ខេត្តស្វាយរៀង ៖ បច្ចុប្បន្ននេះ ប្រជាពលរដ្ឋបានបង្ហាញនូវការព្រួយបារម្ភជុំវិញការបាត់សត្វពាហនៈរកមិនដែលឃើញដោយសារចោរលួច ។ ពួកគាត់មានមន្ទិលថា ដោយសារមានក្រុមហ៊ុននាំគោក្របីចេញទៅលក់នៅប្រទេសវៀតណាម គ្មានការត្រួតពិនិត្យពីមន្ត្រីជំនាញច្បាស់លាស់ ទើបជាការចន្លោះប្រហោងមួយ ដែលអាចឱ្យក្រុមចោរលួចគោក្របីអ្នកស្រុក…
ខេត្តស្វាយរៀង ៖ បច្ចុប្បន្ននេះ ប្រជាពលរដ្ឋបានបង្ហាញនូវការព្រួយបារម្ភជុំវិញការបាត់សត្វពាហនៈរកមិនដែលឃើញដោយសារចោរលួច ។ ពួកគាត់មានមន្ទិលថា ដោយសារមានក្រុមហ៊ុននាំគោក្របីចេញទៅលក់នៅប្រទេសវៀតណាម គ្មានការត្រួតពិនិត្យពីមន្ត្រីជំនាញច្បាស់លាស់ ទើបជាការចន្លោះប្រហោងមួយ ដែលអាចឱ្យក្រុមចោរលួចគោក្របីអ្នកស្រុក បន្លំលក់ឱ្យឈ្មួញតាមរយៈក្រុមហ៊ុន ដែលគេឃើញដឹកតាមរថយន្តយកទៅតំបន់ព្រំដែន រួចដឹកចេញតាមច្រករបៀងក្នុងមួយថ្ងៃៗពី២០ ទៅ៣០ក្បាល ។
ជាក់ស្តែង កាលពីថ្ងៃទី២ ខែសីហាកន្លងទៅ ឈ្មួញបានដឹកក្របីជាង២០ក្បាលតាមរថយន្ត២គ្រឿង ចុះនៅចំណុចវត្តតាឡុក ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ដែលមួយគ្រឿងម៉ាកហ៊ីយ៉ាន់ដាយ ចំណុះ២តោនកន្លះ ពាក់ផ្លាកលេខ ភ្នំពេញ ៣B-០៣៤៨ និងមួយគ្រឿងទៀតម៉ាកហ៊ីយ៉ាន់ដាយចំណុះ២តោនកន្លះដូចគ្នា ពណ៌ស មិនមានផ្លាកលេខ ។
ទាក់ទងនឹងការនាំក្របីចេញទៅប្រទេសវៀតណាមនេះ លោក ឈិន សៅ មន្ត្រីការិយាល័យផលិតកម្មនិងបសុព្យាបាលនៃមន្ទីរកសិកម្មរុក្ខាប្រមាញ់និងនេសាទខេត្ត និយាយថា បញ្ហាឈ្មួញនាំក្របីចេញទៅប្រទេសវៀតណាមតាមច្រករបៀងវត្តតាឡុក ក្រុងបាវិតនេះ លោកមិនបានដឹងទេ ។ កន្លងមក មានក្រុមហ៊ុនយុវពាណិជ្ជជាអ្នកគ្រប់គ្រងការនាំក្របីឆ្លងកាត់និងគ្រប់គ្រងប្រមូលទិញគោក្របីផ្គត់ផ្គង់ទីផ្សារក្នុងស្រុក ឬឡសត្តឃាតក្នុងខេត្តប៉ុណ្ណោះ ឯរឿងនាំគោក្របីចេញលោកអត់បានដឹងទេ ។
ពាក់ព័ន្ធនឹងករណីនាំគោក្របីចេញទៅប្រទេសវៀតណាមនេះដែរ តំណាងក្រុមហ៊ុនយុវពាណិជ្ជបានឱ្យដឹងថា បញ្ហាច្បាប់ទម្លាប់គាត់មិនសូវដឹងទេ ព្រោះគាត់គ្រាន់តែជាអ្នកមើលការងារឱ្យក្រុមហ៊ុននាំក្របីឆ្លងកាត់ប៉ុណ្ណោះ ។ រីឯគោក្របីក្នុងខេត្តស្វាយរៀង គឺមានអាជីវករដើរប្រមូលទិញតាមភូមិស្រុកផ្គត់ផ្គង់ទីផ្សារក្នុងស្រុក ហើយលើសពីការផ្គត់ផ្គង់ក្នុងស្រុក អាជីវករសុំនាំចេញទៅលក់នៅប្រទេសវៀតណាមពី១០ក្បាលទៅ២០ក្បាល គាត់ក៏ជួយសម្រួលទៅ ។
