ខេត្តកំពត ៖ ស្របពេលវិស័យកសិកម្មកាន់តែធ្វើទំនើបកម្មនោះ ក៏នៅមានប្រជាកសិករតាមតំបន់ខ្លះនៅតែធ្វើស្រែតាមប្រពៃណី និងប្រវាស់ដៃគ្នាជាក្រុមៗដែរ ។ ទោះបីជាយ៉ាងនេះក្ដី ពួកគាត់ត្អូញត្អែរថា បច្ចុប្បន្នការធ្វើស្រែកាន់តែពិបាកទៅៗ ព្រោះខ្វះកម្លាំងពលកម្ម,…
ខេត្តកំពត ៖ ស្របពេលវិស័យកសិកម្មកាន់តែធ្វើទំនើបកម្មនោះ ក៏នៅមានប្រជាកសិករតាមតំបន់ខ្លះនៅតែធ្វើស្រែតាមប្រពៃណី និងប្រវាស់ដៃគ្នាជាក្រុមៗដែរ ។ ទោះបីជាយ៉ាងនេះក្ដី ពួកគាត់ត្អូញត្អែរថា បច្ចុប្បន្នការធ្វើស្រែកាន់តែពិបាកទៅៗ ព្រោះខ្វះកម្លាំងពលកម្ម, សេវាកម្មជួលគ្រឿងយន្ដកសិកម្មថ្លៃ និងតម្លៃទិន្នផលមិនឆ្លើយតបនឹងការចំណាយ ។
បើតាមប្រជាកសិករនៅភូមិដើមពោធិ ឃុំអង្គសុរភី ស្រុកកំពង់ត្រាច ដែលនៅតែដកស្ទូងប្រវាស់ដៃគ្នាជាក្រុមៗតាំងពីយូរមកហើយនោះ បាននិយាយថា កសិករមួយភូមិនេះនៅតែដកស្ទូងស្រូវយកដៃគ្នាម្នាក់ម្ដងៗដដែល ទោះបីជាតាមតំបន់ខ្លះមានការប្រើប្រាស់គ្រឿងយន្ដកសិកម្មក្ដី ។ លោកថា ៖« នៅក្នុងភូមិនេះ ពួកយើងជួបការពិបាកក្នុងការធ្វើស្រែដូចជា ខ្វះខាតកម្លាំងដកស្ទូង ទោះមានលុយជួលក្តី ប៉ុន្តែរកអ្នកមកសុីឈ្នួលមិនបាន ហើយចំណាយលើការទិញជីក៏ថ្លៃ រហូតដល់ពេលផលស្រូវ បែរជាលក់បានថោកទៅវិញ »។
ចំណែកកសិករម្នាក់ទៀតក៏បាននិយាយឲ្យដឹងដែរថា ការធ្វើស្រែចេះតែពិបាកទៅៗ ហើយពួកគាត់មិនទទួលបានប្រាក់ចំណេញនោះទេ បើកាត់កងជាមួយការចំណាយលើការជួលត្រាក់ទ័រ ។
ប្រធានការិយាល័យកសិកម្មស្រុកកំពង់ត្រាច លោក ម៉េង សារិន បានឲ្យដឹងថា នៅស្រុកកំពង់ត្រាច កសិកបានដកស្ទូងក្នុងរដូវវស្សានេះបាន៦៩%ហើយ ។ លោកមានប្រសាសន៍ថា ៖« ជំនន់ទឹកភ្លៀងបានបង្កឲ្យខូចខាតសន្ទូងទាំងស្រុងមានចំនួន២២ហិកតានៅក្នុងឃុំកំពង់ត្រាចខាងលិច និងឃុំអង្គសុរភី » ។ លោកប្រធានការិយាល័យរូបនេះបន្តថា កាលពីមុន ពួកគាត់ដកស្ទូងតាមបែបបុរាណ ប៉ុន្តែឥឡូវនេះ ខ្វះតាំងពីកម្លាំងអូសទាញ មានលុយ ហើយពិបាករកអ្នកស៊ីឈ្នួលដែលត្រង់នេះហើយធ្វើកសិករជួបការពិបាក ។
ដោយសារតែជំនន់ទឹកភ្លៀងកំពុងតែបង្កផលប៉ះពាល់ដល់ផលដំណាំរដូវវស្សារបស់កសិករ ក្រសួងកសិកម្ម រុក្ខាប្រមាញ់ និងនេសាទ បានណែនាំដល់អង្គភាពបច្ចេកទេស និងមន្ទីរកសិកម្ម រុក្ខាប្រមាញ់ និងនេសាទគ្រប់រាជធានី-ខេត្ត ត្រូវយកចិត្តទុកដាក់អនុវត្តវិធានការចាំបាច់ និងបន្ទាន់មួយចំនួនផងដែរ ដូចជា ត្រូវតាមដានជាប្រចាំនូវស្ថានភាពទឹកជំនន់, ត្រៀមលក្ខណៈសង្គ្រោះបន្ទាន់, វាយតម្លៃផលប៉ះពាល់និងការខូចខាតដើម្បីទទួលបានតួលេខពិតប្រាកដ ។ ត្រូវសហការជាមួយអាជ្ញាធរមានសមត្ថកិច្ច ពិសេសមន្ទីរធនធានទឹក និងឧតុនិយម ដើម្បីចាត់វិធានការបញ្ចៀស បង្ការ និងទប់ស្កាត់ការខូចខាតដែលបណ្ដាលមកពីគ្រោះទឹកជំនន់តាមលទ្ធភាពជាក់ស្ដែង និងត្រូវពិនិត្យលទ្ធភាពផ្ដល់ពូជ ព្រមទាំងពូជដំណាំផ្សេងៗ សម្រាប់កិច្ចអន្តរាគមន៍ស្ដារការខូចខាតឡើងវិញជាដើម ៕
ចែករំលែកព័តមាននេះ