ខេត្តកែប ៖ រូបសំណាកប្រធានកម្មករធ្វើផ្លូវរថភ្លើងឈរកាន់ប៉ែលជាប់នឹងផ្លូវរទេះភ្លើង គឺជារូបអនុស្សាវរីយ៍បន្សល់ទុកច្រើនឆ្នាំមកហើយ ។ រូបសំណាកនេះស្ថិតនៅខាងជើងស្ថានីយរថភ្លើងដំណាក់ចង្អើរចម្ងាយ២០ម៉ែត្រ ក្នុងភូមិដំណាក់ចង្អើរ ឃុំព្រៃធំ ស្រុកដំណាក់ចង្អើរ ខេត្តកែប ។
ទាក់ទិននឹងប្រវត្តិរូបសំណាក បើតាមអ្នករស់នៅក្បែរនោះជាច្រើនគ្រួសារបាននិយាយឲ្យដឹងកាលពីពេលថ្មីៗកន្លងមកថា សម្ដេចព្រះនរោត្តម សីហនុ កសាងឡើងចន្លោះឆ្នាំ១៩៥៨ និងរួចរាល់នៅឆ្នាំ១៩៦២ ឬ១៩៦៣។ នៅអំឡុងឆ្នាំនោះសម្ដេចព្រះនរោត្តម សីហនុ បានយាងទៅសម្ពោធស្ថានីយរថភ្លើង និងរូបសំណាកឈរកាន់ប៉ែល ។ ក្នុងកម្មវិធីសម្ពោធនោះសម្ដេចព្រះនរោត្តម សីហនុ បានយាងតាមព្រះរាជទីនាំងរថយន្ដដ៏ទំនើប និងមានក្រុមសិល្បៈប្រចាំរាជវាំងចូលរួមសម្តែងផងដែរ ។
អ្នកភូមិចាស់ៗជាច្រើននាក់មានប្រសាសន៍ដូចៗគ្នាទៀតថា នៅពេលសម្ដេចព្រះនរោត្តម សីហនុ យាងចូលរួមកម្មវិធីសម្ពោធនោះបានមានព្រះរាជបន្ទូលថា ចំពោះរូបសំណាកបុរសឈរកាន់ប៉ែលនោះដាក់ឈ្មោះថា «ពូរ៉េត» ជាប្រធានកម្មក និងជាប្រធានផ្នែកកសាងផ្លូវរទេះភ្លើងទូទាំងប្រទេស ។ បច្ចុប្បន្ននេះប្រជាពលរដ្ឋរស់នៅខេត្តកែបបានហៅរូបសំណាកឈរកាន់ប៉ែលថា «ពូរ៉េតៗ» គ្រប់គ្នា ។
ដូចជាគ្មានឯកសារច្បាស់លាស់ទេ ក្រៅពីប្រជាលពរដ្ឋនិទានពីប្រវត្តិនៃរូបសំណាកនោះ។ ចំពោះក្មេងៗស្រករក្រោយតែងតែបានលឺ ចាស់ៗ និយាយតគ្នារហូតបច្ចុប្បន្ន ។
អ្នកភូមិបានបន្តទៀតថា រូបសំណាកពូរ៉េតបានរងគ្រាប់កាំភ្លើងចំផ្ទៃមុខ និងក្បាលជាច្រើនគ្រាប់កាលពីនៅមានសង្គ្រាមជាមួយពួកខ្មែរក្រហមអំឡុងក្រោយឆ្នាំ១៩៧៩ ។
ពួកទាហានខ្មែរក្រហមបានបាញ់ស៊ីបលេងទៅលើរូបសំណាកពូរ៉េត ។ រហូតដល់សព្វថ្ងៃនេះពូរ៉េតនៅមានស្នាមរបួសពេញផ្ទៃមុខ និងដងខ្លួន ។ ប្រជាពលរដ្ផដែលរស់នៅក្បែររូបសំណាកពូរ៉េតចង់ឱ្យអាជ្ញាធរដែនដីជួសជុលរូបសំណាកពូរ៉េត ឲ្យស្អាតឡើងវិញ។
បច្ចុប្បន្នរូបសំណាកពូរ៉េត ត្រូវព្រៃដុះព័ទ្ធជុំវិញ ។ ចំណែកស្ថានីយរថភ្លើងក៏បែកបាក់ខូចខាតអស់ដែរនៅជំនាន់ប៉ុល ពត ៕
ចែករំលែកព័តមាននេះ