ខេត្តពោធិ៍សាត់ ៖ ដោយការគិតគូរចំពោះកងទ័ព ពិសេសបុណ្យចូលឆ្នាំថ្មីប្រពៃណីជាតិជិតចូលមកដល់ផងនោះ កាលពីថ្ងៃទី៨ មេសា ២០១៣ លោកខូយ សុខា អភិបាលខេត្តពោធិ៍សាត់ លោកលី ណារុន តំណាងរាស្ត្រមណ្ឌលពោធិ៍សាត់ និងថ្នាក់ដឹកនាំមន្ទីរអង្គភាពនានាមួយចំនួនទៀតបានទៅសំណេះសំណាលសួរសុខទុក្ខ និងនាំយកអំណោយទៅផ្តល់ជូនកងទ័ពវរសេនាតូចការពារព្រំដែនគោកលេខ៥០៨ នៅព្រំដែនកម្ពុជា-ថៃ ស្ថិតក្នុងឃុំថ្មដា ស្រុកវាលវែង ដែលមានចម្ងាយជិត២០០គីឡូម៉ែត្រពីទីរួមខេត្ត ។
មេបញ្ជាការវរលោកនួន សែ បានជំរាបជូនពីភូមិសាស្ត្រ យុទ្ធសាស្ត្រ ក្នុងការការពារខ្សែបន្ទាត់ព្រំដែនដែលនៅទីនោះកម្លាំងឈរជើងមានវរ៥០៨ កងពល១៤៥ កងការពារព្រំដែនគោកលេខ៥០១ និងកម្លាំងជួរមុខគឺវរសេនាតូចនគរបាលការពារព្រំដែនគោកលេខ៨២៥ ។ ដោយឡែកទាហានកម្ពុជា និងទាហានថៃ ក៏ដូចជាប្រជាជនកម្ពុជា និងប្រជាជនថៃមានប្រាស្រ័យទាក់ទងគ្នាទៅវិញទៅមកជាធម្មតាក្នុងការការពារបូរណភាពទឹកដីរបស់ខ្លួន និងការដោះដូរទំនិញជាដើម។ ច្រក ច១ បើកឱ្យចេញចូលសម្រាប់ថ្ងៃសៅរ៍ និងថ្ងៃអាទិត្យ និងច្រកសុផាន់ ហ៊ីម បើកតែថ្ងៃព្រហស្បតិ៍ មួយប៉ុណ្ណោះ ។ ការរស់នៅរបស់កងទ័ពជួបបញ្ហាកង្វះទឹកនៅរដូវប្រាំងប្រឈមនឹងជំងឺគ្រុនចាញ់ គ្រុនពោះវៀន អាកាសធាតុប្រែប្រួល និងបញ្ហាគ្រាប់មីនកប់ក្នុងដី ៕
ចែករំលែកព័តមាននេះ