ខេត្តស្វាយរៀង ៖ កម្មករ-កម្មការិនីរោងចក្រ សេង យ៉ាវ ១៤០០នាក់ នាំគ្នាធ្វើកូដកម្មរយៈពេល២ថ្ងៃជាប់គ្នាមិនចូលធ្វើការ ហើយបានផ្ទុះជាបាតុកម្មតវ៉ារឿងថៅកែចិនកាត់លុយថ្ងៃទៅបោះឆ្នោត២ថ្ងៃ ហើយដាក់ចំនួនសម្ភារឲ្យផលិតកើនឡើង និងបង្ខំឲ្យធ្វើការថែមម៉ោង…
ខេត្តស្វាយរៀង ៖ កម្មករ-កម្មការិនីរោងចក្រ សេង យ៉ាវ ១៤០០នាក់ នាំគ្នាធ្វើកូដកម្មរយៈពេល២ថ្ងៃជាប់គ្នាមិនចូលធ្វើការ ហើយបានផ្ទុះជាបាតុកម្មតវ៉ារឿងថៅកែចិនកាត់លុយថ្ងៃទៅបោះឆ្នោត២ថ្ងៃ ហើយដាក់ចំនួនសម្ភារឲ្យផលិតកើនឡើង និងបង្ខំឲ្យធ្វើការថែមម៉ោង បើកម្មករ-កម្មការិនីណាមិនធ្វើតាមត្រូវបញ្ឈប់ពីការងារទើបផ្ទុះការតវ៉ា ។
ការធ្វើកូដកម្មផ្ទុះជាបាតុកម្មនេះបានកើតឡើងចាប់ពីថ្ងៃទី០៧ និងទី០៨ ខែសីហា ឆ្នាំ២០១៨ នៅរោងចក្រ សេង យ៉ាវ ធ្វើអំពូលភ្លើង ស្ថិតនៅភូមិដើមពោធិ ឃុំកណ្តៀងរាយ ស្រុកស្វាយទាប ។
បើតាមតំណាងកម្មករឈ្មោះ គង់ ដា ភេទប្រុស អាយុ២៣ឆ្នាំ នៅភូមិឆ្អឹងពោះ ឃុំចក ស្រុករំដួល បានឲ្យដឹងថា មូលហេតុនាំឲ្យកម្មករធ្វើកូដកម្ម និងបាតុកម្មនេះគឺ ទី១-ថៅកែចិន សេងយ៉ាវ កាត់លុយកម្មករថ្ងៃទៅបោះឆ្នោត២ថ្ងៃ គឺថ្ងៃសៅរ៍និងថ្ងៃចន្ទ ទឹកប្រាក់សរុប១៥ដុល្លារ រំលោភសិទ្ធិកម្មករ-កម្មការិនី ដែលសម្តេច ហ៊ុន សែន បានប្រកាសឲ្យបុគ្គលិក កម្មករ និយោជក់ ឈប់សម្រាករយៈពេល៣ថ្ងៃ ទៅបោះឆ្នោត ។
ទី២-ដាក់កំណត់ចំនួនសម្ភារឲ្យកម្មករផលិតកើនឡើង ហើយបង្ខំឲ្យកម្មករធ្វើការបន្ថែមម៉ោង បើកម្មករ-កម្មការិនីណាមិនព្រមតាមថៅកែកំណត់គឺបញ្ឈប់ការងារ ។ កន្លងមកថៅកែចិនបានកំណត់ឲ្យកម្មករម្នាក់ធ្វើអំពូលភ្លើងចំនួន៥០០០ដុំក្នុងមួយថ្ងៃ ដោយចូលធ្វើការចាប់ពីម៉ោង៧និង៣០នាទីព្រឹករហូតដល់ម៉ោង៦និង៣០នាទីល្ងាច ធ្វើស្ទើរតែមិនគ្រប់ចំនួន ថ្ងៃខ្លះមានការស្ទះផ្លូវយឺតយ៉ាវធ្វើមិនរួចត្រូវថៅកែប្រមាន ហើយប្រមាន៣ដងត្រូវបញ្ឈប់ការងារ ហើយបើបន្ថែមចំនួនសម្ភារឲ្យផលិតកើនឡើងទៀតកម្មករមិនអាចធ្វើបានទេ ។
ទី៣-សូមឲ្យថៅកែចិនបញ្ចូលកម្មករ-កម្មការិនីបណ្តែត៣០០នាក់ឲ្យជាកម្មករពេញសិទ្ធិ បើតាមលក្ខខណ្ឌសម្រាប់កម្មករចូលថ្មីធ្វើការបណ្តែតសាកល្បងរយៈពេល៥៤ថ្ងៃ បើធ្វើការល្អតាមលក្ខខណ្ឌត្រូវទទួលឲ្យធ្វើការពេញសិទ្ធិ ចំណែកកម្មករ-កម្មការនីធ្វើការម្នាក់ៗចាប់ពី៤ខែទៅ៥ខែ ហើយនៅតែមិនបានពេញសិទ្ធិទៀត ដោយថៅកែប្រើល្បិចមួយខែប្តូរកាតម្តង ដូច្នេះថ្មីរហូតធ្វើឲ្យខាតប្រយោជន៍របស់កម្មករ(ប្រាក់សុខភាព)បើតវ៉ាបញ្ឈប់ការងារភ្លាម ។
ទី៤-សុំជ្រើសរើសតំណាងសហជីពប្រចាំរោចក្រដោយខ្លួនឯងដោយបោះឆ្នោតកន្លងមកគ្មានសហជីពគ្មានតំណាងកម្មករ ។ ចំណែក៩ចំណុចទៀតជាចំណុចអាចចរចារបាន ។
កម្មករ-កម្មការនីភាគច្រើននិយាយថា ពួកគេចូលធ្វើការនៅរោងចក្រ សេង យ៉ាវ នេះដើម្បីបានសម្ភាសន៍ជាប់បានធ្វើការគឺត្រូវបង់ឲ្យអ្នកសម្ភាសន៍១៣០ដុល្លារទៅ១៥០ដុល្លារទើបបានជាប់ ហើយខ្លះធ្វើបាន៥ខែត្រូវគេបញ្ឈប់ការងារ ហើយប្រកាសជ្រើសរើសបុគ្គលិក កម្មករ ថ្មីរាល់ថ្ងៃ សូមក្រសួងកាងារមេត្តាជួយអន្តរាគមន៍ផង ៕
ចែករំលែកព័តមាននេះ