រាជធានីភ្នំពេញ ៖ រថយន្តកុងតឺន័រមួយគ្រឿងបត់ចូលផែកៀរម៉ូតូ បណ្តាលឲ្យរងរបួសធ្ងន់បុរសម្នាក់ ហើយរថយន្តបានបើករត់ចូលផែបាត់ដោយមិនទទួលខុសត្រូវ បង្កឲ្យមានការភ្ញាក់ផ្អើលកាលពីវេលាម៉ោង៩និង៣០នាទីយប់ថ្ងៃទី០៦ ខែសីហា ឆ្នាំ២០១៨ តាមបណ្ដោយផ្លូវជាតិលេខ៤ ទល់មុខផែស្ងួតតិចស្រ៊ុន ភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ ។
រថយន្តបង្កជាប្រភេទរថយន្តកុងតឺន័ររបស់អាមេរិកកាំង ពណ៌ស មិនចាំស្លាកលេខ ជារថយន្តរបស់ក្រុមហ៊ុនផែស្ងួតតិចស្រ៊ុន ។ ចំណែកម៉ូតូររងគ្រោះម៉ាកហុងដាឌ្រីម ស៊េរី២០១៧ ពណ៌ខ្មៅ បើកបរដោយបុរសម្នាក់ក្នុងទិសដៅពីលិចទៅកើតរងរបួសយ៉ាងធ្ងន់ធ្ងរ ។
តាមប្រភពព័ត៌មានពីកន្លែងកើតហេតុបាននិយាយថា នៅមុនពេលកើតហេតុគេឃើញម៉ូតូរងគ្រោះបើកបរដោយបុរសម្នាក់ក្នុងទិសដៅពីលិចទៅកើតលុះបើកមកដល់ចំណុចកើតហេតុនៅមុខផែស្ងួតខាងលើ ស្រាប់តែមានរថយន្តមួយគ្រឿងជាប្រភេទកុងតឺន័ររបស់ក្រុមហ៊ុនផែស្ងួតបើកបរក្នុងទិសដៅពីលិចទៅកើត ស្របជាមួយម៉ូតូ ហើយបើកមកដល់ចំណុចកើតហេតុនៅមុខផែស្ងួតខាងលើរថយន្តកុងតឺន័របានបើកបត់ស្ដាំចូលក្នុងផែ បណ្ដាលឱ្យកៀរម៉ូតូ និងរងរបួសបុរសម្នាក់យ៉ាងធ្ងន់ធ្ងរ បន្ទាប់មករថយន្តបង្កខាងលើបានបត់ចូលផែបាត់ដោយមិនបានចេញដោះស្រាយជាមួយជនរងគ្រោះឡើយ ខណៈភ្លាមៗនោះជនរងគ្រោះដែលរងរបួសធ្ងន់ពេកសន្លប់ស្តូកស្តឹង និងឈាមហូរដក់ និងផ្លូវហើយត្រូវបានរថយន្តឯកជនដឹកយកទៅសង្គ្រោះភ្លាមៗផងដែរ ដោយទុកម៉ូតូចោលនៅមុខផែស្ងួតខាងលើ ។
ប្រភពបានបន្តទៀតថា ពេលកើតហេតុភ្លាមសមត្ថកិច្ចនគរបាលប៉ុស្តិ៍មិនបានទៅកន្លែងកើតហេតុ ភ្លាមៗនោះទេ លុះជិតមួយម៉ោងទើបបានមានសមត្ថកិច្ចមកដល់ ហើយនៅពេលសមត្ថកិច្ចទៅដល់ឃើញម៉ូតូនៅមុខផែខាងលើ ហើយរថយន្តបើកចូលផែបាត់ហើយមិនដឹងដោះស្រាយមិច ក៏បានទាក់ទងទៅជំនាញផ្នែកសណ្តាប់ធ្នាប់ចរាចរណ៍ខណ្ឌ ដើម្បីដោះស្រាយ បន្ទាប់មកជំនាញចរាចរណ៍ខណ្ឌពោធិ៍សែនជ័យបានឲ្យនគរបាលប៉ុស្តិ៍ចោមចៅ៣ បាញ់ថ្នាំ ហើយយកម៉ូតូទុកដោយមិនដឹងដោះស្រាយយ៉ាងណា ។
ក្រោយពេលកើតហេតុភ្លាមៗផងដែរ ប្រជាពលរដ្ឋដែលឃើញហេតុការណ៍ខាងលើបានរិះគន់ទៅជំនាញចរាចរណ៍ខណ្ឌពោធិ៍សែនជ័យយ៉ាងខ្លាំងព្រោះជំនាញចរាចរណ៍ខណ្ឌពោធិ៍សែនជ័យមិនបានសហការជាមួយក្រុមហ៊ុនខាងលើនោះឡើយ៕
ចែករំលែកព័តមាននេះ