រាជធានីភ្នំពេញ ៖ ចាងហ្វាងផលិតកម្មមហាហង្សលោកអ៊ីន សុភិន ត្រូវតារាសម្តែងកញ្ញាណាក់ ស្រី លាតត្រដាងពីការជំពាក់មិនព្រមទូទាត់ថ្លៃសម្តែងឲ្យនាង ។ ទាំងលោកអ៊ិន សុភិន…
រាជធានីភ្នំពេញ ៖ ចាងហ្វាងផលិតកម្មមហាហង្សលោកអ៊ីន សុភិន ត្រូវតារាសម្តែងកញ្ញាណាក់ ស្រី លាតត្រដាងពីការជំពាក់មិនព្រមទូទាត់ថ្លៃសម្តែងឲ្យនាង ។ ទាំងលោកអ៊ិន សុភិន ទាំងណាក់ ស្រីណា ហាក់ខ្វែងគំនិតគ្នាចំពោះបញ្ហានេះ ក្នុងពេលភាគីផលិតកម្មមហាហង្សរបស់លោកសុភិន កំពុងតែទន្ទឹងរង់ចាំការទូទាត់ប្រាក់ពីដៃគូរបស់ខ្លួនដែរ ។
ចាងហ្វាងផលិតកម្មមហាហង្សលោកអ៊ីន សុភិន បានប្រាប់កោះសន្តិភាពតាមសារអេឡិចត្រូនិកនៅថ្ងៃទី៨ ខែសីហា ថា ពីដំបូងផលិតកម្មរបស់លោកមិនមានបំណងយកតួអង្គណាក់ ស្រីណា សម្តែងរឿង «មរតកចុងឈាម»ទេ ប៉ុន្តែអតិថិជនជាដៃគូតម្រូវឲ្យយកនាងសម្តែង ព្រោះតួម្នាក់នេះធ្វើការនៅក្នុងក្រុមហ៊ុនរបស់គេ ។ លុះពេលថតចប់ ខាងក្រុមហ៊ុនជាដៃគូនៅមិនទាន់បង់លុយមកឲ្យក្រុមហ៊ុនរបស់លោកនៅឡើយទេ ទើបបានជាខាងផលិតកម្មយឺតយូរចំពោះការទូទាត់ទៅដល់ ណាក់ ស្រីណា ។
ប្រសិនបើក្រុមហ៊ុនបានទូទាត់មកឲ្យផលិតកម្មមហាហង្សហើយនោះ លោកអ៊ិន សុភិន ថា ក៏នឹងទូទាត់ជូនណាក់ ស្រីណា ដែរ ដោយផលិតកម្មគ្មានបំណងយកតួសម្តែងណាមួយធ្វើជាចំណាប់ខ្មាំងទេ ។
បើតាមលោកអ៊ិន សុភិន និយាយថា «យើងមិនអាចហាមឃាត់តារាសម្តែងណាម្នាក់ក្នុងការបើកកកាយរឿងនេះឡើយ ប្រសិនបើគេមិនមានការអត់ទ្រាំ ប៉ុន្តែយើងក៏សប្បាយចិត្តផងដែរនៅពេលដែលពួកគេធ្វើដូច្នេះ ។ ប្រសិនបើពួកគេបានប្រកាសរឿងរ៉ាវនេះជាសាធារណៈ ហើយអតិថិជនដែលជាដៃគូរកស៊ីជាមួយយើងបានដឹង ហើយគេប្រញាប់ទូទាត់មកឲ្យផលិតកម្មនោះ យើងនឹងឆាប់បានទូទាត់ឲ្យខាងតួដូចគ្នា ។
បច្ចុប្បន្នស្ថានភាពផលិតករក៏មិនល្អដូចជាតួសម្តែងផងដែរ ដោយសារតែយើងបានផលិតរឿងឲ្យគេហើយ តែការទូទាត់លុយមានភាពយឺតយ៉ាវដូចគ្នា ។ តួខ្លះពេលសម្តែងមកយឺត ខ្លះទៀតមិនមកតែម្តង(បោកគ្រាប់បែក) តែដល់ពេលយើងទូទាត់លុយយឺតយ៉ាវបាននាំគ្នានិយាយ ឬបរិហារដល់ផលិតកម្ម ដែលរឿងរ៉ាវនេះខ្ញុំតែងតែជួបប្រទះនៅក្នុងសង្គមសិល្បៈខ្មែរ។ ទោះជាយ៉ាងណាសម្រាប់ផលិតកម្មមហាហង្សតែងតែមានភាពអត់ធ្មត់ច្រើន បើទោះបីជាខាងអតិថិជនដែលជាដៃគូរបស់យើងមានភាពយឺតយ៉ាវក្នុងការទូទាត់លុយកាក់ ព្រោះថា យើងជាដៃគូរកស៊ីជាមួយគ្នាយូរអង្វែងទៀត »។
មុនពេលបកស្រាយចំពោះបញ្ហានោះពីលោកអ៊ិន សុភិន តារាសម្តែងកញ្ញាណាក់ ស្រីណា បានបង្ហោះសារជាធារណៈថា «សូមកុំបំបាក់ទឹកចិត្តសិល្បករខ្មែរ ហើយបង្វែរទៅលើកស្ទួយ ។ «មរតកចុកឈាម»គឺជារឿងដំបូងដែលខ្ញុំថតឲ្យផលិតកម្មមហាហង្សដែលជាផលិតកម្មដ៏ល្បីនៅកម្ពុជា ។ ពេលនោះពួកយើងបានបំពេញការងារដោយកម្លាំងញើសឈាម និងក៏បានថតចប់រួចរាល់តាមការសន្យាជិតមួយឆ្នាំហើយ ប៉ុន្តែមកដល់ពេលនេះស្ថានភាពលុយកាក់របស់ខ្ញុំគឺស្ងប់ស្ងាត់ខ្លាំងណាស់ហាក់គ្មានអ្នកអើពើសោះ។
ជាចុងក្រោយខ្ញុំសង្ឃឹមថាក្រុមហ៊ុនហ្នឹងមានដំណោះស្រាយល្អសម្រាប់ខ្ញុំ និងមិនឲ្យខ្ញុំរង់ចាំយូរបន្តទៀត»៕
ចែករំលែកព័តមាននេះ