ខេត្តកណ្ដាល ៖ ជនសង្ស័យ២នាក់បានធ្វើសកម្មភាពលួចម៉ូតូ១គ្រឿង ដែលម្ចាស់ជិះទៅដោះត្រីមង នៅចំណុចប្រឡាយទឹកមួយកន្លែង លុះក្រោយពេលលួចបានសម្រេចក៏បានជិះយកទៅដាក់បញ្ចាំនៅផ្សារឃ្លាំងរំសេវ តែត្រឹមតម្លៃ៥០ដុល្លារប៉ុណ្ណោះ ។ ហេតុការណ៍នោះបានកើតឡើងកាលពីវេលាម៉ោង៥និង២០នាទី ថ្ងៃទី0៤ ខែសីហា ឆ្នាំ២០១៨ នៅចំណុចប្រឡាយទឹកស្ថិតនៅក្នុងភូមិព្រៃគោ ឃុំលំហាច ស្រុកអង្គស្នួល ខេត្តកណ្តាល ។
បន្ទាប់មកបានចែកគ្នាម្នាក់១០ម៉ឺនរៀលដើរស៊ីចាយ ហើយជនសង្ស័យរូបនោះមិនស្គាល់ម្ចាស់ម៉ូតូ និងផ្ទះរបស់គាត់ឡើយ ។ លុះ២ថ្ងៃក្រោយមកជននេះបានទៅអង្គុយលេងផ្សារថ្នល់ទទឹងមុខផ្ទះជនរងគ្រោះក៏ត្រូវបានម្ចាស់ម៉ូតូឃើញប្ដឹងឲ្យនគរបាលចាប់ខ្លួនបានម្នាក់ ចំណែកម្នាក់ទៀតរត់គេចខ្លួនរួច ។
ជនសង្ស័យដែលត្រូវចាប់ខ្លួននោះឈ្មោះ ឡាំង រិទ្ធ អាយុ២៦ឆ្នាំ ជនជាតិខ្មែរ មុខរបរកម្មករសំណង់ មានទីលំនៅក្នុងភូមិព្រៃគុយ ឃុំត្រពាំងគង ស្រុកសំរោងទង ខេត្តកំពង់ស្ពឺ ។ ចំណែកម្នាក់ទៀតដែលរត់គេចខ្លួនរួចនោះឈ្មោះ ចយ អាយុ២៥ឆ្នាំ ជនជាតិខ្មែរ មិនស្គាល់អាសយដ្ឋានឡើយ ។ ជនទាំង២នាក់ខាងលើបានធ្វើសកម្មភាពលួចយកម៉ូតូ ស៊េរីឆ្នាំ២០១០ ពណ៌ក្រហមលាយខ្មៅ ពាក់ស្លាកលេខ ភ្នំពេញ 1AN -1977 និងទូរស័ព្ទម៉ាកណូគាចុចពិលចំនួន១គ្រឿង ដែលជាកម្មសិទ្ធិរបស់បុរសម្នាក់ឈ្មោះ ឡេង បូរី អាយុ៣៦ឆ្នាំ មុខរបរជាងបាញ់ថ្នាំម៉ូតូ មានទីលំនៅក្នុងភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្តាល ។
តាមប្រភពព័ត៌មានបានឲ្យដឹងថា នៅមុនពេលកើតហេតុបុរសរងគ្រោះបានជិះម៉ូតូទៅដោះត្រីមង នៅក្នុងប្រឡាយទឹកខាងលើ ដោយពេលទៅដល់បានទុកម៉ូតូនៅលើមាត់ប្រឡាយចិញ្ចើមផ្លូវជាតិលេខ៤១ ។ លុះពេលកំពុងដោះត្រីពីមង ទើបតែបានមួយប៉ុណ្ណោះងាកទៅមើលម៉ូតូស្រាប់តែបាត់មិនឃើញទើបស្ទុះរត់ឡើងគោក ដើម្បីយកខោស្លៀកទៅរកម៉ូតូស្រាប់តែបាត់សោម៉ូតូ និងទូរស័ព្ទទៀត ។ ប្រភពដដែលបានបន្តទៀតថា ខណៈនោះបុរសរងគ្រោះបានដើរត្រឡប់ទៅផ្ទះវិញទាំងអស់សង្ឃឹម និងបានប្រាប់ក្រុមគ្រួសារឲ្យដឹង ។
ពេលនោះមានបុរសម្នាក់ដែលជាប្អូនថ្លៃឈ្មោះ សន ភក្តី បានប្រាប់ថា ខ្លួនបានឃើញជនសង្ស័យម្នាក់ឈ្មោះ ឡាំង រិទ្ធ ជិះម៉ូតូតែម្នាក់ឯងយ៉ាងលឿនកាត់មុខផ្ទះមុននេះបន្តិច ។ បន្ទាប់ពីបានដឹងពីអត្តសញ្ញាណជនសង្ស័យហើយ ក៏ដើររកគ្រប់ទីកន្លែង ប៉ុន្តែមិនបានឃើញឡើយ លុះ២ថ្ងៃក្រោយមក គឺនៅថ្ងៃទី០៦ ខែសីហា ឆ្នាំ២០១៨ ស្រាប់តែឃើញជនសង្ស័ឈ្មោះ ឡាំង រិទ្ធ នោះទៅអង្គុយលេងនៅមុខផ្ទះរបស់គាត់ (ជនរងគ្រោះ) ទើបរាយការណ៍ជូននគរបាលឲ្យចាប់ខ្លួនតែម្ដង ។
ក្រោយពេលចាប់ខ្លួននាំទៅសាកសួរជនសង្ស័យខាងលើបានសារភាពថា នៅមុនពេលកើតហេតុខ្លួន និងបក្សពួកម្នាក់ទៀតឈ្មោះ ចយ បានចេញធ្វើសកម្មភាពលួចម៉ូតូ ហើយពេលទៅដល់ត្រង់ចំណុចកើតហេតុបានឃើញម៉ូតូ១គ្រឿងចតទុកនៅមាត់ប្រឡាយ ។ ខណៈនោះដោយឃើញឱកាសល្អខ្លួនក៏បានធ្វើសកម្មភាពលួចយកកូនសោចាក់បញ្ឆេះព្រមទាំងយកទូរស័ព្ទ១គ្រឿងផង រួចជិះចេញគេចខ្លួន ។ បន្ទាប់មកបានយកម៉ូតូទៅបញ្ចាំនៅផ្សារឃ្លាំងរំសេវបានលុយចំនួន៥០ដុល្លារ រួចបានចែកគ្នាជាមួយគូកនក្នុងម្នាក់២៥ដុល្លារ (១០ម៉ឺនរៀល) ហើយខ្លួនមិនស្គាល់ម្ចាស់ម៉ូតូជានរណា និងមានទីលំនៅនៅឯណានោះទេ ទើបទៅអង្គុយលេងចំមុខផ្ទះជនរងគ្រោះ ហើយក៏ត្រូវជាប់អន្ទាក់បែបនេះតែម្ដង ៕
ចែករំលែកព័តមាននេះ