រាជធានីភ្នំពេញ ៖ ប្តីប្រពន្ធពីរនាក់ជិះម៉ូតូមួយគ្រឿងដើម្បីដឹកកំពិសលីងដើរលក់តាមហាង ដោយបើកម៉ូតូលឿនពេកមិនបានប្រយ័ត្នក៏ជ្រុលទៅបុកម៉ូតូមួយគ្រឿងរបស់ជនជាតិបរទេសបណ្តាលឱ្យដួលទាំងសងខាង រួចក៏បានវាយគ្នា បង្កការភ្ញាក់ផ្អើលពេញស្តុបសាលាចតុមុខ ។ ហេតុការណ៍នេះបានកើតឡើងកាលពីវេលាម៉ោង៩និង៣០នាទីយប់ថ្ងៃទី៦ ខែសីហា ឆ្នាំ២០១៨ តាមបណ្តោយផ្លូវព្រះនរោត្តមកែងផ្លូវ២១៤ នៅចំណុចស្តុបសាលារៀនចតុមុខ ស្ថិតនៅក្នុងសង្កាត់ជ័យជំនះ ខណ្ឌដូនពេញ ។
សាក្សីដែលឃើញហេតុការណ៍បានឱ្យដឹងថា មុនពេលកើតហេតុ គេឃើញ២នាក់ប្តីប្រពន្ធដែលប្តីជាជនជាតិបរទេស ចំណែកប្រពន្ធជាជនជាតិខ្មែរជិះម៉ូតូមួយគ្រឿងមិនចាំម៉ាកបើកបរតាមបណ្តោយផ្លូវព្រះនរោត្តមក្នុងទិសទិសដៅពីត្បូងទៅជើង ពេលមកដល់ចំណុចកើតហេតុខាងលើបានបន្ថយល្បឿន លុះដល់ស្តុបបំបែកជាបួនក៏ស្រាប់តែមានប្តីប្រពន្ធពីរនាក់ជិះម៉ូតូមួយគ្រឿងម៉ាកស្គូពី ពណ៌ស ពាក់ស្លាកលេខ ភ្នំពេញ ២AV-៨៩៧៧ បើកបរតាមបណ្តោយផ្លូវព្រះនរោត្តមទិសដៅស្របទិសគ្នាដើម្បីដឹកប្រពន្ធទៅលក់កំពិសលីងតាមហាងផឹកស៊ី ។
ប្រភពដដែលបានបន្តថា ប្តីដែលជាអ្នកបើកបរម៉ូតូម៉ាកស្គូពីនោះសង្ស័យស្រវឹងបើកម៉ូតូក្នុងល្បឿនយ៉ាងលឿនមិនបានប្រយ័ត្នក៏ជ្រុលទៅបុកគូទម៉ូតូរបស់ជនជាតិបរទេសចំពីក្រោយ បណ្តាលឱ្យដួលទាំងសងខាង និងរងរបួសស្រាល ភ្លាមៗនោះអ្នកបើកបរម៉ូតូម៉ាកហុងដាស្គូពីបុកគេហើយបែរជាយកជើងទៅធាក់ប្រពន្ធជនជាតិបរទេសនោះទៀត ទើបជនជាតិបរទេសនោះខឹងក៏វាយ២ទៅ៣ដៃ បណ្តាលឱ្យអ្នកបើកបរម៉ូតូម៉ាកស្គូពីរងរបួសបែកច្រមុះ រួចបុរសដែលជាជនជាតិបរទេសបានបើកម៉ូតូចេញទៅបាត់ ទុកឱ្យប្រពន្ធដែលជាជនជាតិខ្មែរឱ្យនៅដោះស្រាយជាមួយភាគីខាងម៉ូតូម៉ាកស្គូពី ដោយឈ្លោះប្រកែកគ្នាអស់មួយប្រាវ ក៏ត្រូវបានសមត្ថកិច្ចមកជួយសម្របសម្រួលឱ្យចរចាគ្នា ។
ក្រោយពេលកើតហេតុ ខាងស្ត្រីខ្មែរដែលត្រូវជាប្រពន្ធជនជាតិបរទេសនោះសុខចិត្តសងជំងឺចិត្តចំនួន១០០ដុល្លារទៅឱ្យភាគីខាងម៉ូតូម៉ាកស្គូពីដើម្បីបញ្ចប់រឿងនៅកន្លែងកើតហេតុ៕
ចែករំលែកព័តមាននេះ