ខេត្តត្បូងឃ្មុំ ៖ រថយន្តមួយគ្រឿងកំពុងបើកបរស្រាប់តែដាច់កង់ចេញពីតួរថយន្ត ហើយកង់រថយន្តនោះបានរមៀលទៅបុកចំស្ត្រីម្នាក់ដែលកំពុងតែអង្គុយនៅក្នុងរោងជាងជួសជុលម៉ូតូ បណ្តាលឲ្យស្លាប់ភ្លាមៗមួយរំពេច ។ ហេតុការណ៍នេះបានកើតឡើងកាលពីវេលាម៉ោង៨និង២៥នាទីព្រឹកថ្ងៃទី៥ សីហា ឆ្នាំ២០១៨ ស្ថិតនៅត្រង់ចំណុចបង្គោលគីឡូម៉ែត្រលេខ១៨៩-១៩០ក្នុងភូមិស្អំ ឃុំក្រែក ស្រុកពញាក្រែក ។
ស្ត្រីរងគ្រោះដែលស្លាប់ឈ្មោះ ថន ប៊ុនធឿន អាយុ៤៦ឆ្នាំ មានទីលំនៅក្នុងភូមិឃុំកើតហេតុខាងលើ ។
នគរបាលចរាចរស្រុកពញាក្រែកប្រាប់ឲ្យដឹងថា ពេលមុនកើតហេតុ រថយន្តមួយគ្រឿង ពាក់ស្លាកលេខ ភ្នំពេញ ២B-២៣៣៥ បានបើកបរក្នុងទិសដៅចេញពីស្រុកពញាក្រែកគោលដៅទៅស្រុកមេមត់ ស្របពេលដែលរថយន្តនេះបើកបរមកដល់ចំណុចកើតហេតុ ស្រាប់តែចៃដន្យរថយន្តបានដាច់កង់ចេញពីតួរថយន្ត ហើយកង់រថយន្តនោះបានរមៀលមកបុកចំស្ត្រីរងគ្រោះខាងលើដែលកំពុងតែអង្គុយនៅក្នុងរោងជាងជួសជុលម៉ូតូ បណ្តាលឲ្យស្លាប់ភ្លាមៗមួយរំពេច។
នគរបាលចរាចរណ៍ដដែលបានប្រាប់បន្តថា ក្រោយពីកង់រថយន្តខាងលើរមៀលមកបុកបណ្តាលឲ្យស្ត្រីម្នាក់ស្លាប់ហើយនោះ កង់រថយន្តនេះបានបោលទៅបុកបុរសម្នាក់ទៀតឈ្មោះ សេង ម៉ាប់ អាយុ៤០ឆ្នាំ រស់នៅភូមិជីតុក ឃុំក្រែក ស្រុកពញាក្រែក ដែលជាអ្នកមករង់ចាំជួសជុលម៉ូតូ ក៏បានរងរបួសផងដែរ ។
ក្នុងហេតុការណ៍ខាងលើនេះបណ្តាលឲ្យខូចខាតម៉ូតូចំនួន២គ្រឿង និងបាក់បង្គោលសំយាបផ្ទះ ចំណែករថយន្តបង្កបើកទៅមុខបានបន្តិចរួចក៏ឈប់ ហើយអ្នកបើកបររថយន្តនោះក៏ប្រញាប់រត់គេចខ្លួនបាត់ស្រមោលតែម្តង ។
ក្រោយកើតហេតុ កម្លាំងនគរបាលចរាចរណ៍ស្រុកបានចុះមកដល់ធ្វើការវាស់វែង និងបានប្រគល់សពឲ្យទៅសាច់ញាតិដើម្បីរៀបចំធ្វើបុណ្យតាមប្រពៃណីវត្ថុតាង ។ រីឯរថយន្តបង្កត្រូវបាននាំយកមករក្សាទុកនៅអធិការដ្ឋាននគរបាលស្រុកពញាក្រែកដើម្បីដោះស្រាយតាមច្បាប់ ៕
ចែករំលែកព័តមាននេះ