រាជធានីភ្នំពេញ ៖ នគរបាលខណ្ឌសែនសុខ កាលពីរសៀលថ្ងៃទី៥ ខែសីហា បានចាប់បញ្ជូនមន្ត្រីយោធាម្នាក់ដែលពាក់ព័ន្ធនឹងការប្រើកាំភ្លើងវាយក្បាលអ្នកលក់ប្រហិតបណ្ដាលឱ្យរងរបួស ដើម្បីជូនតំណាងអយ្យការសាលាដំបូងរាជធានីភ្នំពេញ ចាត់ការតាមផ្លូវច្បាប់ ដែលសំណុំរឿងនេះ ស្ថិតនៅដៃលោកស្រី ស៊ឺ វណ្ណនី ព្រះរាជអាជ្ញារងធ្វើការសាកសួរ ។
មុននេះ មានការភ្ញាក់ផ្អើលយ៉ាងខ្លាំង តាមរយៈវីដេអូឃ្លីបបង្ហោះតាមបណ្តាញសង្គម ដែលបុរសកោងកាចរូបនេះ តាំងខ្លួនជាអ្នកមានអំណាចខ្លាំងដកកាំភ្លើងវាយបុរសម្នាក់យ៉ាងឃោរឃៅ នៅក្នុងចំណោមមនុស្សម្នារាប់រយនាក់ ដែលឈរមើលដោយការស្អប់ខ្ពើមលើជនកម្រោលម្នាក់នេះ ដែលខ្លាំងសម្រាប់អ្នកតូចទាបលក់ប្រហិតចៀនតាមចិញ្ចើមផ្លូវ ។ ជននេះ ក៏បានទទួលរងនូវការថ្កោលទោសយ៉ាងចាស់ដៃផងដែរ ។
មន្ត្រីយោធារូបនេះឈ្មោះ នួន ប៉ូ ភេទប្រុស អាយុ៤៩ឆ្នាំ ស្នាក់នៅផ្ទះលេខ៥៩Q ផ្លូវលេខ២៦៥ សង្កាត់ទឹក ល្អក់ទី៣ ខណ្ឌទួលគោក ។ចំណែកជនរងគ្រោះក្នុងហេតុការណ៍នេះ ឈ្មោះ យ៉ែម វណ្ណៈ ភេទប្រុស អាយុ
២៥ឆ្នាំ ស្នាក់នៅផ្ទះជួលក្នុងភូមិគោកឃ្លាង សង្កាត់គោកឃ្លាង ខណ្ឌសែនសុខ របួសដៃស្តាំ និងសៀតផ្កាខាង ឆ្វេង។
គួរបញ្ជាក់ថា ហេតុការណ៍នេះបានកើតឡើងកាលពីយប់ថ្ងៃទី២ ខែសីហា នៅតាមផ្លូវបេតុង ភូមិរោងចក្រ សង្កាត់គោកឃ្លាង ខណ្ឌសែនសុខខណៈឈ្មោះ សៅ ចាន់ធី បើករថយន្តរបស់ខ្លួនម៉ាកកាមរីបាឡែនដល់ចំណុចខាងលើ បានជ្រុលទៅបុកជាមួយរ៉ឺម៉កម៉ូតូលក់ប្រហិតរបស់ឈ្មោះ យ៉ែម វណ្ណៈ ។ ពេលរថយន្តបុករ៉ឺម៉កម៉ូតូលក់ប្រហិតហើយ ឈ្មោះ សៅ ចាន់ធី មិនបានឈប់រថយន្តដើម្បីធ្វើការដោះស្រាយជាមួយអ្នកលក់ប្រហិតទេ ។ ពេលនោះអ្នកលក់ប្រហិតបានយកដុំថ្មគប់ទៅលើរថយន្តរបស់ឈ្មោះ សៅ ចាន់ធី បណ្តាឱ្យបែកញ្ចក់ខាងស្តាំ និងបានប្លាតទៅត្រូវរថយន្តម៉ាកព្រូសរបស់ជនឈ្មោះ នួន ប៉ូ ។
ភ្លាមនោះឈ្មោះ នួន ប៉ូ បានទាញយកកាំភ្លើងខ្លីម៉ាកP០៨ ចេញពីក្នុងរថយន្តរបស់ខ្លួន ហើយស្ទុះទៅវាយក្បាលឈ្មោះ យ៉ែម វណ្ណៈ បណ្តាឱ្យរបួស ។ បន្ទាប់មក សមត្ថកិច្ចក៏ទៅដល់ និងបាននាំខ្លួនឈ្មោះ នួន ប៉ូ ទៅសាកសួរនៅអធិការដ្ឋាននគរបាលខណ្ឌសែនសុខ ។ ក្រោយពីសាកសួរហើយ សមត្ថកិច្ចបានរាយការណ៍ទៅស្ថាប័នអយ្យការ ដើម្បីសុំការសម្រេច ហើយតំណាងអយ្យការសាលាដំបូងរាជធានីភ្នំពេញ តម្រូវឱ្យសមត្ថកិច្ចឃាត់ខ្លួនឈ្មោះ នួន ប៉ូ បញ្ជូនទៅសាលាដំបូងតាមនីតិវិធី ។
នៅល្ងាចថ្ងៃទី៥ ខែសីហា តំណាងអយ្យការបានធ្វើការសាកសួរជនត្រូវចោទចប់សព្វគ្រប់ហើយ ប៉ុន្តែមិន
ទាន់សម្រេចធ្វើការចោទប្រកាន់នៅឡើយទេ ។ដូច្នេះ ជនសង្ស័យត្រូវបានផ្ញើទៅសមត្ថកិច្ចគ្រប់គ្រងបណ្តោះអាសន្នវិញ និងតម្រូវឱ្យបញ្ជូនទៅនៅព្រឹកថ្ងៃទី៦ ខែសីហាទៀត ដើម្បីចាត់បញ្ជូនទៅចៅក្រមសើុបសម្រេចឃុំខ្លួន ឬមិនឃុំខ្លួនអាស្រ័យលើអង្គហេតុនៃបទល្មើស ៕
ចែករំលែកព័តមាននេះ