ចំណែកក្រុមអ្នកប្រមូលទិញគោក្របីនៅភូមិព្រៃផ្តៅ សង្កាត់បាវិត ក្រុងបាវិត និយាយថា ពួកគេប្រមូលទិញគោក្របីពីប្រជាពលរដ្ឋលក់ឱ្យវៀតណាម គឺគេមកទិញដល់ក្រោល ហើយជួលរថយន្តដឹកទៅទម្លាក់នៅតាមព្រំដែនដោយបង់ឱ្យលោក ស្នា តំណាងក្រុមហ៊ុន ក្របីតូច១ក្បាលបង់៥ម៉ឺនរៀល ក្របីធំ១ក្បាល ១០ម៉ឺនរៀល ក្នុងនោះវៀតណាមក៏បានបង់ឱ្យសមត្ថកិច្ចយាមនៅច្រករបៀងនិងពេទ្យសត្វដែរ ក៏ប៉ុន្តែមិនដឹង១ក្បាលប៉ុន្មានទេ ។
រីឯស្ត្រីកសិករឈ្មោះ លឹម ពិសិដ្ឋ អាយុ៤០ឆ្នាំ នៅភូមិថ្នល់កែង ឃុំកណ្តៀងរាយ ស្រុកស្វាយទាប ឱ្យដឹងថា កាលពីថ្ងៃទី៣ ខែកក្កដាកន្លងមក វេលាម៉ោង២រសៀល មានចោរលួចគោរបស់គាត់មួយក្បាល ដែលចងឱ្យស៊ីស្មៅនៅស្រែក្រោយផ្ទះចម្ងាយប្រមាណ២០០ម៉ែត្រ ។ លុះក្រោយមកស្រាប់តែឃើញគេដឹកតាមរ៉ឺម៉ក ក៏នាំគ្នាជិះម៉ូតូដេញតាមរហូតដល់មុខរោងចក្រសានតុង ស្ថិតក្នុងភូមិជ្រៃធំ សង្កាត់ព្រៃអង្គញ់ ក្រុងបាវិត ទើបស្ទាក់ចាប់បាន ។
ជនសង្ស័យឈ្មោះ ប៉ុន វុន ភេទប្រុស អាយុ៧៦ឆ្នាំ មានទីលំនៅភូមិដើមពោធិ៍ ឃុំស្វាយតាយាន ស្រុកកំពង់រោទ៍ ត្រូវបានចាប់ប្រគល់ឱ្យសមត្ថកិច្ចសង្កាត់ព្រៃអង្គញ់ដោះស្រាយ ។ ប៉ុន្តែនគរបាលប៉ុស្តិ៍ព្រៃអង្គញ់ បានបញ្ជូនជនសង្ស័យទៅប៉ុស្តិ៍ឃុំស្វាយតាយានធ្វើការសាកសួរ ។ ជនសង្ស័យបានឆ្លើយថា រូបគេគ្រាន់តែជាអ្នកស៊ីឈ្នួលដឹកឱ្យក្រុមហ៊ុនប៉ុណ្ណោះ ហើយករណីនេះសមត្ថកិច្ចថាកំពុងស្រាវជ្រាវបន្ត ។
កន្លងមក គោក្របីប្រជាពលរដ្ឋបាត់រកមិនដែលឃើញទេ ដូច្នេះប្រជាពលរដ្ឋមានការព្រួយបារម្ភយ៉ាងខ្លាំងអំពីសុវត្ថិភាពសត្វពាហនៈរបស់ពួកគាត់ ដោយសារមានឈ្មួញដើរប្រមូលទិញគោក្របីនាំទៅប្រទេសវៀតណាម ដោយយកផ្លាកក្រុមហ៊ុនមកប្រមូលទិញពីអ្នកស្រុក រីឯចោរឆ្លៀតឱកាសលួចគោក្របីអ្នកស្រុកទាំងថ្ងៃនាំទៅវៀតណាម ។ ចំណែកមន្ត្រីម្នាក់សុំមិនបញ្ចេញឈ្មោះបានបង្ហើបឱ្យដឹងថា សមត្ថកិច្ចតាមច្រករបៀងមិនហ៊ានជាមួយតំណាងក្រុមហ៊ុនទេ គេនិយាយយកឈ្មោះអ្នកធំមកលាប ទើបសមត្ថកិច្ចសុំតែលុយថ្លៃបាយមួយក្បាល៥ម៉ឺនដុងប្រាក់វៀតណាមប៉ុណ្ណោះ ៕
ចែករំលែកព័តមាននេះ