រាជធានីភ្នំពេញ ៖ ផលិតផលក្លែងក្លាយចំនួន៨៨តោន ដែលគណ:កម្មាធិការប្រយុទ្ធប្រឆាំងផលិតផលក្លែង ក្លាយបង្ក្រាបបាននាពេលកន្លងមក ត្រូវបានបង្ហាញក្នុងសន្និសីទសារព័ត៌មាន នៅសាលប្រជុំទីស្តីការក្រសួង មហាផ្ទៃ កាលពីរសៀលថ្ងៃទី៦ សីហា…
រាជធានីភ្នំពេញ ៖ ផលិតផលក្លែងក្លាយចំនួន៨៨តោន ដែលគណ:កម្មាធិការប្រយុទ្ធប្រឆាំងផលិតផលក្លែង ក្លាយបង្ក្រាបបាននាពេលកន្លងមក ត្រូវបានបង្ហាញក្នុងសន្និសីទសារព័ត៌មាន នៅសាលប្រជុំទីស្តីការក្រសួង មហាផ្ទៃ កាលពីរសៀលថ្ងៃទី៦ សីហា ។
ក្នុងសេចក្តីប្រកាសព័ត៌មានរបស់គណ:កម្មាធិការប្រយុទ្ធប្រឆាំងផលិតផលក្លែងក្លាយបានឱ្យដឹងថា នាពេលកន្លងមកគណ:កម្មាធិការប្រយុទ្ធប្រឆាំងផលិតផលក្លែងក្លាយ បានបង្ក្រាបផលិតផលក្លែងក្លាយចំនួន៤ករណី និងរឹបអូសវត្ថុតាងសរុបចំនួន៨៨តោនក្នុងនោះមាន ៖
១-ករណីបើកសិប្បកម្មផលិតកាហ្វេក្លែងក្លាយ
២-ករណីបើកទីតាំងផលិតសាច់ប៉ាតេមិនអនុលោមតាមច្បាប់
៣-ករណីបើកសិប្បកម្មផលិតម្រេច និងកាហ្វេមិនអនុលោមតាមច្បាប់
៤-ករណីនាំចូលផលិត វេចខ្ចប់ខុសច្បាប់ ផលិតផលម៉ាកSaint Amand ទឹកបរិសុទ្ធម៉ាក Evian ស្រាបៀរម៉ាក Corona និងផលិតផលមួយចំនួនទៀត ។
លោកនាយឧត្តមសេនីយ៍ មៀច សុផាន់ណា ប្រធានគណ:កម្មាធិការប្រយុទ្ធប្រឆាំងផលិតផលក្លែងក្លាយ ថ្លែងថា សមត្ថកិច្ចបានបង្ក្រាបផលិតផលក្លែងក្លាយចំនួន៤ករណីនាពេលកន្លងមកក្នុងនោះ ៖
ករណីទី១-នៅថ្ងៃទី១៣ ខែឧសភា ឆ្នាំ២០១៨ ក្រុមប្រតិបត្តិការពិសេសនៃគណៈកម្មាធិការប្រយុទ្ធប្រឆាំងផលិតផលក្លែងក្លាយ បានចុះបង្ក្រាបករណីបើកសិប្បកម្មផលិតកាហ្វេក្លែងក្លាយ និងខុសច្បាប់ នៅភូមិឌួង សង្កាត់ព្រែកព្នៅ ខណ្ឌព្រែកព្នៅ ដកហូតបានវត្ថុតាងចំនួន១០មុខស្មើនឹង៧តោន ឃាត់ខ្លួនជនសង្ស័យម្នាក់។ ករណីទី២-នៅថ្ងៃទី៤ ខែកក្កដា ឆ្នាំ២០១៨ បានចុះបង្ក្រាបករណីបើកទីតាំងផលិតប៉ាតេមិនអនុលោមតាមច្បាប់ ស្ថិតនៅផ្លូវលំ(២០០៤)សង្កាត់ទឹកថ្លា ខណ្ឌសែនសុខ ដកហូតវត្ថុតាងចំនួន១៤មុខ ស្មើនឹង៥តោន ។
