ខេត្តព្រះវិហារ ៖ កាលពីវេលាម៉ោង៩និង៣០នាទីព្រឹកថ្ងៃទី៦ ខែសីហា ឆ្នាំ២០១៨ មានហេតុការណ៍គ្រោះថ្នាក់ចរាចរណ៍មួយ ដែលបង្កឡើងដោយរថយន្តកូរ៉េមួយតោនកន្លះបើកបរក្នុងល្បឿនលឿន ជ្រុលទៅបុកម៉ូតូមួយគ្រឿងដែលបើកបរដោយមន្ត្រីយោធាម្នាក់ក្នុងទិសដៅបញ្ច្រាសគ្នា បណ្តាលឱ្យមន្ត្រីយោធាដែលជាអ្នកបើកបរម៉ូតូស្លាប់ភ្លាមៗនៅនឹងកន្លែងស្ថិតនៅតាមបណ្តោយផ្លូវជាតិលេខ៦២ ចន្លោះបង្គោលគីឡូម៉ែត្រលេខ២០៦-២០៧…
ខេត្តព្រះវិហារ ៖ កាលពីវេលាម៉ោង៩និង៣០នាទីព្រឹកថ្ងៃទី៦ ខែសីហា ឆ្នាំ២០១៨ មានហេតុការណ៍គ្រោះថ្នាក់ចរាចរណ៍មួយ ដែលបង្កឡើងដោយរថយន្តកូរ៉េមួយតោនកន្លះបើកបរក្នុងល្បឿនលឿន ជ្រុលទៅបុកម៉ូតូមួយគ្រឿងដែលបើកបរដោយមន្ត្រីយោធាម្នាក់ក្នុងទិសដៅបញ្ច្រាសគ្នា បណ្តាលឱ្យមន្ត្រីយោធាដែលជាអ្នកបើកបរម៉ូតូស្លាប់ភ្លាមៗនៅនឹងកន្លែងស្ថិតនៅតាមបណ្តោយផ្លូវជាតិលេខ៦២ ចន្លោះបង្គោលគីឡូម៉ែត្រលេខ២០៦-២០៧ ត្រង់ចំណុចផ្លូវកោងទួល៤២ ក្នុងភូមិត្រពាំងសង្កែលិច ឃុំកន្ទួត ស្រុកជាំក្សាន្ត ខេត្តព្រះវិហារ។
ជនរងគ្រោះដែលស្លាប់ឈ្មោះ ត្រក អឿន ភេទប្រុស អាយុ៥២ឆ្នាំ អត្តលេខ ២២៩.៥៩៨ ជាកងអនុសេនាតូចបញ្ជូនសារ វរសេនាតូច៣៧២ ចំណុះកងពលតូចអន្តរាគមន៍លេខ៧ ស្ថិតក្នុងភូមិសែនជ័យ ឃុំស្រអែម ស្រុកជាំក្សាន្ត ខេត្តព្រះវិហារ។
យោងតាមការបញ្ជាក់ពីសាក្សីនៅកន្លែងកើតហេតុបានឱ្យដឹងថា នៅមុនពេលកើតហេតុ គេឃើញរថយន្តកូរ៉េមួយគ្រឿងប្រភេទមួយតោនកន្លះ ពណ៌ស ពាក់ស្លាកលេខ រតនគិរី៣A-០០៨៦ បើកបរក្នុងល្បឿនយ៉ាងលឿន ក្នុងទិសដៅពីកើតទៅលិច លុះមកដល់ចំណុចកើតហេតុ ស្រាប់តែរថយន្តបានបើកវ៉ាជែងម៉ូតូមួយទៀត ហើយក៏ជ្រុលទៅបុកពេញទំហឹងជាមួយម៉ូតូដែលបើកបរដោយមន្ត្រីយោធាម្នាក់ ធ្វើដំណើរក្នុងទិសដៅបញ្ច្រាសគ្នា បណ្ដាលឱ្យមន្ត្រីយោធាដែលជាអ្នកបើកបរម៉ូតូស្លាប់ភ្លាមៗនៅនឹងកន្លែងកើតហេតុ ក្រោយពេលបង្កហេតុរួច អ្នកបើកបររថយន្តបង្កបានរត់ចូលព្រៃបាត់ បន្សល់ទុកតែរថយន្តនៅកន្លែងកើតហេតុ។
ភ្លាមៗនោះគេឃើញមានសមត្ថកិច្ចនគរបាលចរាចរណ៍ រួមជាមួយមេអង្គភាព និងអាជ្ញាធរមូលដ្ឋាន បានមកដល់កន្លែងកើតហេតុ ហើយធ្វើការវាស់វែង រួចយករថយន្តដើម្បីមកដឹកសពជនរងគ្រោះទៅធ្វើបុណ្យតាមប្រពៃណី។
ចំណែករថយន្តបង្ក និងម៉ូតូជនរងគ្រោះ ត្រូវបានសមត្ថកិច្ចនគរបាលចរាចរណ៍នាំយកទៅរក្សាទុកនៅអធិការដ្ឋាននគរបាលស្រុកជាំក្សាន្ត រង់ចាំអ្នកបើកបររថយន្តបង្កចូលខ្លួនមកដោះស្រាយនៅពេលក្រោយ ៕
ចែករំលែកព័តមាននេះ