ខេត្តកណ្តាល ៖ អំពើហិង្សាមួយបានផ្ទុះឡើងកក្រើកក្រុងតាខ្មៅ កណ្តាលរាត្រីបង្កឡើងដោយយុវជនស្ទាវ២ក្រុម ដែលបានចូលផឹកសុីនៅក្នុងហាងអឹមដឺបេសហ្វូត (PUB) ដោយសារតែទាក់មាត់ឌឺដងដាក់គ្នា ក៏បានឈានដល់ការបើកឆាកប្រយុទ្ធ ចានហោះ កែវហើរធ្វើឱ្យមានការភ្ញាក់ផ្អើលដល់ក្រុមភ្ញៀវឯទៀតរត់ជាន់ជើងគ្នាផ្អើលដល់សមត្ថកិច្ចមូលដ្ឋាន និងអ្នករស់នៅជិតខាង ។ ទោះបីបែបណាការប្រទូស្តរា៉យគ្នានោះ បណ្តាលឱ្យយុវជនម្នាក់បែកក្បាលហូរឈាមស្រោចពេញខ្លួន ។
ហេតុការណ៍ហិង្សាគួរឱ្យភ្ញាក់ផ្អើលនេះបានកើតឡើងនៅវេលាម៉ោង១០និង៣០នាទីយប់ថ្ងៃទី៦ សីហា នៅចំណុចក្នុងហាងអឹមដឺ បេសហ្វូត (PUB) ស្ថិតនៅក្រោយវិទ្យាល័យសេរីភាពភូមិតាខ្មៅ សង្កាត់តាខ្មៅ ក្រុងតាខ្មៅ ។
យុវជនជាអ្នកតតាំងម្នាក់ហើយបានរងរបួសបែកក្បាលហូរឈាមនោះ ត្រូវបានគេស្គាល់អត្តសញ្ញាណគឺឈ្មោះ ហ៊ឹម វិថៃ អាយុ២៦ឆ្នាំ រស់នៅភូមិព្រែកហូរកេីត សង្កាត់ព្រែកហូរ ក្រុងតាខ្មៅ ខេត្តកណ្តាល ។ ចំណែកក្រុមបដិបក្សម្ខាងទៀតគ្នាច្រើននាក់ មិនត្រូវបានស្គាល់អត្តសញ្ញាណនោះទេ ព្រោះរត់យករួចខ្លួនគ្រប់គ្នា ពេលប៉ូលិសមកដល់ ។
សាក្សីនៅក្បែរកន្លែងប្រទូស្តរ៉ាយគ្នានេះបានបង្ហើបឱ្យដឹងថា នៅមុនពេលកើតហេតុ មានយុវជន២ក្រុម ដោយក្រុមម្ខាងមានគ្នាបីនាក់ និងក្រុមម្ខាងទៀតមានគ្នាច្រើននាក់បានចូលផឹកសុីនៅហាងខាងលើ ។ លុះមួយសន្ទុះក្រោយមកស្រវឹងដាប ធ្លាក់ភ្នែក ស្រាយចិញ្ចើមមុខកាច និងនិយាយឌឺដងផ្លែផ្កាដាក់គ្នា ស្រាប់តែស្ទុះក្រោកពីកៅអីបើកឆាកប្រយុទ្ធយកកែវស្រាគប់ដាក់គ្នាទៅវិញទៅមក ហើយបានវាយតប់គ្នាយ៉ាងក្រពុលមុខ ។
ក្រុមមានបក្សពួកច្រើនបានព្រួតគ្នា វាយនិងគប់កែវស្រោចទៅលើក្រុមម្ខាងទៀតដែលមានគ្នា៣នាក់ បណ្តាលឱ្យយុវជនម្នាក់បែកក្បាលរយះជាច្រើនកន្លែង ហូរឈាមស្រោចពេញខ្លួន បង្កឱ្យមានការភ្ញាក់ផ្អើលយ៉ាងខ្លាំង ។ បន្ទាប់មកក្រុមដែលមានគ្នាច្រើន បានឡើងជិះម៉ូតូនាំគ្នាគេចខ្លួនបាត់ស្រមោលអស់ មុនពេលសមត្ថកិច្ចមកដល់ ។ ភ្លាមៗនោះអ្នកបែកក្បាលបានបញ្ជូនទៅមន្ទីរពេទ្យ ។
ពាក់ព័ន្ធនឹងរឿងរ៉ាវនេះ បានលេចព័ត៌មានបង្ហើបឱ្យដឹងថា ហាងអឹមដឺបេសហ្វូត (PUB) តែងកើតមានហិង្សាវាយតប់គ្នាញឹកញាប់ណាស់ ហើយបើនិយាយពីបញ្ហាសំឡេងឮរកតែអ្នកជិតខាងដេកពួនពុំបានទេ ។ ពួកគាត់បានសំណូមពរទៅដល់អាជ្ញាធរមានសមត្ថកិច្ចមេត្តាជួយមានវិធានការកុំឱ្យមានការវាយតប់គ្នា និងសុំឱ្យម្ចាស់ហាងអស់ទាំងនោះបិទសំឡេងបន្តិចទៅ ពីព្រោះបើកតាំងពីម៉ោង៧យប់ ហើយមានថ្ងៃខ្លះបើកផឹកស៊ីរហូតទៅដល់ម៉ោង២រំលងអធ្រាត្រក៏មានដែរ ។
គួររំលឹកថា នៅថ្ងៃទី២៥ កក្កដាកន្លងមកនេះវេលាម៉ោង១១និង៣០នាទីយប់ នៅក្នុងហាងដដែលនេះ ក្មេងស្ទាវពីរក្រុមដែលចូលផឹកសុីនៅក្នុងហាងបានបង្កជម្លោះវាយតប់គ្នាទៅវិញទៅមក បង្កការភ្ញាក់ផ្អើលដល់សមត្ថកិច្ចក្រុងតាខ្មៅ ចុះទៅជួយអន្តាគមន៍ភ្លាមៗ ម្តងរួចមកហើយ ៕
ចែករំលែកព័តមាននេះ