ករណីទី៣-នៅថ្ងៃទី៦ ខែកក្កដា ឆ្នាំ២០១៨បានចុះបង្ក្រាបករណីបើកសិប្បកម្មផលិតម្រេច និងកាហ្វេមិនអនុលោមតាមច្បាប់ ស្ថិតនៅផ្ទះលេខ២E០ ផ្លូវលេខ២២៦ ភូមិ១៣ សង្កាត់ផ្សារដើមគ ខណ្ឌទួលគោក ដកហូតបានវត្ថុតាងចំនួន១៣មុខ ស្មើនឹង១៨តោន ។
ករណីទី៤-នៅថ្ងៃទី២០-២១ ខែកក្កដា ឆ្នាំ២០១៨ បានចុះង្ក្រាបករណីនាំចូល ផលិត និងវេចខ្ចប់ក្លែងក្លាយនិងខុសច្បាប់ នូវផលិតផលទឹកបរិសុទ្ធម៉ាក Saint Amand ទឹកបរិសុទ្ធម៉ាកEvian ស្រាបៀរម៉ាក Corona និងផលិតផលមួយចំនួនទៀត នៅផ្ទះលេខ១៣B ផ្លូវលំ ភូមិច្រេស សង្កាត់គោកឃ្លាង ខណ្ឌសែនសុខ ដកហូតបានវត្ថុតាងចំនួន១៣មុខ ស្មើនឹង៥៨តោន ។
គួររំលឹកថា ផលិតផលក្លែងក្លាយនិងសារធាតុគីមីជាង១០០តោន ត្រូវបានគណៈកម្មាធិការប្រយុទ្ធប្រឆាំងផលិតផលក្លែងក្លាយកម្ទេចចោលនៅបរិវេណជាប់នឹងសាលាសង្កាត់ជើងឯក ខណ្ឌដង្កោ កាលពីព្រឹកថ្ងៃទី៣ ខែមេសា ឆ្នាំ២០១៨ ក្រោមអធិបតីភាពសម្តេចក្រឡាហោម ស ខេងឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ។
គណៈកម្មាធិការនេះបានឱ្យដឹងដែរថា ការបង្ក្រាបផលិតផលក្លែងក្លាយក្នុងឆ្នាំ២០១៧ កន្លងមកបាន១៩ករណី រឹបអូសវត្ថុតាងសរុបចំនួន៥៩៧,៥តោន ធ្វើពិធីដុតបំផ្លាញចោល៨១តោន ឃាត់ខ្លួនជនសង្ស័យចំនួន៦នាក់ កសាងសំណុំរឿងបញ្ជូនទៅតុលាការ ។
យោងតាមរបាយការណ៍បានឲ្យដឹងថា បទល្មើសដែលបង្ក្រាបបានភាគច្រើនពាក់ព័ន្ធនឹងការនាំចូល ស្តុកទុក និងចែកចាយផលិតផលគ្រឿងសម្អាងក្លែងក្លាយនិងខុសច្បាប់ ការនាំចូល ស្តុកទុក និងចែកចាយសារធាតុគីមីខុសច្បាប់ ការកែច្នៃ និងចែកចាយផលិតផលពីសាច់សត្វដោយខុសច្បាប់ ការផលិតនិងកែច្នៃគ្រឿងទេសគ្មានស្តង់ដារ និងគ្មានអនាម័យ ។
តាមរយៈការអនុវត្តប្រកាសរួម និងផែនការអនុវត្តរួមរវាងក្រសួងមហាផ្ទៃនិងក្រសួងសុខាភិបាល ស្តីពីការគ្រប់គ្រងគុណភាពសេវាកម្ម និងវិធានការទប់ស្កាត់ការធ្វើចរាចរណ៍ផលិតផលសុខាភិបាលខុសច្បាប់ និងសេវាសុខាភិបាលឯកជនខុសច្បាប់ ដើម្បីសុខភាពនិងសុវត្ថិភាពសង្គម មកដល់ពេលនេះពិនិត្យឃើញថា បាតុភាពនៃការបង្កើតសេវាសុខាភិបាលឯកជនខុសច្បាប់បានថយចុះគួរឱ្យកត់សម្គាល់ ៕
ចែករំលែកព័តមាននេះ