ខេត្តបន្ទាយមានជ័យ ៖ ជំនន់ទឹកភ្លៀងបានបណ្តាលឲ្យជន់លិចស្រូវសែនក្រអូប ដែលជាប្រភេទស្រូវស្រាលនិងមានទីផ្សារ ចំនួនជាង៣.០០០ហិកតានៅស្រុកមង្គលបុរី និងក្រុងសិរីសោភ័ណ ហើយពេលនេះ អាជ្ញាធរខេត្តកំពុងចុះពិនិត្យ និងមានវិធានការសង្គ្រោះឲ្យបានទាន់ពេលវេលា ។
អភិបាលរងខេត្ត លោក អ៊ុំ រាត្រី បានឲ្យដឹងថា ចំពោះវិធានការបឋម គឺយកម៉ាស៊ីនបូមទឹកខ្នាតធំ២គ្រឿងរបស់ក្រសួងធនធានទឹកនិងឧតុនិយមមកបូមរំដោះទឹកចេញនៅចំណុចប្រឡាយមិត្តភាព ហើយខេត្ត និងមន្ទីរជំនាញ នឹងជួបក្រុមហ៊ុនកសាងផ្លូវជាតិលេខ៥ សុំបើកមុខទឹកចំណុចស្ពានក្រឡោ ដើម្បីរំដោះទឹកចេញ ។
លោក រ័ត្ន ដាស៊ីណាង អភិបាលស្រុកមង្គលបុរី បញ្ជាក់ថា នៅស្រុកមង្គលបុរី មាន៤ឃុំដែលរងផលប៉ះពាល់លើស្រូវស្រាលប្រភេទស្រូវសែនក្រអូបកំពុងទុំ និងប្រឈមការលិចទឹកអស់ទាំងស្រុងជាង២.៥០០ហិកតា គឺ ៖
១-ឃុំរហាត់ទឹក ប៉ះពាល់លិចអស់ទាំងស្រុងនៅខាងលិចប្រឡាយភូមិ ជិត២.០០០ហិកតា និងប្រមូលមុនទឹកលិចបានជាង៤០០ហិកតា
២-ឃុំចំណោម ប៉ះពាល់ប្រមាណ៣០០ហិកតា ប្រមូលផលមុនបាន៥០ហិកតា
៣-ឃុំសឿ ប្រឈមនឹងទឹកលិច ហើយទឹកនៅបន្តឡើង និងលិចនៅថ្ងៃទី៣១ ខែកក្កដា ហើយប្រមូលផលបាន៤០ហិកតា
៤-ឃុំបត់ត្រង់ កំពុងប៉ះពាល់នៅជាប់ឃុំរហាត់ទឹក ប្រមាណ៥០០ហិកតា ។
លោក ហ៊ឹល រ៉ាយ៉ា អភិបាលក្រុងសិរីសោភ័ណ ថ្លែងថា នៅក្រុងសិរីសោភ័ណ ទឹកកំពុងលិចស្រូវស្រាលប្រភេទស្រូវសែនក្រអូប ចាប់ពីថ្ងៃទី៣០ ដល់៣១ ខែកក្កដា ប្រមាណ២០០ហិកតា ។ បើទឹកនៅតែបន្តឡើង ដោយសារភ្លៀងនៅតែបន្តធ្លាក់នៅផ្នែកខាងលើ គឺអាចប្រឈមនឹងការលិចលង់ និងប៉ះពាល់ច្រើនទៀតនៅផ្នែកខាងលិចផ្លូវជាតិលេខ៥ ។
លោក យឹម ប៊ុនរុំ ប្រធានមន្ទីរធនធានទឹក និងឧតុនិយមខេត្ត ថ្លែងថា ខេត្តបន្ទាយមានជ័យមាន២ស្រុក-ក្រុង ដែលកំពុងប៉ះពាល់ដោយជំនន់ទឹកភ្លៀងធ្លាក់ពីស្រុកបវេល ខេត្តបាត់ដំបង ក្រោយពេលបើកសំណង់បវេល និងសំណង់ព្រៃខ្ពស់ គឺស្រុកមង្គលបុរី លិចស្រូវប្រាំងមិនតិចជាង៣.០០០ហិកតា និងក្រុងសិរីសោភ័ណ បន្តលិចរយៈពេល១ថ្ងៃអស់២០០ហិកតា ។ កម្រិតទឹកស្ទឹងមង្គលបុរីឡើង១៣,២ម៉ែត្រ និងដងស្ទឹងសិរីសោភ័ណកម្ពស់ទឹក៧,២ម៉ែត្រ ហើយកម្រិតកម្ពស់ទឹកឡើងរាល់ថ្ងៃនេះ ដោយសារជំនន់ទឹកភ្លៀងធ្លាក់នៅផ្នែកខាងលើ ៕
ចែករំលែកព័តមាននេះ