំងមូលខ្វះការចាប់អារម្មណ៍ពីស្រទាប់មហាជនថា បណ្ដាលមកពីខ្វះការជ្រោមជ្រែង និងការជំរុញពីសំណាក់អ្នកជុំវិញខ្លួន។
លោក ដូង ឌីម បន្តថា សកម្មភាពរបស់សហព័ន្ធមួយ មិនអាចទទួលបានការចាប់អារម្មណ៍ ឬលេចធ្លោដោយឯកឯងបានទេ បើគ្មានការផ្សព្វផ្សាយ និងការជ្រោមជ្រែង ពីសំណាក់ក្រុមហ៊ុននានា ។ លោកថា កីឡាករបាល់ទាត់ ក៏មិនដែលមានឱកាសលើកពានពីក្រៅប្រទេសដូចគ្នានឹងក្រុមបាល់បោះរបស់លោកដែរ ប៉ុន្តែបើក្រឡេកទៅមើលវិស័យនេះវិញមានការរីកចម្រើនយ៉ាងខ្លាំង ដោយសារតែមានការជ្រោមជ្រែង ដែលអាចនិយាយថាវិស័យបាល់ទាត់គេមានធនធាននៅពីក្រោយខ្នងគ្រប់គ្រាន់មិនលំបាកដូចបាល់បោះ ។
លោកថា សហព័ន្ធបាល់បោះមិនមានក្រុមហ៊ុនណាមួយបោះទុនជួយពីក្រោយនៅពេលចង់ធ្វើសកម្មភាពនានានោះទេ ខណៈដែលកញ្ចប់ថវិកាសម្រាប់ធ្វើកម្មវិធីផ្សេងៗក៏រកបានទាំងលំបាក បូករួមទាំងកញ្ចប់ថវិកាសម្រាប់ផ្សព្វផ្សាយ និងបញ្ជូនកីឡាករឱ្យចេញហ្វឹកហាត់នៅក្រៅប្រទេសជាដើម ។ ក្នុងនោះ តម្រូវការរបស់គ្រូបង្វឹក និងសិស្សទាំងអស់ក៏មានច្រើនផ្នែក ដែលមិនអាចឱ្យសហព័ន្ធចាត់ចែងបានសព្វគ្រប់ផងដែរ ។
លោកថា ជាធម្មតាក្រុមបាល់បោះដែលខ្លាំង គេត្រូវមានគ្រូបង្វឹកពីបរទេសម្នាក់ដែលល្អ ប៉ុន្តែសហព័ន្ធមិនមានលទ្ធភាពជួលគ្រូទាំងនោះមកបម្រើការបានទេ ដោយសារតែគ្រូបរទេសយ៉ាងហោចណាស់ក៏មានប្រាក់ខែរង្វង់៥ពាន់ដុល្លារឡើងទៅដែរ ។ លោកថា សហព័ន្ធទាំងមូលបានត្រឹមតែទទួលអតីតកីឡាករចាស់ៗធ្វើជាគ្រូបង្វឹកប៉ុណ្ណោះ ទើបលោកយល់ថាបច្ចេកទេសរបស់កីឡាករកម្ពុជានៅតែមានកម្រិត ហើយពិបាកក្នុងការប្រកួតប្រជែងទៅបាន ។
លោកថា បើសហព័ន្ធនេះ ទទួលបានការជ្រោមជ្រែងពីក្រុមហ៊ុនណាមួយ ហើយបើឈានដល់មានកញ្ចប់ថវិកាជាទ្រង់ទ្រាយធំឱ្យសហព័ន្ធ និងកីឡាករបានរំលេចការប្រកួត និងចូលរួមព្រឹត្តិការណ៍នានាដោយមិនលំបាក ប្រហែលជាសហព័ន្ធនេះនឹងទទួលបានភាពលេចធ្លោមិនចាញ់បាល់ទាត់នោះទេ ដោយសារតែបាល់បោះ ក៏ជាប្រភេទកីឡាដែលមានការពេញនិយមសម្រាប់អ្នកកីឡាផងដែរ៕
ចែករំលែកព័តមាននេះ