ខេត្តព្រៃវែង ៖ ប្រជាពលរដ្ឋដែលប្រកបមុខរបរដាំអំពៅនៅឃុំជាខ្លាង ស្រុកស្វាយអន្ទរ គ្រប់គ្នាពោពេញទៅដោយទឹកមុខញញឹមញញែមសប្បាយរីករាយព្រោះ ឆ្នាំនេះអំពៅដែលពួកគាត់ដាំ ទទួលបានទិន្និផលខ្ពស់ ហើយតម្លៃនៅលើទីផ្សារក៏លក់បានថ្លៃផងដែរ ។
លោក សាន់ ហ៊ីន ជាកសិករដាំអំពៅម្នាក់ក្នុងចំណោមកសិកររាប់រយនាក់ផ្សេងទៀតនៅភូមិជាខ្លាង ឃុំជាខ្លាង ស្រុកស្វាយអន្ទរ បានថ្លែងប្រាប់ទាំងអារម្មណ៍សប្បាយរីករាយថា ឆ្នាំនេះ អំពៅទទួលបានទិន្និផលខ្ពស់ជាងឆ្នាំមុន តម្លៃវិញក៏លក់បានថ្លៃគួរសម ហើយឈ្មួញមិនសាំញ៉ាំច្រើនទេមកទិញដល់កន្លែង ដឹកតាមឡានយកទៅលក់នៅភ្នំពេញ ។
កសិករដដែលនេះបានបញ្ជាក់ឲ្យដឹងថា ការដាំអំពៅត្រូវប្រើរយៈពេលចន្លោះពី៧ទៅ៨ខែ ទើបអាចប្រមូលផលបានដោយផ្អែកលើបច្ចេកទេសនៃការរៀបចំដីធ្វើរង ហើយក៏ទាមទារឲ្យអាកាសធាតុអំណោយផលផងដែរ ។ ជាទូទៅផ្ទៃដី១ហិកតា អាចដាំអំពៅបានចន្លោះពី៦ម៉ឺនទៅ៦ម៉ឺន៥ពាន់ដើម បើតម្លៃអំពៅលក់បានថ្លៃ អ្នកដាំអាចរកបានចំណូលបានក្នុង១ហិកតាប្រមាណជា៣០លានរៀលឯណោះ ។ ឆ្នាំនេះតម្លៃអំពៅក្នុង១ដើមលក់បានពី៦០០ទៅ៧០០រៀល ថ្លៃជាងឆ្នាំមុនដែលក្នុង១ដើមលក់បានតែ៤០០ទៅ៤៥០រៀលប៉ុណ្ណោះ ហើយបើឆ្នាំក្រោយតម្លៃអំពៅនៅតែបានថ្លៃដូចឆ្នាំនេះទៀត នោះចំនួនកសិករអ្នកដាំអំពៅច្បាស់ជាកើនឡើងច្រើនជាងមុនទ្វេដងជាក់ជាមិនខាន ។
ដោយឡែកលោក អ៊ុក សំណាង ប្រធានមន្ទីរកសិកម្មរុក្ខាប្រមាញ់ និងនេសាទខេត្តព្រៃវែង បានឲ្យដឹងផងដែរថា នៅទូទាំងខេត្តព្រៃវែងមានកសិករប្រកបមុខរបរដាំអំពៅសរុបប្រមាណជាង៣០០គ្រួសារ នៅលើផ្ទះដីជាង៥០០ហិកតា ក្នុងនោះស្រុកស្វាយអន្ទរ មានអ្នកដាំច្រើនជាងគេ ដោយឡែកស្រុកបាភ្នំ និងស្រុកព្រះស្តេចក៏មានអ្នកដាំដែរ ប៉ុន្តែក្នុងទ្រង់ទ្រាយតូចជាលក្ខណៈគ្រួសារ ដោយសារពួកគាត់ទើបតែចាប់ផ្តើមសាកល្បងដាំ ៕
ចែករំលែកព័តមាននេះ