រាជធានីភ្នំពេញ ៖ បុរសម្នាក់ផឹកស្រាស្រវឹងជោគបានជិះម៉ូតូមួយគ្រឿងទៅបុកគូថរថយន្តម៉ាកCOROLLA បែកកញ្ចក់ខ្ទេច ហេតុការគ្រោះថ្នាក់ចរាចរណ៍នេះបានមានការភ្ញាក់ផ្អើល កាលពីវេលាម៉ោង០៩និង៣៥នាទីយប់ ថ្ងៃទី០៧ ខែសីហា ឆ្នាំ២០១៨ តាមបណ្តោយផ្លូវលេខ៣៥៥ មុខផ្ទះលក់គ្រឿងអេឡិចត្រូនិច សង្កាត់ទួលសង្កែ ខណ្ឌឬស្សីកែវ ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុមេឃរលឹមស្រិចៗគេបានឃើញរថយន្តមួយគ្រឿង ពណ៌ត្រីឆ្លូញ ពាក់ស្លាកលេខភ្នំពេញ២X- 9943 បើកបរដោយបុរសម្នាក់តាមបណ្តោយផ្លូវលេខ៣៥៥ពីកើតទៅលិច ខណៈមកដល់ចំណុចកើតហេតុខាងលើ បានឈប់រង់ចាំស្តុបដែលកំពុងតែស្ទះចរាចរណ៍ ស្រាប់តែមានម៉ូតូម៉ាកឃ្លីក ពណ៌ស ពាក់ស្លាកលេខភ្នំពេញ១AB-០០៥២ ជិះមកពីក្រោយ ក្នុងស្ថានភាពស្រវឹងស្រាផងនោះ បានបុកពេញទំហឹង បណ្តាលឲ្យដួលបែកមុខបែកមាត់ ចំណែករថយន្តបែកកញ្ចក់ផ្ទាំងខាងក្រោយខ្ទេច ។
ក្រោយពេលកើតហេតុសមត្ថកិច្ចមូលដ្ឋានបានមកចុះដល់ភ្លាមៗរួចក៏បាញ់ថ្នាំគូសវាសរង់ចាំភាគីសងខាងចរចាគ្នាតែខាងម៉ូតូមិនមានលុយសងសំណងទេ ទើបអ្នកបើករថយន្តលើកលែងមិនយកសំណងទេ សុខចិត្តជួសជុលរថយន្តខ្លួនឯងធ្វើឲ្យអ្នកបើកម៉ូតូត្រេកអរជាខ្លាំង និងបានថ្លែងអំណរគុណដល់ម្ចាស់រថយន្តដែលមិនបានទាមទារសំណង ៕
ចែករំលែកព័តមាននេះ