ខេត្តប៉ៃលិន ៖ បន្ទាប់ពីដំណាំពោតក្រហមធ្លាក់ថ្លៃអស់ប៉ុន្មានខែកន្លងទៅរហូតមកដល់រសៀលថ្ងៃទី០៦ ខែសីហា ឆ្នាំ២០១៨នេះឈ្មួញនៅតាមស្តង់មួយចំនួនចាប់ផ្តើមតម្លើងថ្លៃវិញហើយ ដែលធ្វើឱ្យប្រជាពលរដ្ឋមានការសប្បាយរីករាយប្រញាប់នាំគ្នាប្រមូលផលជួលរថយន្តដឹកយកទៅលក់បានប្រាក់សម្រាប់សងជំពាក់បំណុលគេ និងសល់មួយចំនួនទុកសម្រាប់ផ្គត់ផ្គង់ជីវភាពគ្រួសារ ។
តាមការរៀបរាប់ពីកសិករម្នាក់ឈ្មោះ ង៉ែត សុផល អាយុ៤៥ឆ្នាំ រស់នៅភូមិបរតាំងស៊ូ សង្កាត់បរយ៉ាខា ក្រុងប៉ៃលិនបានឱ្យដឹងថា នៅឆ្នាំ២០១៨នេះគាត់បានដាំពោតចំនួន១៧ហិកតា ហើយក៏បានប្រមូលផលដឹកលក់ជាណ្តើរៗផងដែរ ។ លោកបន្តទៀតថា បន្ទាប់ពីតម្លៃទីផ្សារពោតក្រហមធ្លាក់ថ្លៃអស់រយ:ពេលប្រហែល២ទៅ៣ខែកន្លងទៅធ្វើឱ្យម្នាក់ៗមានការលំបាកក្នុងការលក់ដូរយ៉ាងខ្លាំង ។
លោកបន្តទៀតថា កាលពីដើមដំបូង ពោតក្រហម១គីឡូក្រាម ឈ្មួញទិញតម្លៃ៥បាត (ប្រាក់ថៃ) ជាង៥០០រៀល លុះក្រោយមក ខណ:ប្រជាពលរដ្ឋនាំគ្នាប្រមូលផលកាន់តែច្រើនស្រាប់ តែតម្លៃមានការធ្លាក់ចុះរហូតដល់១គីឡូក្រាមឈ្មួញទិញត្រឹមតែ៤បាត ឬ៣.៨បាតប៉ុណ្ណោះ។ ប៉ុន្តែនៅពេលនេះតម្លៃពោតក្រហមចាប់ផ្តើមឡើងជាបណ្តើរៗវិញហើយ ដោយ១គីឡូក្រាម ឈ្មួញទិញតម្លៃ៤.២បាត ទៅ៤.៣បាត គឺស្តង់មួយកន្លែងស្ថិតនៅក្នុងភូមិអូរអណ្តូង ឃុំអូរអណ្តូង ស្រុកសាលាក្រៅ ។ តែបើស្តង់នៅក្បែរចម្ការរបស់គាត់មិនទាន់ឡើងថ្លៃនោះទេ ដោយមួយគីឡូក្រាមគេទិញត្រឹមតែ៤បាតប៉ុណ្ណោះ ។
គាត់បញ្ជាក់ថា ថ្លៃឈ្នួលកម្មករដើរប្រមូលផលតាមចម្ការបច្ចុប្បន្ននេះឡើងថ្លៃជាងមុនៗដោយ១បាវគេទារ៧០០០រៀល ហើយជួលអ្នកលីសែងដាក់ក្នុងរថយន្តក្នុង១តោន១ម៉ឺនរៀល និងថែមទាំងជួលរថយន្តគេដឹកទៅលក់នៅតាមស្តង់ ក្នុង១តោន១ម៉ឺន៥០០០រៀលផងដែរ ។ ដូច្នេះទូរទាត់ទៅ បន្ទាប់ពីប្រមូលផលរួចរាល់ បើសិនជាតម្លៃពោតក្រហមឡើងថ្លៃចាប់ពី៤.២ទៅ៤.៥ ឬរហូតដល់៥បាតនោះអាចនឹងសល់ខ្លះសម្រាប់ផ្គត់ផ្គង់ជីវភាពគ្រួសារ ។
គាត់ក៏សំណូមពរដល់មន្ទីរពាក់ព័ន្ធ ក៏ដូចជាអាជ្ញាធរខេត្ត ឱ្យជួយរកទីផ្សារ សម្រាប់ប្រជាពលរដ្ឋរស់នៅក្នុងខេត្តប៉ៃលិន ឱ្យទីផ្សារកសិផលដំឡូងមី ក៏ដូចជាពោតក្រហមមានការឡើងថ្លៃផង ដែរ ព្រោះពួកគាត់គ្មានអ្វីទីពឹងក្រៅពីចម្ការនោះឡើយ ហើយបើសិនជាឈ្មួញបន្ថោកតម្លៃរហូតនោះ ពួកគាត់កាន់តែជំពាក់បំណុលគេច្រើនឡើងៗ ។
ចំណែកបុរសម្នាក់ ឈ្មោះ ណៃ នុន អាយុ៤៦ឆ្នាំ ជាម្ចាស់រថយន្តច្នៃដឹកផ្លែពោតបានឱ្យដឹង ថា រហូតមកដល់ពេលនេះទីផ្សារពោតក្រហមឡើងជាងមុនបន្តិចវិញហើយ ដូច្នេះគាត់ក៏មានការ សប្បាយរីករាយក្នុងចិត្តជួសឱ្យកសិករផងដែរ ។ គាត់បន្តទៀតថា ការស៊ីឈ្នួលដឹកពោតក្រហមនេះក្នុង១រថយន្តបានថ្លៃ១៥ម៉ឺនរៀល ដោយចេញពីប៉ៃលិនឆ្ពោះទៅលក់នៅស្រុកសាលាក្រៅចម្ងាយជិត១០គីឡូម៉ែត្រ បើជិតជាងនោះក៏តម្លៃទាបផងដែរ ។
គាត់បន្តទៀតថា កាលពីឈ្នួញថៃចូលទិញដល់ក្នុងចម្ការតម្លៃហាក់ដូចជា ប្រសើរជាងនេះ លុះគេធ្វើស្តង់ពោតកាន់តែច្រើនឱ្យឈ្មួញខ្មែរទិញដោយពួកគាត់ដឹកដល់ស្តង់ហើយ នៅតែតម្លៃទាបគួរឱ្យកត់សម្គាល់ ៕
ចែករំលែកព័តមាននេះ