ខេត្តព្រៃវែង ៖ ក្រុមជនសង្ស័យពាក់ពន្ធ័ករណីជួញដូរថ្នាំញៀន ដែលមានទាំងក្មេងហើយនឹងចាស់ចំនួន១១នាក់ ត្រូវបានកម្លាំងកងរាជអាវុធហត្ថខេត្តព្រៃវែង បង្ក្រាប និងឃាត់ខ្លួនបានជាបន្តបន្ទាប់ នៅក្នុងប្រតិបត្តិការរយៈពេល ៤ថ្ងៃ គិតចាប់ពីថ្ងៃទី៤រហូតដល់ថ្ងៃទី៧ ខែសីហានេះ។ លោកវរៈសេនីយត្រី ផាត់ សុជោត ប្រធានមន្ទីរយុតិ្តធម៌ កងរាជអាវុធហត្ថខេត្តព្រៃវែង បានឲ្យដឹងថា ពីដំបូងលោកឧត្តមសេនីយត្រី ឈួន គឹមសាន មេបញ្ជាការ កងរាជអាវុធហត្ថខេត្តព្រៃវែង បានបញ្ជាឲ្យកម្លាំងអាវុធហត្ថខេត្ត សហការជាមួយអាវុធហត្ថស្រុកកំចាយមារ ចុះបង្ក្រាបករណីគ្រឿងញៀន នៅចំណុចផ្ទះខារ៉ាអូខេយីហោ ម្លប់ស្បូវប្រាក់ម៉ឺនជ័យ ស្ថិតក្នុងភូមិត្បូងវត្ត ឃុំក្របៅ ស្រុកកំចាយមារ នៅវេលាម៉ោង១០ និង១៥នាទីយប់ ថ្ងៃទី៤សីហា។
ក្នុងប្រតិបត្តិការនេះ កម្លាំងអាវុធហត្ថធ្វើការ ឃាត់ខ្លួនជនសង្ស័យបានចំនួន៤នាក់ និងដកហូតបានថ្នាំញៀនប្រភេទម្សៅក្រាមពណ៌ស ចំនួន៣កញ្ចប់ប៉ុណ្ណោះ។ លោក ផាត់ សុជោត បានបន្តទៀតថា ក្រោយពីត្រូវឃាត់ខ្លួនជនសង្ស័យបានឆ្លើយសារភាព និងប្រាប់ពីប្រភពដែល ពួកគេទទួលថ្នាំយកមកលក់បន្ត ទើបរូបលោកដឹកនាំកម្លាំងតាមស្រាវជ្រាវព្រមទាំងប្រើប្រាស់វិធានញុះញង់ រហូតឈានដល់ការចាប់ឃាត់ខ្លួនជនសង្ស័យបានជាបន្តបន្ទាប់។ ដោយនៅថ្ងៃទី៤ សីហាឃាត់ខ្លួនបានចំនួន៤នាក់ ដកហូតបានថ្នាំញៀន៣កញ្ចប់ ទូស័ព្ទដៃ៥គ្រឿង និងម៉ូតូ៣គ្រឿង។
លុះចូលដល់ថ្ងៃទី៥សីហា ឃាត់ខ្លួនជនសង្ស័យជាជាក្មេងៗអាយុ១២ និង១៣ឆ្នាំ បានចំនួន៣នាក់ និងស្រី្តម្នាក់ជាម្តាយក្មេងម្នាក់ក្នុងចំណោម៣នាក់ ដកហូតបានថ្នាំញៀនចំនួន៩កញ្ចប់ ទូរសព្ទ័ដៃ២គ្រឿង ជញ្ជីងថ្លឹងថ្នាំ១គ្រឿង និងម៉ូតូ១គ្រឿង។ ចូលដល់ថ្ងៃទី៦សីហា ឃាត់ខ្លួនជនសង្ស័យបានចំនួន២នាក់ ដកហូតបានថ្នាំញៀនចំនួន៣កញ្ចប់ ម៉ូតូ០២គ្រឿង និងទូសព្ទ័ដៃ២គ្រឿង លុះមកដល់ថ្ងៃទី៧សីហា ធ្វើការឃាត់ខ្លួនជនសង្ស័យបានម្នាក់ទៀត។ ប្រភពដដែលនេះបានបញ្ជាក់ថា សរុបរយៈពេល៤ថ្ងៃ ក្នុងប្រតិបត្តិការបង្ក្រាបករណីជួញដូរថ្នាំញៀនខាងលើនេះ កម្លាំងអាវុធហត្ថខេត្ត ធ្វើការឃាត់ខ្លួនជនសង្ស័យ ជាអ្នកចែកចាយថ្នាំញៀនបានចំនួន១១នាក់ និងដកហូតបានថ្នាំញៀនប្រភេទម្សៅក្រាមពណ៌សចំនួន១៥កញ្ចប់ ស្មើនឹងទម្ងន់៣៥,៥២ក្រាម ម៉ូតូចំនួន០៦គ្រឿង ទូរសព្ទ័ដៃចំនួន០៩គ្រឿង។
បច្ចុប្បន្ននេះ ជនសង្ស័យប្រុសស្រី ចំនួន៨នាក់ ត្រូវបានបញ្ជូនមកកាន់បញ្ជាការដ្ឋានកងរាជអាវុធហត្ថខេត្ត ចាត់ការបន្តទៅតាមនីតិវិធី។ ចំណែកក្មេងៗ៣នាក់ ដែលមិនទាន់គ្រប់អាយុ ត្រូវបានអប់រំណែនាំ និងអនុញ្ញាតិឲ្យត្រឡប់ទៅផ្ទះវិញអស់ហើយ៕
ចែករំលែកព័តមាននេះ