សហរដ្ឋអាមេរិក ៖ ប្រធានាធិបតីអាមេរិកលោកដូណាល់ ត្រាំ កាលពីថ្ងៃទី៧ សីហា បានចេញការព្រមានដល់បណ្ដាប្រទេសដែលនឹងនៅរឹងទទឹងធ្វើពាណិជ្ជកម្មជាមួយអ៊ីរ៉ង់ ក្រោយការប្រកាសដាក់ទណ្ឌកម្មឡើងវិញប្រឆាំងក្រុងតេហេរ៉ង់ ដោយទណ្ឌកម្មទាំងនេះត្រូវបានចាត់ទុកថា តឹងតែងបំផុតពុំធ្លាប់មាន។…
សហរដ្ឋអាមេរិក ៖ ប្រធានាធិបតីអាមេរិកលោកដូណាល់ ត្រាំ កាលពីថ្ងៃទី៧ សីហា បានចេញការព្រមានដល់បណ្ដាប្រទេសដែលនឹងនៅរឹងទទឹងធ្វើពាណិជ្ជកម្មជាមួយអ៊ីរ៉ង់ ក្រោយការប្រកាសដាក់ទណ្ឌកម្មឡើងវិញប្រឆាំងក្រុងតេហេរ៉ង់ ដោយទណ្ឌកម្មទាំងនេះត្រូវបានចាត់ទុកថា តឹងតែងបំផុតពុំធ្លាប់មាន។
នៅអ៊ីរ៉ង់មនុស្សជាច្រើនបានប្រមូលផ្ដុំគ្នានៅតាមដងវិថីទាំងឡាយ សម្ដែងកំហឹងលាយនឹងការព្រួយបារម្ភចំពោះការវិលត្រឡប់វិញនៃទណ្ឌកម្មទាំងនោះ ដែលសម្រេចក្រោយការដកខ្លួនថយជាឯកតោភាគីកាលពីខែឧសភា របស់ក្រុងវ៉ាស៊ិនតោនពីកិច្ចព្រមព្រៀងស្ដីពីនុយក្លេអ៊ែរអ៊ីរ៉ង់។
ប៉ុន្មានម៉ោងមុនការចូលជាធរមាននៃទណ្ឌកម្មនោះ ដែលអាចនាំឲ្យមានភាពធ្ងន់ធ្ងរដល់សេដ្ឋកិច្ចអ៊ីរ៉ង់ ប្រធានាធិបតីអ៊ីរ៉ង់លោកហាសាន់រ៉ូហានី នាយប់ថ្ងៃទី៦សីហាអះអាងពីសង្គ្រាមចិត្តសាស្ត្រមួយ ហើយលោកបដិសេធរាល់ការចរចាស្ដីពីកិច្ចព្រមព្រៀងថ្មីតាមការទាមទាររបស់លោកត្រាំ។
តាមទូរទស្សន៍FOX NEWSលោកJOHN BOLTON ទីប្រឹក្សាសន្តិសុខជាតិរបស់លោកត្រាំអះអាងនាថ្ងៃទី៧សីហាថា គោលបំណងពុំមែនការចង់ឲ្យមានការផ្លាស់ប្ដូររបបមួយឡើយ ប៉ុន្តែយើងពិតជាចង់ដាក់ការគាបសង្កត់យ៉ាងខ្លាំងលើរដ្ឋាភិបាលអ៊ីរ៉ង់។យើងចង់ឃើញការដកថយកាន់តែខ្លាំងរបស់អ៊ីរ៉ង់ ពីការជួយទ្រទ្រង់ដល់ភេរវកម្មអន្តរជាតិ សកម្មភាពយោធាដ៏ប្រទូស្តរ៉ាយនៅមជ្ឈឹមបូព៌ា ព្រមទាំងបណ្ដាកម្មវិធីមីស៊ីលបាលីស្ទិកលាយជាមួយនុយក្លេអ៊ែររបស់ខ្លួន។
