ខេត្តព្រៃវែង ៖ រថយន្តឡិចស៊ីស RX300 មួយគ្រឿងបានបើកធ្លាក់ផ្លូវបុករ៉ឺម៉កម៉ូតូមួយគ្រឿងក្រឡាប់បះជើង និងបុកដើមក្រខុបមួយដើមបណ្តាលឱ្យរលំអស់មួយដើម រួចបន្តទៅបុកចូលផ្ទះអ្នកស្រុកថែមទៀត ទើបកល់ទៅមុខលែងរួច។ ហេតុការណ៍នេះបានកើតឡើងនៅវេលាម៉ោង៦និង៣០នាទីយប់ថ្ងៃទី៨ សីហា ស្ថិតនៅតាមបណ្តោយផ្លូវជាតិលេខ៣១០ ត្រង់ចំណុចភូមិព្រែកតាសរ ឃុំអ្នកលឿង ស្រុកពាមរក៍ ខេត្តព្រៃវែង។
រថយន្តបង្កខាងលើម៉ាកឡិចស៊ីស RX300 ពណ៌ស ពាក់ស្លាកលេខ ភ្នំពេញ ២P-១២០០ បើកបរដោយបុរសម្នាក់ ដែលគេស្គាល់ថាជាគ្រូបង្រៀននៅវិទ្យាល័យ ក្នុងស្រុកពាមជរ និងរួមដំណើរដោយស្ត្រីម្នាក់ត្រូវជាប្រពន្ធ និងជាគ្រូបង្រៀនដូចគ្នា។
សាក្សីនៅកន្លែងកើតហេតុបានឱ្យដឹងថា មុនកើតហេតុ ពេលមេឃកំពុងធ្លាក់ភ្លៀងខ្លាំង គេឃើញរថយន្តខាងលើ ធ្វើដំណើរមកពីទិសខាងជើងឆ្ពោះទៅត្បូង ក្នុងល្បឿនយ៉ាងលឿន និងរេពេញផ្លូវ លុះមកដល់ចំណុចកើតហេតុ រថយន្តខាងលើបានរេចង្កូតធ្លាក់ចេញពីផ្លូវទៅខាងឆ្វេងដៃ បុករ៉ឺម៉កម៉ូតូមួយគ្រឿងដែលឈប់ចតបណ្តាលឱ្យរ៉ឺម៉កម៉ូតូនោះប៉ើងក្រឡាប់ផ្ងារជើង រួចរថយន្តខាងលើបុកដើមក្រខុបរលំអស់មួយដើមទៀត ហើយបន្តបុកចូលផ្ទះអ្នកស្រុកដែលនៅក្បែនោះកល់ជាប់ទៅមុខលែងរួច។
ប្រភពដដែលនេះបានបញ្ជាក់ថា គ្រោះថ្នាក់ចរាចរណ៍នេះ បានបណ្តាលឱ្យអ្នកបើកបរ និងអ្នករួមដំណើរដែលជិះក្នុងរថយន្តនោះរងរបួសធ្ងន់ទាំង២នាក់ ហើយត្រូវបានសាច់ញាតិដឹកយកទៅសង្គ្រោះនៅឯមន្ទីរពេទ្យកាល់ម៉ែតទាំងយប់ ដោយទុករថយន្តចោលនៅកន្លែងកើតហេតុ។
ចំពោះមូលហេតុដែលបណ្តាលឱ្យកើតមានគ្រោះថ្នាក់នេះ ត្រូវបានអ្នកស្រុកដែលឃើញហេតុការណ៍ផ្ទាល់បានអះអាងថា មកពីអ្នកបើកបរស្រវឹង ហើយបើកលឿនក្នុងពេលមេឃកំពុងភ្លៀងខ្លាំង ទើបធ្វើឱ្យគ្រោះថ្នាក់បែបនេះតែម្តង៕
ចែករំលែកព័តមាននេះ