រាជធានីភ្នំពេញ ៖ មានការភ្ញាក់ផ្អើលមួយយ៉ាងខ្លាំងបានកើតឡើង បន្ទាប់ពីគេបានឮស្នូរផ្ទុះអាវុធ ជាច្រើនគ្រាប់ចេញពីបន្ទប់មន្ត្រីនគរបាលមួយរូបយ៉ាងរន្ថើន។ លុះក្រោយពីស្ងាត់ស្នូរផ្ទុះដ៏កក្រើកខាងលើ ទើបដឹងថា មន្ត្រីនគរបាលជាម្ចាស់ផ្ទះនោះជាអ្នកបាញ់ ប៉ុន្តែមិនបានបណ្ដាលឲ្យត្រូវនរណាម្នាក់រងគ្រោះឡើយ។ បន្ទាប់មកកម្លាំងនគរបាលខណ្ឌពោធិ៍សែនជ័យ បានចុះទៅកាន់ទីនោះពិនិត្យជាក់ស្ដែង ព្រមទាំងចាប់ខ្លួន ខ្មាន់កាំភ្លើងខាងលើ នាំទៅសាកសួរចាត់ការតាមច្បាប់។
ហេតុការណ៍នោះបានកើតឡើងកាលពីវេលាម៉ោង ប្រមាណជា៣រសៀល ថ្ងៃទី៨ ខែសីហា ឆ្នាំ២០១៨ នៅចំណុចបន្ទប់ជួលជាន់ទី៣ ស្ថិតនៅក្នុងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នពេញ។ ខ្មាន់កាំភ្លើងខាងលើនោះឈ្មោះ កែវ សុផល អាយុ៤០ឆ្នាំ មុខរបរជាមន្ត្រីនគរបាលអន្តរាគមន៍ពិសេស នៃអគ្គស្នងការនគរបាលជាតិ ស្នាក់នៅបន្ទប់ជួលជាន់ទី៣ ភូមិព្រៃទា ដែលជាកន្លែងកើតហេតុនោះតែម្ដង។ ដោយឡែកនគរបាលបានដកហូតបានកាំភ្លើង១ដើម ម៉ាកK54 មានគ្រាប់ចំនួន៤គ្រាប់ រួមជាមួយសម្បកគ្រាប់ជាច្រើនទៀត។
បើតាមនគរបាលផ្នែកព្រហ្មទណ្ឌ ខណ្ឌពោធិ៍សែនជ័យ បាននិយាយថា បុរសដែលជាខ្មាន់កាំភ្លើងខាងលើស្នាក់នៅក្នុងបន្ទប់ជួលនោះតែម្នាក់ឯង ប៉ុណ្ណោះ គ្មានប្រពន្ធ និងកូនទេ។ ហើយពេលសួរនាំនិយាយរវើរវាយដូចជាអ្នកមានជំងឺសសៃប្រសាទ ដោយប្រាប់ថា មានមនុស្ស១ក្រុមដេញចាប់ដេញវាយ និងដេញចាប់គាត់ដើម្បីវះពោះ។ ដោយសារតែមានការភ័យខ្លាចទើបគាត់ទាញកាំភ្លើងដេញបាញ់អ្នកដែលប្រុងធ្វើបាបគាត់តែប៉ុណ្ណោះ ប៉ុន្តែទោះជាបែបណាកម្លាំងជំនាញផ្នែកនគរបាលព្រហ្មទណ្ឌខណ្ឌកំពុងសាកសួរបន្តហើយមិនទាន់ដឹងថាថ្នាក់លើមានគោលការណ៍បែបណានៅឡើយទេ។
ប្រជាពលរដ្ឋបាននិយាយថា នៅវេលាកើតហេតុខាងលើ ពួកគាត់បានឮស្នូរគ្រាប់កាំភ្លើងផ្ទុះលាន់ឮឡើងយ៉ាងកក្រើកនៅជាន់ទី៣ផ្ទះជួលខាងលើ ដែលហាក់ដូចជាការប្រយុទ្ធគ្នានៅក្នុងសមរភូមិអញ្ចឹងដែរ។ ខណៈនោះពួកគាត់មិនហ៊ានចេញទៅមើល ភ្លាមៗនោះឡើយ ព្រោះខ្លាចមានគ្រោះថ្នាក់ លុះបន្តិចក្រោយមកទើនាំគ្នារត់ចេញទៅមើល ឃើញមន្ត្រីនគរបាលខាងលើ កាន់កាំភ្លើងស៊កបង់គ្រាប់បាញ់មេឃបន្តទៀត ទើបដឹងថាស្នូរផ្ទុះអាវុធនេះគឺមន្ត្រីនគរបាល រូបនោះជាអ្នកបាញ់បោះសេរី។
ប្រភពដដែលបានបន្តទៀតថា ពួកគាត់មិនបានដឹងថាបុរសនេះមានវិបត្តិអ្វីក្នុងចិត្ត ឬខឹងសម្បារចំពោះនរណាម្នាក់ទេ ទើបបានជាបាញ់មេឃបញ្ចេញកំហឹងបែបនេះ។ ហើយក្រោយមកទើបឃើញកម្លាំងនគរបាលខណ្ឌពោធិ៍សែនជ័យ ចុះទៅដល់នាំខ្លួនបុរសនេះទៅសាកសួរ និងកសាងសំណុំរឿងចាត់ការតាមច្បាប់៕
https://youtu.be/IaYRtxmX8z8
ចែករំលែកព័តមាននេះ