បណ្ដាវិធានការរបស់អាមេរិកនាំឲ្យរុស្ស៊ីមានកំហឹងដោយអះអាងថា ខ្លួននឹងធ្វើអ្វីៗដែលចាំបាច់ ដើម្បីជួយសង្គ្រោះកិច្ចព្រមព្រៀងនុយក្លេអ៊ែរអ៊ីរ៉ង់។ រុស្ស៊ីនិយាយថា សហគមន៍អន្តរជាតិមិនត្រូវបណ្ដោយឲ្យជោគជ័យសំខាន់ខាងការទូតពហុភាគីត្រូវបំផ្លាញដោយសារតែមហិច្ឆតាអាមេរិកទាក់ទិននឹងការមិនចុះសម្រុងរបស់គេជាមួយអ៊ីរ៉ង់ឡើយ។
ពួកអឺរ៉ុបដែលក៏ជាអ្នកចុះហត្ថលេខាលើកិច្ចព្រមព្រៀងនុយក្លេអ៊ែរអ៊ីរ៉ង់ដែរ អះអាងពីការប្ដេជ្ញាចិត្តរបស់ពួកគេជួយសង្គ្រោះកិច្ចព្រមព្រៀងនេះ ហើយការពារបណ្ដាប្រតិបត្តិករសេដ្ឋកិច្ចអឺរ៉ុបដែលរកស៊ីស្របច្បាប់ជាមួយអ៊ីរ៉ង់។ ចំណែកច្បាប់ពិសេសមួយក្នុងន័យនេះចូលជាធរមាននាថ្ងៃទី៧ សីហា តែក៏ពុំអាចរារាំងក្រុមហ៊ុនអាល្លឺម៉ង់ DAIKLER ក្នុងការប្រកាសពីការបញ្ឈប់សកម្មភាពរបស់ខ្លួននៅអ៊ីរ៉ង់ដែរ។
តាម TWITTER លោកត្រាំបានសរសេរថា ទណ្ឌកម្មប្រឆាំងអ៊ីរ៉ង់ត្រូវបានបង្កើតជាផ្លូវការហើយ។ នោះជាទណ្ឌកម្មយ៉ាងតឹងតែងបំផុតពុំធ្លាប់មាន ហើយនាខែវិច្ឆិកាខាងមុខនឹងមានកម្រិតថ្មីមួយទៀត។ នរណាក៏ដោយដែលធ្វើពាណិជ្ជកម្មជាមួយអ៊ីរ៉ង់នឹងពុំអាចរកស៊ីជាមួយអាមេរិកបានឡើយ។
ទណ្ឌកម្មរួមមានការរាំងខ្ទប់លើការទូទាត់ខាងហិរញ្ញវត្ថុ និងការនាំចូលវត្ថុធាតុដើម ព្រមទាំងបណ្ដាវិធានការដាក់ទណ្ឌកម្មលើការទិញដូរខាងផ្នែករថយន្តនិងយន្តហោះពាណិជ្ជកម្ម។
លោក ALI VAEZ អ្នកស្រាវជ្រាវនៃមជ្ឈមណ្ឌលពិចារណាអន្តរជាតិ CRISIS GROUPយល់ថា ការចាកចេញពីកិច្ចព្រមព្រៀងនុយក្លេអ៊ែរអ៊ីរ៉ង់ ហើយដាក់ទណ្ឌកម្មឡើងវិញប្រឆាំងក្រុងតេហេរ៉ង់ គឺជាការខុសឆ្គងធំមួយក្នុងចំណោមការខុសឆ្គងធំៗនៃនយោបាយការបរទេសអាមេរិក ចាប់តាំងពីសង្គ្រាមអ៊ីរ៉ាក់មក។
ការវិលត្រឡប់នៃទណ្ឌកម្មនឹងធ្វើឲ្យធ្ងន់ធ្ងរថែមទៀតដល់សេដ្ឋកិច្ចអ៊ីរ៉ង់ ដែលបង្កកាលពីសប្ដាហ៍មុននូវបាតុកម្មតវ៉ាក្នុងទីក្រុងជាច្រើនប្រឆាំងជាពិសេស ភាពឥតការងារធ្វើអតិផរណា ខណៈប្រាក់រៀលអ៊ីរ៉ង់ធ្លាក់តម្លៃជិត២ភាគ៣ពីតម្លៃកាលពី៦ខែមុន មុនពេលងើបបន្តិចវិញរយៈពេលប៉ុន្មានថ្ងៃចុងក្រោយនេះ៕
ចែករំលែកព័តមាននេះ