ទីក្រុងប៉េកាំង ៖ យោងតាមសារព័ត៌មានក្នុងស្រុករបស់ប្រទេសចិនបានឲ្យដឹងថា ប្រទេសចិនបានត្រៀមខ្លួនសម្រាប់សង្គ្រាមពាណិជ្ជកម្មយូរអង្វែងជាមួយសហរដ្ឋអាមេរិក និងមិនភ័យខ្លាចលះបង់អត្ថប្រយោជន៍សេដ្ឋកិច្ចរយៈពេលខ្លីឡើយ បើទោះជាសហរដ្ឋអាមេរិកអាចនឹងចង់ដោះស្រាយជម្លោះនាពេលឆាប់ៗក្តី ។
សារព័ត៌មាន Global Times បានសរសេរកាលពីថ្ងៃអាទិត្យថា ខណៈប្រទេសចិនត្រូវតែការពារសិទ្ធិរបស់ខ្លួនក្នុងការអភិវឌ្ឍ ប្រជាជនចិនពិតជាចង់ចៀសវាងពីសង្គ្រាមពាណិជ្ជកម្មណាស់ ។
ប៉ុន្តែដោយមើលទៅលើតម្រូវការមិនសមហេតុផលរបស់សហរដ្ឋអាមេរិក សង្គ្រាមពាណិជ្ជកម្ម គឺជាសកម្មភាពដែលមានគោលដៅកៀបសង្កត់អធិបតេយ្យភាពសេដ្ឋកិច្ចរបស់ចិន និងព្យាយាមបង្ខំឲ្យចិនក្លាយជាចំណុះសេដ្ឋកិច្ចរបស់សហរដ្ឋអាមេរិក ដូចពេលដែលប្រទេសជប៉ុនព្រមព្រៀងជាមួយកិច្ចព្រមព្រៀង Plaza Accord ផងដែរ ។
សារព័ត៌មាននេះបន្តថា សហរដ្ឋអាមេរិកបានបាត់បង់ស្មារតីហើយទាក់ទងនឹងការធ្វើពាណិជ្ជកម្ម ។ សារព័ត៌មានកត់សម្គាល់ថា ប្រទេសចិន គឺជាគន្លឹះដ៏សំខាន់សម្រាប់ក្រុមហ៊ុនរបស់សហរដ្ឋអាមេរិកធំៗជាច្រើន និងកសិករអាមេរិក ជាដើម ។
គួរបញ្ជាក់ថា ប្រទេសសេដ្ឋកិច្ចធំជាងគេទាំងពីរនៅលើពិភពលោក (សហរដ្ឋអាមេរិក-ចិន) បានបង្កើនភាពតានតឹងផ្នែកពាណិជ្ជកម្មកាលពីសប្តាហ៍មុន ។ ប្រទេសចិនបានប្រកាសកាលពីថ្ងៃសុក្រថា ខ្លួនអាចនឹងដាក់ពន្ធបន្ថែមទៀត ដើម្បីឆ្លើយតបនឹងការសម្រេចចិត្តរបស់សហរដ្ឋអាមេរិក ។
ជាមួយគ្នានេះ យោងតាមអត្ថបទមួយរបស់សារព័ត៌មាន China Daily បានឲ្យដឹងថា ៖«ខណៈកំពុងជួបប្រទះនឹងការកៀបសង្កត់ដោយរដ្ឋាភិបាលសហរដ្ឋអាមេរិក លោកប្រធានាធិបតី ដូណាល់ ត្រាំ គឺប្រទេសចិនត្រូវតែរក្សាស្មារតីភ្លឺស្វាងរបស់ខ្លួន » ៕
ចែករំលែកព័តមាននេះ