រាជធានីភ្នំពេញ ៖ ស្ត្រីមេម៉ាយម្នាក់បានប្តីក្រោយតែងតែប្រចណ្ឌ វាយធ្វើបាបស្ទើរតែរាល់ថ្ងៃ ថែមទាំងចាប់កោរសក់ឡើងត្រងោល និងបង្ខាំងទុកក្នុងបន្ទប់ទៀតផង ហេតុការណ៍នេះបង្កការភ្ញាក់ផ្អើលកាលពីម៉ោង៩និង៤០នាទីយប់ ថ្ងៃទី៨ ខែសីហា ស្ថិតនៅបន្ទប់ជួលក្នុងភូមិឬស្សីទី២…
រាជធានីភ្នំពេញ ៖ ស្ត្រីមេម៉ាយម្នាក់បានប្តីក្រោយតែងតែប្រចណ្ឌ វាយធ្វើបាបស្ទើរតែរាល់ថ្ងៃ ថែមទាំងចាប់កោរសក់ឡើងត្រងោល និងបង្ខាំងទុកក្នុងបន្ទប់ទៀតផង ហេតុការណ៍នេះបង្កការភ្ញាក់ផ្អើលកាលពីម៉ោង៩និង៤០នាទីយប់ ថ្ងៃទី៨ ខែសីហា ស្ថិតនៅបន្ទប់ជួលក្នុងភូមិឬស្សីទី២ សង្កាត់ស្ទឹងមានជ័យទី៣ ខណ្ឌមានជ័យ។
ស្ត្រីរងគ្រោះខាងលើឈ្មោះ ពេញ ស្រីនាង អាយុ៣៩ឆ្នាំ មុខរបររើសអេតចាយ ស្នាក់នៅផ្ទះជួលជាន់ក្រោម ស្ថិតក្នុងភូមិ-ឃុំកើតហេតុខាងលើ មានស្រុកកំណើតនៅខេត្តកណ្តាល ចំណែកបុរសជាប្តីឈ្មោះ ស៊ីន ដារា អាយុ៤០ឆ្នាំ មុខរបររើសអេតចាយ មានស្រុកកំណើតនៅស្រុកលើកដែក ខេត្តសៀមរាប។
ប្រភពពីស្ត្រីរងគ្រោះប្រាប់ថា គាត់ជាស្ត្រីមេម៉ាយកូន៣ដែលលែងលះជាមួយប្តីមុនយូរឆ្នាំមកហើយ ។ ក្រោយមកក៏ស្គាល់ប្តីក្រោយនិងរស់នៅជាមួយគ្នាទើបតែ១ឆ្នាំកន្លះប៉ុណ្ណោះ គាត់ស្រលាញ់ប្តីក្រោយនេះណាស់បានផ្គាប់ផ្គុនគ្រប់បែបយ៉ាងថែមទាំងទិញរបស់របរដែលប្តីចង់បានឲ្យទាំងអស់ និងទិញម៉ូតូថ្មីឱ្យទៀតដំបូងការរស់នៅចុះសម្រុងគ្នាណាស់ ទើបតែ២ខែក្រោយនេះប្តីគាត់បែរជាកែប្រែចរិកចេះប្រចណ្ឌ ឈ្លោះវាយទាស់ទែងគ្នារាល់ថ្ងៃ ហើយមិនគិតជួយរកស៊ីអ្វីគិតតែលាដៃសុំលុយ បើមិនឱ្យនឹងវាយធ្វើបាបគាត់ ថែមទាំងប្រមូលខោអាវថ្មីៗរបស់គាត់យកទៅដុតចោលអស់គ្មានសល់ ។
ប្រភពដដែលបន្តទៀតថា នៅយប់ថ្ងៃកើតហេតុនេះគឺប្តីគាត់បានបង្ខាំងគាត់ទុកក្នុងបន្ទប់រួចចាប់គាត់កោរសក់ឡើងត្រងោល វាយតប់ឡើងហើមមុខមាត់ ហើយប្រមូលលុយដែលគាត់មានទាំងប៉ុន្មានយកទៅអស់ ថែមទាំងចាក់សោទ្វារពីក្រៅមិនឱ្យគាត់ចេញទៅណាឡើយ។
បើតាមម្ចាស់ផ្ទះជួលវិញប្រាប់ថា ប្តីប្រពន្ធមួយគូរនោះឈ្លោះគ្នាស្ទើរតែរាល់ថ្ងៃ តែស្ត្រីនោះនៅតែទ្រាំរស់នៅជាមួយប្តីនោះ នេះប្រហែលជាគូកម្ម ហើយគាត់ធ្លាប់បណ្ដេញប្តីប្រពន្ធនោះចេញមិនឱ្យស្នាក់នៅជាច្រើនដង តែស្ត្រីនោះមិនព្រម និងសុំអង្វរគាត់នៅបន្ត គាត់អាណិតក៏ចេះតែឱ្យនៅទៅ។
ហើយនៅយប់កើតហេតុនោះ ម្ចាស់ផ្ទះបានទូរស័ព្ទទៅប្តឹងសមត្ថកិច្ចឱ្យចុះមកជួយអន្តរាគមន៍ និងគាស់ទ្វារបន្ទប់ជួយស្ត្រីរងគ្រោះចេញមកក្រៅ ហើយនាំស្ត្រីនោះទៅប៉ុស្តិ៍នគរបាល ដើម្បីដាក់ពាក្យបណ្តឹង ។ បន្ទាប់ពីទទួលបណ្តឹងរួចលោកនាយប៉ុស្តិ៍នគរបាលស្ទឹងមានជ័យ៣ បានជូនថវិកាទៅកាន់ស្ត្រីនោះចំនួន៦ម៉ឺនរៀល ដើម្បីធ្វើសោហ៊ុយត្រឡប់ទៅស្រុកកំណើតវិញ ៕
ចែករំលែកព័តមាននេះ