ខេត្តត្បូងឃ្មុំ ៖ គ្រោះអកុសលមួយ ពិតជារឿងចៃដន្យមើលមិនឃើញមែន បណ្តាលឱ្យស្ត្រីម្នាក់ឈ្មោះ ថន ប៊ុនធឿន អាយុ៤៦ឆ្នាំ បានស្លាប់ភ្លាមៗនៅក្នុងរោងជាងជួសជុលម៉ូតូមួយកន្លែង ស្ថិតក្នុងភូមិស្អំ ឃុំក្រែក ស្រុកពញាក្រែក ដោយសារតែរថយន្តដឹកជញ្ជូនធុនធំមួយគ្រឿង ដាច់កង់ភ្លោះខាងក្រោយ បោលទៅបុកទាំងកំរោល កាលពីវេលាម៉ោង0៨ និង២៥នាទីព្រឹកថ្ងៃទី៥ ខែសីហា កន្លងទៅ នៅចន្លោះបង្គោល គីឡូ ម៉ែត្រ លេខ១៨៩-១៩០ លើដងផ្លូវជាតិលេខ៧ ។
មន្ត្រីនគរបាលចរាចរណ៍ស្រុកពញាក្រែកបានឲ្យដឹងថា រថយន្តវេអង ពាក់ផ្លាកលេខ ភ្នំពេញ២B២៣៣៥ បើកបរក្នុងទិសដៅចេញពីស្រុកពញាក្រែក គោលដៅទៅស្រុកមេមត់ ។ លុះទៅដល់់ចំណុចខាងលើស្រាប់តែរថយន្តដាច់កង់ភ្លោះបោលមកចំស្ត្រីឈ្មោះ ប៊ុនធឿន ដែលកំពុងអង្គុយនៅក្នុងរោង បណ្តាលឱ្យស្លាប់មួយរំពេច ។
ក្រៅពីបណ្តាលឲ្យស្ត្រីរូបនេះស្លាប់ កង់រថយន្តភ្លោះនោះបានបោលទៅបុកបុរសម្នាក់ទៀតឈ្មោះ សេង ម៉ាប់ អាយុ៤០ឆ្នាំ រស់នៅភូមិជីតុក ឃុំក្រែក ស្រុកពញាក្រែក ដែលមករង់ចាំធ្វើម៉ូតូ បណ្តាលឲ្យរងរបួសដែរ ។
ក្នុងហេតុការណ៍នេះ បណ្តាលឲ្យខូចខាតម៉ូតូ២គ្រឿង និងបាក់បង្គោលសំយាបរោង ឯរថយន្តទៅមុខឆ្ងាយបន្តិចក៏បានឈប់ហើយអ្នកបើកបរបានរត់គេចខ្លួនបាត់តែម្តង ។ ក្រោយកើតហេតុ មន្ត្រីនគរបាលចរា ចរណ៍ស្រុកបានទៅធ្វើការវាស់វែង និងប្រគល់សពឲ្យទៅសាច់ញាតិ ដើម្បីរៀបចំធ្វើបុណ្យតាមប្រពៃណី ។
ឯរថយន្តវេអងដែលដាច់កង់ ត្រូវបាននាំយកទៅរក្សាទុកនៅអធិការដ្ឋាននគរបាលស្រុកពញាក្រែកដើម្បីដោះស្រាយតាមច្បាប់ ៕
ចែករំលែកព័តមាននេះ