រាជធានីភ្នំពេញ ៖ ម្ចាស់ផ្ទះដឹងខ្លួនឃើញជនសង្ស័យកំពុងតែចងទ្វារផ្ទះពីខាងក្រៅបានទូរស័ព្ទហៅបងប្អូនមកដល់ឃាត់ខ្លួនប្រគល់ឲ្យសមត្ថកិច្ច បង្កឲ្យមានការភ្ញាក់ផ្អើលកាលពីវេលាម៉ោង៣និង៣០នាទីទៀបភ្លឺថ្ងៃទី៨ ខែសីហា ឆ្នាំ២០១៨ នៅផ្ទះជួលភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ ។
ជនសង្ស័យដែលត្រូវឃាត់ខ្លួនឈ្មោះ ប៉េះ យាង ភេទប្រុស អាយុ២០ឆ្នាំ មុខរបរមិនពិតប្រាកដ ស្នាក់នៅភូមិម្តុំផ្សារទំនើបសុវណ្ណា សង្កាត់ទំនប់ទឹក ខណ្ឌចំការមន មានស្រុកកំណើតនៅភូមិព្រៃ សង្កែឃុំខ្សែត ស្រុកកំពង់រោទិ៍ ខេត្តស្វាយរៀង។ ចំណែកជនរងគ្រោះជាម្ចាស់ផ្ទះឈ្មោះ កែវ សុវណ្ណរ៉ា ភេទប្រុស អាយុ៣៥ឆ្នាំ មុខរបរលក់ដូរ ត្រូវជាម្ចាស់ផ្ទះកើតហេតុខាងលើ ។
តាមប្រភពព័ត៌មានពីម្ចាស់ផ្ទះបានឲ្យដឹងថា នៅមុនពេលកើតហេតុ គាត់កំពុងតែដេកលង់លក់ ស្រាប់តែមានជនសង្ស័យខាងលើយកដែកលួសមកចងទ្វាររបស់គាត់ពីក្រៅផ្ទះ ដើរចងបន្ទប់ចំនួនពីរ និងចងបន្ទប់អ្នកដែលជួលផ្ទះគាត់មួយទៀត ភ្លាមៗនោះគាត់បានលួចមើលជនសង្ស័យខាងលើដើរចុះឡើងៗ ដោយសារតែគាត់ចេញក្រៅអត់រួច គាត់ក៏បានទូរស័ព្ទហៅបងប្អូនរបស់គាត់ ដើម្បីឲ្យជួយស្រាយចំណងដែលជនសង្ស័យចងទ្វារពីខាងក្រៅ ។
ប្រភពព័ត៌មានបានបន្តទៀតថា បន្ទាប់មក គាត់បានឃាត់ជនសង្ស័យភ្លាមៗសួរនាំ តែជនសង្ស័យនេះបានឆ្លើយថា ខ្លួនមិនបានចងទ្វារបន្ទប់ខាងលើនោះទេ ហើយសោដែលគាស់ក៏ខ្លួនមិនបានគាស់ដែរ គឺខ្លួនមកទីនេះដើម្បីរកឈ្មោះ ម៉ាប់ ។ លុះពេលសួរឈ្មោះ ម៉ាប់ ដែលជួលផ្ទះនៅទីនោះបានប្រាប់ថា មិនស្គាល់ជនសង្ស័យម្នាក់នេះទេ។
បើតាមប្រភពព័ត៌មានពីអ្នកជួលផ្ទះរបស់គាត់បាននិយាយថា នៅប្រមាណជិតកន្លះខែមុន អ្នកផ្ទះជួលបានបាត់ម៉ូតូអស់មួយគ្រឿងដែរ តែមិនបានដាក់ពាក្យបណ្ដឹង ហើយថ្ងៃដែលបាត់ម៉ូតូមុននេះក៏បានឃើញជនសង្ស័យខាងលើនៅកន្លែងកើតហេតុដែរ ។
ក្រោយពេលកើតហេតុ ជនសង្ស័យខាងលើត្រូវបានកំលាំងនគរបាលប៉ុស្តិ៍ចោមចៅ២នាំយកទៅសាកសួរបន្ត ៕
ចែករំលែកព័តមាននេះ