ខេត្តស្វាយរៀង ៖ អាជ្ញាធរខេត្តសាងសង់ស្ពានបាឡេមួយខ្សែដើម្បីឆ្លើយតបតាមសំណូមពររបស់បងប្អូន ប្រជាពលរដ្ឋ ដែលបានស្នើសុំនៅក្នុងវេទិការសាធារណៈរបស់ក្រុមការងារថ្នាក់ជាតិ ចុះមូលដ្ឋាន នៅក្រុងស្វាយរៀង និងដោយមើលឃើញពីតម្រូវការចាំបាច់របស់ពលរដ្ឋនាពេលកន្លងមក លោក ម៉ែន វិបុល អភិបាលនៃគណៈអភិបាលខេត្តស្វាយរៀង បានសម្រេចផ្តល់ជូននូវស្ពានបាឡេមួយខ្សែ មានប្រវែង ៣០ម៉ែត្រ និងទទឹង៤ម៉ែត្រ ដែលកំពុងដំណើការសាងសង់នៅពេលនេះ សម្រេចបានប្រមាណ៣០ ភាគរយហើយ។
ហើយនៅព្រឹកថ្ងៃទី៧ ខែសីហា ឆ្នាំ២០១៨នេះ លោកអភិបាលខេត្ត ក៏បានអញ្ជើញជួប សំណេះសំណាល ជាមួយបងប្អូនប្រជាពលរដ្ឋ និងចុះពិនិត្យមើលការស្ថាបនាស្ពានផងដែរ។ លោកអភិបាលខេត្ត បានថ្លែងផ្តាំផ្ញើដល់បងប្អូនប្រជាពលរដ្ឋ ត្រូវចូលរួមជួយថែរក្សាស្ពានឲ្យបានល្អ ដើម្បីធានាបាននូវការប្រើប្រាស់ឲ្យបានយូរអង្វែង សម្រាប់បម្រើផលប្រយោជន៍រួមទាំងអស់គ្នា និងបានថ្លែងអំណរគុណដល់បងប្អូនប្រជាពលរដ្ឋ ដែលបានបោះឆ្នោតគាំទ្រគណបក្សប្រជាជនកម្ពុជា នៅអាណត្តិទី៦ ដើម្បីបន្តការដឹកនាំ និងអភិវឌ្ឍន៍ឲ្យរីកចម្រើនលើគ្រប់វិស័យបន្តទៀត។
បងប្អូនប្រជាពលរដ្ឋ ដែលទទួលបានសមិទ្ធផលស្ពាននេះ បានសម្ដែងនូវការត្រេកអរ និងសប្បាយរីករាយ ព្រមទាំងបានថ្លែងអំណរគុណដល់លោកអភិបាលខេត្ត ដែលជានិច្ចកាលតែងតែបានចុះជួយ និងយកចិត្តទុកដាក់ពីសុខទុក្ខ និងដោះស្រាយសំណូមនានា ជូនប្រជាពលរដ្ឋគ្រប់ពេលវេលា។ នៅក្នុងពិធីនេះដែរ លោកអភិបាលខេត្ត ក៏បានឧត្តម្ភដល់បងប្អូនប្រជាពលរដ្ឋ ដែលចូលរួមក្នុងម្នាក់ៗ ទទួលបានថវិកាចំនួន២០,០០០រៀលផងដែរ៕
ចែករំលែកព័តមាននេះ