ខេត្តកំពង់ឆ្នាំង ៖ តាមរយៈបទបញ្ជាបន្ទាន់របស់សម្តេចតេជោ ហ៊ុន សែន ដែលយកចិត្តទុកដាក់លើគ្រួសារយោធិនពលីមួយកំពុងជួបការលំបាកនោះ កាលពីព្រឹកថ្ងៃទី២៦ មីនា លោកចូ វណ្ណា ប្រធានមន្ទីរសង្គមកិច្ច និងអតីតយុទ្ធជនបាននាំយកប្រាក់ចំនួន៦.៨៦៥.០០០រៀលប្រគល់ជូនស្ត្រីឈ្មោះហ៊ុយ ខន អាយុ៥៦ឆ្នាំ ដែលត្រូវជាភរិយាអតីតយុទ្ធជនពិការ ហើយស្លាប់កាលពីដើមខែមករា ដើមឆ្នាំ២០១១ ឈ្មោះគន សុខុម ។ ការប្រគល់ប្រាក់នេះក៏មានការចូលរួមពីមន្ត្រីមន្ទីរសង្គមកិច្ច និងសាក្សីដឹងឮជាច្រើនរូបទៀត។
លោកប្រធានមន្ទីរសង្គមកិច្ចខេត្តឱ្យដឹងថា ប្រាក់ដែលប្រគល់ឱ្យស្ត្រីជាភរិយាអតីតយុទ្ធជនពិការ និងទើបពលីថ្មីៗនេះមានចំនួនសរុប៦.៨៦៥.០០០រៀល ក្នុងនោះមានប្រាក់គោលនយោបាយ រំលឹក និងបូជាសពចំនួន២.៨៦៥.០០០រៀល ប្រាក់មរណៈសង្គ្រោះ ឬហៅថាប្រាក់សមាគមចំនួន៤លានរៀល។ ចំពោះប្រាក់មរណៈសង្គ្រោះនោះ លោកបានប្រគល់មុនចំនួន១លានរៀលរួចហើយ ដូចនេះនៅសល់តែ៣លានរៀលទេ។ ប្រាក់សរុបដែលត្រូវប្រគល់ជូនមានចំនួន៥.៨៦៥.០០០រៀល។
ស្ត្រីឈ្មោះហ៊ុយ ខន ក្រោយពីបានទទួលប្រាក់ទាំងនេះមានសេចក្តីរីករាយក្រៃលែង និងបានលើកដៃថ្លែងអំណរគុណយ៉ាងជ្រាលជ្រៅចំពោះសម្តេចតេជោហ៊ុន សែន ដែលយកចិត្តទុកដាក់ដល់គ្រួសារយុទ្ធជនពិការ និងពលីពិសេសគ្រួសារគាត់ដែលកំពុងជួបការលំបាកក្នុងជីវភាពនេះ។ គាត់បានលើកដៃបួងសួងដល់វត្ថុសក្តិសិទិ្ធក្នុងលោកឱ្យជួយបីបាច់ថែរក្សាសម្តេច និងលោកជំទាវ បុត្រា បុត្រី ចៅប្រុស ចៅស្រី ជួបតែសេចក្តីសុខ និងឈ្នះអស់មារសត្រូវ។
ក្រោយពីសារព័ត៌មានកោះសន្តិភាពចេញផ្សាយថ្ងៃទី២៦ មីនា ស្តីពីគ្រួសារអតីតយុទ្ធជនពលីដែលកំពុងជួបការលំបាកពីជីវភាព ហើយសុំបើកប្រាក់គោលនយោបាយ ប្រាក់សមាគមនោះសម្តេចតេជោនាយករដ្ឋមន្ត្រីបានដាក់បទបញ្ជាភ្លាមៗទើបមានការបើកប្រាក់ទាំងនេះជូនគាត់៕
ចែករំលែកព័តមាននេះ