ទីក្រុងសិង្ហបុរី ៖ តម្លៃប្រេងបានកើនឡើងវិញកាលពីថ្ងៃចន្ទ បន្ទាប់ពីផលិតកម្មប្រេងឆៅរបស់ប្រទេសអារ៉ាប៊ីសាអូឌីតមើលឃើញការធ្លាក់ចុះយ៉ាងខ្លាំងនៅខែកក្កដា ខណៈការបូមប្រេងថ្មអាមេរិកអន់ថយផងដែរ ។
ទីផ្សារក៏កំពុងរង់ចាំមើលការប្រកាសពីអាមេរិក ទាក់ទងនឹងការដាក់ទណ្ឌកម្មសេដ្ឋកិច្ចលើអ៊ីរ៉ង់ ដែលជាប្រទេសនាំចេញប្រេងដ៏ធំមួយ ។
តម្លៃប្រេងឆៅរបស់ Brent បានលក់ចេញក្នុងតម្លៃ៧៣,៤២ដុល្លារក្នុង១ធុងកាលពីថ្ងៃចន្ទ ឬកើនឡើង០,៣% ។ រីឯតម្លៃប្រេង West Texas Intermediate (WTI) របស់អាមេរិកវិញ គឺស្មើនឹង៦៨,៦៨ដុល្លារក្នុង១ធុង ឬកើនឡើង០,៣% ។
កាលពីសប្តាហ៍មុន ក្រុមហ៊ុនថាមពលរបស់អាមេរិកបានកាត់បន្ថយកន្លែងបូមប្រេងជាលើកទី២ ក្នុងរយៈពេល៣សប្តាហ៍មកនេះ ។
ក្រុមហ៊ុនផ្តល់សេវាកម្មផ្នែកថាមពល Baker Hughes បានឲ្យដឹងកាលពីថ្ងៃសុក្រថា ការកាត់បន្ថយកន្លែងបូមប្រេងចំនួន២កន្លែង បានធ្វើឲ្យចំនួនសរុបធ្លាក់មកស្មើ៨៥៩កន្លែង។
ក្រុមហ៊ុនបូមប្រេងថ្មអាមេរិកជាច្រើនមើលឃើញប្រាក់ចំណូលអន់ថយ ដោយសារកំណើនការចំណាយ និងតម្លៃប្រេងឆៅធ្លាក់ចុះ ។
ក្រៅពីសហរដ្ឋអាមេរិក ប្រទេសអារ៉ាប៊ីសាអូឌីតបានបូមប្រេងប្រមាណ១០,២៩លានធុងក្នុង១ថ្ងៃកាលពីខែកក្កដា ដែលទាបជាងខែមិថុនា ប្រមាណ២០ម៉ឺនធុងឯណោះ ។ ការធ្លាក់ចុះនេះកើតមានឡើង បើទោះបីជាអង្គការប្រទេសនាំចេញប្រេង (OPEC) បានសន្យាថា នឹងបង្កើនផលិតកម្មក្តី ។
ទោះជាយ៉ាងណា ប្រទេសរុស្ស៊ី សហរដ្ឋអាមេរិក និងអារ៉ាប៊ីសាអូឌីត បានផលិតប្រេងប្រមាណពី១០លាន ទៅ១១លានធុងក្នុង១ថ្ងៃ ដែលស្មើនឹង១ភាគ៣នៃតម្រូវការនៅលើពិភពលោក ៕
ចែករំលែកព័តមាននេះ