រាជធានីភ្នំពេញ ៖ បុរសម្នាក់ខ្ចីម៉ូតូកង់បីបងថ្លៃទៅលេងផ្ទះមិត្តភក្កិលុះត្រឡប់មកវិញមេឃភ្លៀងបានមូលវាំងនងរ៉ឺម៉កឡើងទៅលើ ក៏ត្រូវជនសង្ស័យ៣នាក់ធ្វើសកម្មភាពឆក់យកទូរស័ព្ទដៃមិនបានសម្រេច ហើយរត់គេចខ្លួនត្រូវសមត្ថកិច្ចប៉ុស្តិ៍ច្រាំងចំរេះក្របួចជាប់២នាក់យកទៅសួរនាំ ហេតុការណ៍នេះបានកើតឡើងកាលពីវេលាម៉ោង៨និង១៥នាទីយប់ ថ្ងៃទី០៧ ខែសីហា ឆ្នាំ២០១៨ តាមបណ្តោយផ្លូវជាតិលេខ៥ នៅចំណុចមុខសាលាបឋមសិក្សាច្រាំងចំរេះ២ ស្ថិតនៅក្នុងសង្កាត់ច្រាំងចំរេះ២ ខណ្ឌឬស្សីកែវ ។
ជនរងគ្រោះមានឈ្មោះ លះ អ៊ីសា ភេទប្រុស អាយុ២៤ឆ្នាំ ស្នាក់នៅផ្ទះលេខ17F ផ្លូវទន្លេសាប ក្រុម៤ ភូមិ៣ សង្កាត់ជ្រោយចង្វារ ខណ្ឌជ្រោយចង្វារ ។ ចំណែកឯជនសង្ស័យវិញមានឈ្មោះ ដា ណេត ភេទប្រុស អាយុ២១ឆ្នាំ មុខរបរមិនពិតប្រាកដ ស្នាក់នៅស្រុកបាធាយ ខេត្តកំពង់ចាម ស្នាក់នៅបច្ចុប្បន្នមិនពិតប្រាកដ និងម្នាក់ទៀតមិនបានស្គាល់ឈ្មោះ ។
តាមប្រភពព័ត៌មានពីជនរងគ្រោះបានឲ្យដឹងថា មុនពេលកើតហេតុគាត់បានខ្ចីម៉ូតូកង់បីបងថ្លៃគាត់ទៅផ្ទះមិត្តភក្តិនៅគីឡូលេខ៧ លុះពេលដែលត្រឡប់មកវិញមេឃភ្លៀងគាត់ក៏មូលវាំងនងនៅលើរ៉ឺម៉កម៉ូតូ ស្រាប់តែលេចមុខជនសង្ស័យ៣នាក់ មិនស្គាល់អត្តសញ្ញាណមកធ្វើសកម្មភាពឆក់យកទូរស័ព្ទដៃរបស់ជនរងគ្រោះដែលដាក់ទុកនៅក្បាលម៉ូតូក្បែរនឹងចង្កូតម៉ូតូបានសម្រេចហើយ ប៉ុន្តែជនរងគ្រោះស្រែកថា ចោរៗភ្លាមៗនោះសមត្ថកិច្ចក្របួចជាប់២នាក់ត្រូវប្រជាពលរដ្ឋវាយមួយដៃមួយជើងរងរបួសស្រាល រីឯបក្សពួកម្នាក់ទៀតមិនស្គាល់អត្តសញ្ញាណរត់គេចខ្លួន ។
ក្រោយពេលកើតហេតុជនរងគ្រោះបានទៅដាក់ពាក្យបណ្តឹងនៅប៉ុស្តិ៍រដ្ឋបាលនគរបាលច្រាំងចំរេះ២ ដើម្បីឲ្យសមត្ថកិច្ចកសាងសំណុំរឿងបញ្ចូនទៅកាន់តុលាការទៅតាមនីតិវិធី ៕
ចែករំលែកព័តមាននេះ