រាជធានីភ្នំពេញ ៖ ក្នុងរយៈពេល១ឆ្នាំ ឬ២ឆ្នាំចុងក្រោយនេះ ការទូទាត់តាមប្រព័ន្ធបច្ចេកវិទ្យានៅកម្ពុជា កាន់តែពេញនិយម និងមានសន្ទុះកើនឡើងគួរឲ្យកត់សម្គាល់ ដែលធ្វើឲ្យកម្ពុជាកំពុងផ្លាស់ប្តូរទៅរកសេដ្ឋកិច្ចឌីជីថលម្ដងបន្តិចៗទៅតាមការចង់បានរបស់រាជរដ្ឋាភិបាលផងដែរ ។
ការទូទាត់តាមប្រព័ន្ធ QR Code ជាផ្នែកមួយនៃសេវាទូទាត់តាមអេឡិចត្រូនិក ដែលកំពុងចាប់ផ្ដើមរីកចម្រើនបន្តិចម្ដងៗនៅកម្ពុជា ដោយសង្កេតឃើញស្ទើរគ្រប់អាជីវកម្មខ្នាតតូចៗឡើងទៅ កំពុងចាប់យកវិធីទូទាត់តាមរយៈបច្ចេកវិទ្យាមួយនេះ ដែលខុសពីការចាយវាយតាមវីសាកាត ម៉ាស្ទ័រកាត និងកាតអេឡិចត្រូនិកផ្សេងទៀត ។
លោក លូ ម៉េង អគ្គនាយកក្រុមហ៊ុនអាល់មិនគ្រុប ដែលជាក្រុមហ៊ុនផ្ដល់សេវាកម្មអាហារនិងភេសជ្ជៈនៅកម្ពុជា បានឲ្យដឹងថា កាលពីមុន រាល់សេវាកម្មរបស់អាល់មិនគ្រុប គឺទូទាត់ជាសាច់ប្រាក់សុទ្ធ ហើយក្រោយមក ក៏បានប្រើជាការទូទាត់តាមអេឡិចត្រូនិកវិញ ។
លោកថ្លែងថា ៖« ដោយសារតែអតិថិជនជាច្រើនដែលមករកសេវារបស់យើង តែងតែសួររកការទូទាត់តាមប្រព័ន្ធQR Code ។ ដូចនេះហើយទើបយើងបន្ថែមសេវាកម្មទូទាត់តាមបច្ចេកវិទ្យានេះ ដើម្បីសម្រួលដល់អតិថិជន » ។
លោកបណ្ឌិត អុិន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី បានមានប្រសាសន៍ថា ការទូទាត់តាមប្រព័ន្ធ QR Code គឺមានភាពងាយស្រួលខ្លាំង ព្រោះវាមិនបាច់ត្រូវការដាក់លុយតាមខ្លួន នាំតែពិបាក ឬបារម្ភពីសុវត្ថិភាពប្រាក់នៅក្នុងខ្លួនទៀតនោះទេ ។
លោកថា ៖« ការទូទាត់តាមប្រព័ន្ធ QR Code មានតែទូរស័ព្ទស្មាតហ្វូនមួយជាការស្រេច ហើយអាចទូទាត់បានតាមចិត្ត ដោយគ្រាន់តែស្កេន QR Code ហាងឬម្ចាស់សេវាកម្មបំពាក់នៅកន្លែងរបស់គេ ។ ម្យ៉ាងទៀត ការទូទាត់តាមប្រព័ន្ធនេះដែរ គឺមិនប្រើពេលយូរដូចការទូទាត់សាច់ប្រាក់សុទ្ធ ដែលត្រូវការរាប់ប្រាក់ម្ដងមួយៗ និងពិនិត្យខ្លាចមានការក្លែងបន្លំប្រាក់ទៀតផង ។ ការទូទាត់តាម QR Code គឺប្រើពេលតែប្រមាណ២ទៅ៣នាទីប៉ុណ្ណោះសម្រាប់មួយប្រតិបត្តិការ ដែលទូទាត់បានប្រាក់ច្រើន » ។
លោកបន្តថា បច្ចុប្បន្ននេះ ការទូទាត់ប្រាក់តាមប្រព័ន្ធ QR Code ត្រូវបានគេមើលឃើញថា កំពុងតែមានវិសាលភាពកាន់តែទូលំទូលាយ ព្រោះវាជាការទូទាត់ដែលមិនចាំបាច់ប្រើប្រាស់ប្រាក់សុទ្ធ និងមានសុវត្ថិភាពខ្ពស់។ មិនតែប៉ុណ្ណោះ បច្ចេកវិទ្យាថ្មីរបស់អេស៊ីលីដា ដែលមានឈ្មោះថា អេស៊ីលីដាទាន់ចិត្ត មិនមែនប្រើប្រាស់បានតែស្កេន QR Code នោះទេ តែវាអាចទូទាត់បាននៅតាមទូរស័ព្ទដៃ និងកន្លែងណាក៏បាន ឲ្យតែមានអុីនធើរណេត ។
បើតាមបុគ្គលិកផ្នែកគិតលុយម្នាក់នៅហាងលក់កុំព្យូទ័រមួយកន្លែងនៅមុខវត្តមហាមន្ត្រី បានឲ្យដឹងថា អតិថិជនដែលទិញកុំព្យូទ័រ និងសម្ភារផ្សេងៗនៅក្នុងហាងមួយចំនួនបានប្រើប្រាស់ការទូទាត់តាមរយៈQR Code ដែលមានលក្ខណៈលឿន ហើយបុគ្គលិកក៏មិនចាំបាច់ពិនិត្យសាច់ប្រាក់ខ្លាចក្លែងក្លាយនោះទេ ។
គួរបញ្ជាក់ថា បច្ចេកវិទ្យាទូទាត់ប្រាក់តាម QR Code នេះ ក្រៅពីមានបំពាក់នៅតាមហាងតូចធំ គេឃើញមាននៅតាមសេវាកម្មដឹកអ្នកដំណើរ ដូចជា តាមតាក់ស៊ី និងរ៉ឺម៉កកង់បី ជាដើម ។ ដូចនេះ មានន័យថា ពលរដ្ឋកម្ពុជាកាន់តែយល់ដឹងច្រើនពីការចាយវាយប្រាក់តាមបច្ចេកវិទ្យា មិន មែនសាច់ប្រាក់ ៕
ចែករំលែកព័តមាននេះ