ខេត្តកំពង់ធំ ៖ បុរសម្នាក់ជិះម៉ូតូលឿនបុកត្រាក់ទ័រមានដឹកឫស្សី បណ្តាលឱ្យស្លាប់ ហេតុការណ៍គ្រោះថ្នាក់ចរាចរណ៍នេះបានបង្កឲ្យមានការភ្ញាក់ផ្អើលមួយកើតឡើងកាលពីវេលាម៉ោង៩និង១៨នាទីយប់ថ្ងៃទី៧ ខែសីហា ឆ្នាំ២០១៨ នៅលើកំណាត់ផ្លូវជាតិលេខ៧១ ស្ថិតនៅក្នុងភូមិតាឌុក ឃុំបល្លង្ក័ ស្រុកបារាយណ៍ ខេត្តកំពង់ធំ ។
ជនរងគ្រោះដែលស្លាប់ឈ្មោះ ស៊ីម ម៉េងធី ភេទប្រុស អាយុ១៩ឆ្នាំ នៅភូមិបារាយណ៍ជាន់ដែក ឃុំបល្ល័ង្ក ស្រុកបារាយណ៍ ។
សមត្ថកិច្ចប្រាប់ឱ្យដឹងថា មុនកើតហេតុ គេបានឃើញបុរសម្នាក់មិនមានពាក់មួកការពារសុវត្ថិភាពជិះម៉ូតូមួយគ្រឿងម៉ាកហុងដា ធុនC125 ពណ៌ខ្មៅ ពាក់ស្លាកលេខ កំពង់ធំ ១B-១៩២៩ (ម៉ូតូកែច្នៃប្រភេទឆ្អឹង) បានជិះម៉ូតូទៅបុកពីក្រោយត្រាក់ទ័រមួយគ្រឿង ពណ៌ស្លាទុំ មានសណ្តោងរ៉ឺម៉ក ដឹកចំរៀកឫស្សីចងជាបាច់ៗ ក្នុងទិសដៅស្របគ្នាពីកើតទៅលិច បណ្តាលឱ្យអ្នកបើកបរម៉ូតូរងរបួសធ្ងន់ ហើយក៏បានស្លាប់ពេលបញ្ជូនទៅសង្គ្រោះនៅមន្ទីរពេទ្យបង្អែកបារាយណ៍សន្ទុក ។ ចំណែកអ្នកបើកបរត្រាក់ទ័រដែលមិនស្គាល់អត្តសញ្ញាណ បានរត់គេចខ្លួនបាត់ស្រមោល ។
ករណីខាងលើនេះ មូលហេតុបង្កឡើងដោយត្រាក់ទ័រសណ្តោងរ៉ឺម៉កមានដឹកចំរៀកឫស្សី មិនបានដាក់ភ្លើងបំភ្លឺខាងក្រោយតាមលក្ខណៈបច្ចេកទេស រួមផ្សំនឹងម៉ូតូកែច្នៃបើកលឿន និងដាក់ភ្លើងបំភ្លឺខុសលក្ខណៈបច្ចេកទេស ទើបបណ្តាលឱ្យមានគ្រោះថ្នាក់បែបនេះតែម្តង។
ក្រោយពេលកើតហេតុ សមត្ថកិច្ចចុះវាស់វែងរួច វត្ថុតាងត្រាក់ទ័រត្រូវបានយកទៅរក្សាទុកនៅប៉ុស្តិ៍នគរបាលរដ្ឋបាលបល្ល័ង្ក រីឯម៉ូតូរបស់ជនរងគ្រោះត្រូវបានយកទៅរក្សាទុកនៅអធិការរដ្ឋាននគរបាលស្រុកបារាយណ៍ ដើម្បីទុកដោះស្រាយតាមនីតិវិធី៕
ចែករំលែកព័តមាននេះ