រាជធានីភ្នំពេញ ៖ បុរសជាសាស្ត្រាចារ្យម្នាក់បានធ្វើអត្តឃាតដោយចងកសម្លាប់ខ្លួនឯងនៅក្នុងបន្ទប់ផ្ទះបាយ បណ្តាលឱ្យស្លាប់ជាច្រើនថ្ងៃរហូតសពមានសភាពហើមស្អុយរលួយ និងធុំក្លិនយ៉ាងខ្លាំងចេញមកក្រៅ បង្កការភ្ញាក់ផ្អើលនាវេលារសៀលថ្ងៃទី៦ ខែសីហា ឆ្នាំ២០១៨ នៅចំណុចផ្ទះលេខ៤០BT ផ្លូវបេតុង៧៩ ក្នុងភូមិចំរើនផល១ សង្កាត់បឹងទំពន់១ ខណ្ឌមានជ័យ រាជធានីភ្នំពេញ។
ជនរងគ្រោះដែលស្លាប់ឈ្មោះ មាស សូរិទ្ធី ភេទប្រុស អាយុ៥២ឆ្នាំ ជាសាស្ត្រាចារ្យផ្នែកកសិកម្មនៃសកលវិទ្យាល័យភូមិន្ទកសិកម្មចំការដូង ស្នាក់នៅផ្ទះកើតហេតុខាងលើ ។
តាមប្រភពព័ត៌មានពីប្រជាពលរដ្ឋដែលរស់នៅក្បែរកន្លែងកើតហេតុបានឱ្យដឹងថា ជារៀងរាល់ថ្ងៃគេតែងសង្កេតឃើញបុរសរងគ្រោះចេញចូលផ្ទះខាងលើជាប្រចាំ ប៉ុន្តែប្រមាណ៣ថ្ងៃក្រោយមកនេះ ពុំឃើញគាត់ចេញមកក្រៅឡើយ ។
ប្រភពដដែលបន្តថា ក្រោយពីមិនឃើញជនរងគ្រោះចេញពីផ្ទះចំនួន៣ថ្ងៃរួចមក ស្រាប់តែធុំក្លិនស្អុយអាសោចិ៍ចេញពីក្នុងផ្ទះខាងលើនោះ ជាហេតុធ្វើឱ្យពលរដ្ឋដែលរស់ក្បែរផ្ទះកើតហេតុខាងលើបានទូរស័ព្ទទៅសាច់ញាតិដើម្បីឱ្យមកមើល លុះពេលសាច់ញាតិចូលទៅដល់ក្នុងផ្ទះ ត្រង់ចំណុចបន្ទប់ផ្ទះបាយ ស្រាប់តែឃើញជនរងគ្រោះចង.កធ្វើអត្តឃាតសម្លាប់ខ្លួនបាត់ទៅហើយ ដោយប្រើខ្សែភ្លើងចងទៅនឹងចំរឹងមាត់បង្អួច ។ ដោយសារតែស្លាប់ជាច្រើនថ្ងៃមកហើយ ទើបធ្វើឱ្យសពមានសភាពហើមស្អុយរលួយ និងជះក្លិនស្អុយអាសោចិ៍តែម្តង ។
តាមការរៀបរាប់ពីក្រុមគ្រួសារ និងសាច់ញាតិរបស់ជនរងគ្រោះបានឱ្យដឹងថា ជនរងគ្រោះស្នាក់នៅផ្ទះកើតហេតុតែម្នាក់ឯងប៉ុណ្ណោះ ដោយប្រពន្ធនិងកូនជាប់ប្រកបរបររកស៊ីនៅឯខណ្ឌឫស្សីកែវ ដូច្នេះហើយត្រូវរស់នៅបែកផ្ទះគ្នា ប៉ុន្តែរៀងរាល់ចុងសប្តាហ៍ម្តងៗ គឺបុរសរងគ្រោះតែងតែទៅលេងផ្ទះប្រពន្ធ និងកូនជានិច្ច ដោយសារការនឹករលឹកគ្នា លុះសប្តាហ៍ក្រោយនេះ បែរជាមិនឃើញជនរងគ្រោះទៅលេងដូចសពដងសោះ រហូតដល់អ្នកជិតខាងទូរស័ព្ទឱ្យសាច់ញាតិមកមើលផ្ទះ ទើបដឹងថា ជនរងគ្រោះបានចង.កសម្លាប់ខ្លួនឯងតែម្តង ។
ជុំវិញករណីបុរសខាងលើធ្វើអត្តឃាតដោយចង.កសម្លាប់ខ្លួននេះ ពុំមានប្រភពណាមួយអះអាងបញ្ជាក់ឱ្យដឹងពីមូលហេតុឡើយ ខណៈដែលសាច់ញាតិជនរងគ្រោះបានអះអាងថា បុរសរងគ្រោះមានជម្ងឺប្រចាំកាយច្រើន ។
សូមបញ្ជាក់ថា បន្ទាប់ពីទទួលបានព័ត៌មានថា មានករណីបុរសម្នាក់ធ្វើអត្តឃាតដោយចង.ក រួចមក កម្លាំងនគរបាលមូលដ្ឋានបានសហការជាមួយជំនាញចុះអន្តរាគមន៍ពិនិត្យ និងធ្វើកោសល្យវិច្ច័យលើសពដើម្បីរកមូលហេតុនៃការស្លាប់ ។ ក្រោយពិនិត្យយ៉ាងល្អិតល្អន់រួចមក សមត្ថកិច្ចបានបញ្ជាក់ថា ជនរងគ្រោះខាងលើពិតជាត្រូវស្លាប់ដោយសារចង.កសម្លាប់ខ្លួនប្រាកដមែន ពុំមែនជាករណីអ្វីផ្សេងឡើយ ។ ក្រោយពិនិត្យរួច នគរបាលបានប្រគល់សពជូនក្រុមគ្រួសារសាច់ញាតិដើម្បីធ្វើបុណ្យតាមប្រពៃណី ៕
ចែករំលែកព័តមាននេះ