ខេត្តមណ្ឌលគិរី ៖ មុខសញ្ញាចាស់នឹងថ្មីចំនួនពីរនាក់ ដែលល្បីក្នុងការប្រកបររបរជួញដូរសាច់សត្វព្រៃនៅក្រុងសែនមនោរម្យ ត្រូវបានសមត្ថកិច្ចបង្ក្រាប កាលពីថ្ងៃទី០៨ សីហា ២០១៨ នៅក្នុងផ្សារក្រុងសែនមនោរម្យ ។
សមត្ថកិច្ចបានឲ្យដឹងថា ក្រុមអន្តរាគមន៍បង្ក្រាបបទល្មើសសត្វព្រៃចល័តនៃរដ្ឋបាលព្រៃឈើ សហការណ៍ជាមួយកងរាជអាវុធហត្ថលើផ្ទៃប្រទេស អង្គការសម្ព័ន្ធមិត្តសត្វព្រៃ WILDLIIFEALLIANCE និងផ្នែករដ្ឋបាលព្រៃឈើសែនមនោរម្យបានចុះឃាត់ចាប់សត្វព្រៃនៅទីតាំងចំនួន២ទីតាំង ។ ក្រុមចម្រុះបានប្រមូលសាច់សត្វព្រៃប្រមាណ៦៧.៧គីឡូក្រាម ដោយឃាត់អ្នកលក់ដូរសាច់សត្វព្រៃចំនួន២នាក់ ។
សមត្ថកិច្ចបន្តថា ទីតាំងទី១នៅចំណុចផ្សារគុម្ពប្ញស្សី ម្ចាស់ឈ្មោះ សោម គឹមសាង ភេទស្រី អាយុ២៩ឆ្នាំ ជនជាតិខ្មែរ មុខរបរ លក់ដូរ ស្ថិតនៅភូមិកណ្តាល សង្កាត់ស្ពានមានជ័យ ក្រុងសែនមនោរម្យ ជាមុខសញ្ញាចាស់ដែលសមត្ថកិច្ចចុះបង្ក្រាបកាលពី៥ខែមុន និងម្នាក់ទៀតឈ្មោះ សាំង វុទ្ធី ភេទប្រុស មានទីលំនៅភូមិដើមស្រល សង្កាត់មនោរម្យ ។
មន្ត្រីជំនាញឲ្យដឹងថា សត្វព្រៃដែលចាប់រួមមាន ៖ កាំប្រម៉ា ៧.២០គីឡូ សាច់ជ្រូកព្រៃជាង៤០គីឡូ ក្តាន់ញ៉ែង៥ក្បាល ស្មើរនិង៧.៥០គីឡូ សាច់ឈ្លូស១៦គីឡូ ក្រពះប្រម៉ាចំនួន០២ ។ បច្ចុប្បន្នអ្នកលក់ដូរសាច់សត្វព្រៃទាំង២ត្រូវបានសមត្ថកិច្ចជំនាញធ្វើការពិន័យជាមួយទឹកប្រាក់សរុបចំនួន៧លាន៥សែន៤ម៉ឺន៤ពាន់រៀល រួចធ្វើការដោះលែងឲ្យទៅផ្ទះវិញ ចំណែកសាច់សត្វព្រៃបញ្ជូនទៅខណ្ឌរដ្ឋបាលព្រៃឈើខេត្តមណ្ឌលគិរីដុតកម្ចេចចោល ។
លោក ជ័យ សុខា នាយផ្នែករដ្ឋបាលព្រៃឈើសែនមនោរម្យបានឲ្យដឹងថា ចំពោះស្ត្រីខាងលើមិនត្រូវបានបញ្ជូនទៅសាលាដំបូងទេ ព្រោះបទល្មើសនេះជាប្រភេទសត្វព្រៃធម្មតាដោយមិនចាត់ចូលជាប្រភេទសត្វកម្រ ។ លោកនាយផ្នែកបញ្ជាក់ថា ករណីនេះត្រឹមតែពិន័យអន្តរកាលប៉ុណ្ណោះ ។
ប្រជាពលរដ្ឋរស់នៅក្រុងសែនមនោរម្យបាននិយាយថា ទីតាំងផ្ទះស្ត្រីឈ្មោះ សោម គឹម សាង បានលួចរកស៊ីលក់សត្វព្រៃរាប់ឆ្នាំមកហើយ មិនដែលឃើញមានសមត្ថកិច្ចក្នុងខេត្តណាម្នាក់ចេញមុខបង្ក្រាបទេ ទើបតែពេលនេះមានជំនាញអង្គការវ៉ាយអេត ចុះចាប់បង្ក្រាបបាន២លើក តែមិនព្រមឈប់ប្រកបរបរខុសច្បាប់នេះទេ ។ ដូច្នេះមហាជនបានស្នើរដល់អង្គភាពជំនាញពាក់ព័ន្ធគួរចាត់វិធានការផ្លូវច្បាប់ចំពោះបុគ្គលដែលមិនរាងច្រាលក្នុងការរកស៊ីសត្វព្រៃខុសច្បាប់ បើមិនចឹងទេ ពួកគាត់នៅតែប្រព្រឹត្តសកម្មភាពដដែលមិនឈប់ឡើយ ៕
ចែករំលែកព័តមាននេះ