រាជធានីភ្នំពេញ ៖ បុរសម្នាក់ស្រវឹងជោកបើករថយន្តពណ៌សស៊េរីទំនើបមួយគ្រឿងរេចង្កូតទៅបុកជើងជ្រែងរថយន្តចាក់បេតុងមួយគ្រឿងដែលឈប់នៅលើដងផ្លូវកំពុងចាក់បេតុងទៅក្នុងការដ្ឋានសំណង់បណ្តាលឲ្យរងការខូចខាតយ៉ាងដំណំ ហេតុការណ៍នេះកើតឡើងកាលពីវេលា៩និង១០នាទីយប់ ថ្ងៃទី៨ ខែសីហា ឆ្នាំ២០១៨ ត្រង់ចំណុចជាប់របងបន្ទាយកងរាជអាវុធហត្ថលើផ្ទៃប្រទេសផ្នែកខាងត្បូង តាមបណ្តោយផ្លូវ៥២៨ ស្ថិតក្នុងសង្កាត់បឹងកក់ទី១ ខណ្ឌទួលគោក។
តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ គេឃើញរថយន្តមួយគ្រឿង ពណ៌សលាយលឿង ពាក់ស្លាកលេខ ភ្នំពេញ ៥A-២០៨១ ជាប្រភេទរថយន្តចាក់បេតុង កំពុងឈប់ចតចាក់បេតុងនៅលើដងផ្លូវ៥២៨ ដោយដាក់ជើងជ្រែងលយចេញមកចំណីផ្លូវម្ខាង លុះដល់វេលាកើតហេតុក៏ស្រាប់តែមានរថយន្តស៊េរីទំនើបមួយគ្រឿង ពណ៌ស ពាក់ស្លាកលេខ ភ្នំពេញ ២Y-៣១២២ បើកបរដោយបុរសម្នាក់ក្នុងស្ថានភាពស្រវឹង ធ្វើដំណើរតាមបណ្តោយផ្លូវ៥២៨ ក្នុងទិសដៅពីកើតទៅលិច និងបើកបរក្នុងល្បឿនលឿន។
ប្រភពដដែលបានបន្តថា លុះមកដល់ចំណុចកើត រថយន្តពណ៌សខាងលើនោះក៏បានរេចង្កូតទៅខាងឆ្វេងបុកជើងជ្រែងរបស់រថយន្តចាក់បេតុងដែលដាក់លយចេញមកលើផ្លូវ បណ្តាលឲ្យរថយន្តពណ៌សរងការខូចខាតក្រពឹតកាងផ្នែកខាងមុខចំហៀងខាងឆ្វេងយ៉ាងដំណំ ចំណែកឯរថយន្តចាក់បេតុងមិនមានរងការខូចខាតនោះទេ។ ភ្លាមៗនោះអ្នកបើកបររថយន្តពណ៌សបានចុះពីលើរថយន្តទាំងក្នុងសភាពស្រវឹងទ្រេត
ទ្រោត រួចក៏បានហៅម៉ូតូឌុបជិះចេញពីកន្លែងកើតហេតុបាត់ស្រមោល បន្សល់ទុកតែរថយន្តពណ៌សនោះនៅកន្លែងកើតហេតុ។
ក្រោយពេលកើតហេតុ សមត្ថកិច្ចមូលដ្ឋានក៏ដូចជាសមត្ថកិច្ចជំនាញបានចុះមកដល់ចំណុចកើតហេតុ បន្ទាប់មកក៏ឃើញមានតំណាងភាគីខាងរថយន្តពណ៌សបានចូលខ្លួនមកធ្វើការដោះស្រាយគ្នាជាមួយភាគីរថយន្តចាក់បេតុង ដោយភាគីទាំងពីរមិនចង់មានរឿងវែងឆ្ងាយក៏បានធ្វើការសម្របសម្រួលគ្នាដោយព្រមយករថយន្តទៅជួសជុលរៀងៗខ្លួនដើម្បីបញ្ចប់រឿងនឹងកន្លែងកើតហេតុ៕
ចែករំលែកព័តមាននេះ