ខេត្តមណ្ឌលគិរី ៖ នារីវ័យជំទង់ម្នាក់ បានត្រូវមេការចម្ការកៅស៊ូចាប់រំលោភរួចគំរាមសម្លាប់ ប៉ុន្តែនាងបានប្រាប់ឪពុកម្តាយពីហេតុការណ៍ចាប់រំលោភនេះ ដែលបានកើតឡើងនៅឃំុស្រែព្រះ ស្រុកកែវសីមា ។
យោងតាមរបាយការណ៍របស់នគរបាលប៉ុស្តិ៍ឃំុស្រែព្រះ ដែលទទួលពាក្យបណ្តឹងនៅរសៀលថ្ងៃទី៤ ខែសីហាថា ក្មេងស្រីរងគ្រោះមានអាយុ១៥ឆ្នាំ និងមានស្រុកកំណេីតនៅស្រុកបារាយណ៍ ខេត្តកំពង់ធំ ។បច្ចុប្បន្ន នាងស្នាក់នៅជាមួយឪពុកម្ដាយធ្វេីកម្មករ ក្នុងក្រុមហ៊ុនប៊ិញភឿក១ ស្ថិតក្នុងឃំុស្រែព្រះ ស្រុកកែវសីមា ។ តាមក្មេងស្រីរងគ្រោះថា នាងត្រូវមេការរំលោភបានសម្រេច៣ដង ។
លោក វ៉ាន ដានីន អធិការនគរបាលស្រុកកែវសីមាឱ្យដឹងថា ក្រោយពីទទួលបានសេចក្តីរាយ ការណ៍របស់នគរបាលប៉ុស្តិ៍ស្រែព្រះ អមមកជាមួយនឹងពាក្យបណ្តឹង ភ្លាមៗនោះ លោកបានដឹកនាំកម្លាំងនគរបាលស្រុក សហការជាមួយនគរបាលរដ្ឋបាលប៉ុស្តិ៍ស្រែព្រះ ចុះទៅឃាត់ខ្លួនជនសង្ស័យនៅក្នុងក្រុមហ៊ុន ។
ជនសង្ស័យឈ្មោះ ហេង អាយុ៣១ឆ្នាំ ជាមេការមើលកម្មករឱ្យក្រុមហ៊ុនប៊ិញភឿក១ ត្រូវបានឃាត់ខ្លួនកាលពីថ្ងៃទី៥ ខែសីហា ។ ជនសង្ស័យមានទីលំនៅក្នុងឃំុកោះជំុ ស្រុកកណ្តៀង ខេត្តពោធិ៍សាត់ ៕
ចែករំលែកព័តមាននេះ